Cathiang nih nun phun hnih a langhter. Cu hna cu Adam nun le khrih nun hi an si. Adam nun cu minung pumsa duhnak nih a ukmi nun kha a si. Khrih nun cu Thiangthlarau nih a ukmi nun a si. Adam hrin a si mi paohpaoh cu minung fimnak kan ti mi chiatha thleidannak nih a kan uk dih hna. Cu chiatha thleidannak nih cun Pathian hi a hngal kho ngaingai lo i a lung zong a tong kho lo. Sihmanhsehlaw Thiangthlarau tu nihcun Pathian duhnak a hngalh lawng siloin Pathian duhnak tuah cu ai lawmhnak sang bik a si. MInung nih kan chiatha thleidannak hmang in a tha kan ti mi lungtho Ngai le lawm Ngai in kan tuah khawhmi bantuk khi a si. Efesa 2:10 ahcun Kannih cu Pathian nih kut chuak kan si i Pathian nih thil tha tuah dingah a rak kan tinh bantukin Khrih he kan i pehtlaihnak thawngin thil tha cu kan tuah khawh nakhnga a kan ser thanmi kan si a ti. Hi cathiang kan zoh tikah ser than a si lo mi nih cun thil tha an tuah kho lo ti kha fiang tein a lang. Titsa in hrin mi fa paohpaoh cu Adam in hrin kan si caah Adam thi le sa in kan nung i Adam nun kan i hrawm hna. Cu Adam nun cu nawlngaihlo ruang ah Eden dum chung in an rak ei mi thingthei chiatha thleidannak nih a uk mi kha a si. Cucaah Bawipa nawlngaihlonak nun kha an i chuahpi mi cu a si.
Johan 3:5 kan zoh tik ah Zisuh nih a ti mi cu "Biatak tein kan chimh: Ahohmanh ti le thlarau in hrin a si lo ahcun Pathian Pennak chung ah a lut kho lai lo." Hi nih fiang tein in a langhter mi cu Adam hrin sinak cun mi zeihmanh Pathian pennak chung i kan luh khawhlo ding kha a fiang tuk. Pathian pennak luhnak ding ahcun ti le thlarau in hrin si hnu lawng ah luh khawh ding a sinak kong kha fiang tein a lang. Ti le thlarau in hrin ti tikah hin a fiang tuk mi cu Zisuh nun kha a chim duhmi a si. Phun dang in kan chim ahcun Zisuh nih keimah nun nan ngeih lo ahcun Pathian pennak chung ah nan lut kho lai lo ti he ai khat. Cucaah Johan 6:14 ahcun keimah cu lam le biatak le nunnak ka si, keimah sin in ti dah lo cun ahohmanh pa sin nan phan kho lai lo a ti nak kha a si. Zisuh khrih cu adam thi le sa in hrin mi a si loh. Thlarau thi le sa in hrinmi a si. Adam cu tlak in Pathian a ser i thaw a pek. Asinain Zisuh cu Pathian nih thlarau in a ser i Mary chung in a chuak. Hnu hirn fa paohpaoh cu Adam thi le sa in a chuakmi kan si lio ah Zisuh cu Thlarau thi le sa in a chuak mi a si. Khrih cu minung sinak kha 100 ah 100 a hrawmh ter ve ko nain Khrih chung ah Mary ci a um lo in Adam ci zong a um ve thiamthiam loh. Cucaah a thinlung put cu Pathian thinlung put a ngei i a ziaza zong Pathian ziaza a keng.
Adam hrin paohpaoh nih cun nawlngailonak nun kha i chuahpi a si caah nawlngaihnak hi an ngei kho hrimhrim lo. Asinain Khrih in hrin a si mi paohpaoh cu nawlngaihnak nun kha thlarau hrin sinak in an i chuahpi mi a si ve caah nawlngaihlo nun kha a ngei kho ve hrimhrim lo. Galati 5:17 ahcun "Zeicahtiah kan minung sining nih a duhmi cu Thlarau nih a duhmi he khan aa ralchanh i Thlarau nih a duhmi cu kan minung sining nih a duhmi he khan aa ralchanh. Annih pahnih cu ral an si, cu a sullam cu tuah na duhmi kha na tuah kho lo, tinak a si" ati. Hi cathiang nih hin Adam nun le Khrih nun ral an sinak a langh ter. Cucaah Adam nun kan ngeih ahcun Khrih duhnak kan tuah kho bal lai lo i Khrih nun kan ngeih ahcun Adam nun a simi pumsa duhnak cu kan tuah kho fawn lai lo. Zumtu nih pumsa duhnak kan tuah tawnnak cu Thlarau nih a kan fialmi duhnak kha nawl kan ngaih duh lo ruangah kan tuah tawnmi a si. Thlarau duhnak a zulmi nih cun Pathian lung an ton khawh. Cu bantuk cu ti le thlarau in a hrin than taktak mi kha an si. Ti le thlarau in a hrin than taktak mi cu Thlarau hruainak kha an zulh caah Pathian he remnak an hmu i cu remnak nihcun Pathian Pennak chung ah lam a hruai hna. Cu cu cathiang nih zungzal nunnak kan phak khawhnak lam cu a si tiah a ti mi cu a si.
Adam nun cu chiatha thleidannak nih pumsa duhnak chung ah a hruai lengmang mi nunnak a si. Khrih nun cu Thiangthlarau nih Biatak chung ah a hruai lengmang mi nunnak a si. Zumtu nun kan si mi cu Khrih nun kha a si i zumlo tu nun kan ti mi cu Adam nun hi a si. Farasi pawl kha Adam nun nih a hruai hna caah Pathian lung an tong kho lo. Pathian cu an biak ko, sihmanhsehlaw an chiatha thleidannak hmang in anmah nih phung le phai an i tuahchom mi in Pathian kha an biak i Pathian fapa zisuh zumh kha an duh lo. Cucaa Rom 10:2 ahcun "Pathian a tanh ngaingai mi an si cu tehte ka khan khawh, sihmahsehlaw cu an tanhning cu palh tanh a rak si. Pathian nih zei lam in dah minung cu amah he a rem ter hna ti kha an hngal lo i anmah tu nih khan cu lam cu an i ser: cucaah Pathian ni minung cu Amah he a remter hnanak lam kha an cohlang duh lo." Adam nun ai hrawmmi nihcun Pathian cu anmah duhning in an tanh i cu an tanhnak nihcun Pathian a lawmh ter kho lo. Sihmanhsehlaw Khrih nun a ngeitu nih cu Thiangthlarau nih a kan hruai caah biatak in Pathian kan tanh i Pathian kan cung ah ai lawm. Khrih nun in Pathian kan lawmhter khawh nakhnga Thiangthlarau sawm hna usih law biatak chung ah nung hna usih. Bawipa nih khrih nun in Pathian he remak na hmuh khawh ve nakhnga thluachuahnak in pe ko seh.