Nihin kan vawlei ahhin zumtu phunnih in kan um. Cucu Biaknak minung le Khrih minung kan si. Mah pahnih sining hi a leng tahnak cun an i lo taktak nain chunglei ahcun fak taktak in dannak an ngei. Cathiang nih theipi hmangin tahchunhnak a lak pah lengmang. Theipi hi phunhninh a um ve. Theipi veve an si ko nain pakhat cu a thei ei awk tha in a um lo lio ah pakhat cu ei tikah nunnak a si. An leng zohnak cun theitha nak hmanh zong in theichia nih zoh a co deuh tawn. Asinain a chung van hlai tikah theichia cu herhte le fihnung in a khat. Theitha cu a leng in duh a nung tuk lo nain a chung van hlai ah paw a khim ter tu le nunnak theitha a si.
Cathiang nih Farasi pawl nun le Zisuh Khrih nun an i dannak kha fiangtein a kan cawnpiak. Farasi pawl nun nih cun biaknak minung sinak (lenglei zohnak in le hmuhnak ahcun mi tha ngai lawh tung i chunglei in ruahnak thalo in khah) kha fiang tein a langhter i khrih nun nih cun Pathian lung a tongmi sinak (Chunglei nun ah Bawipa a tihzah i leng zong ah Bawipa sunparnak a langh ter mi) nun kha fiang tein a langhter.
Minung lungton i zuam in le Zisuh min i put in mah sunparnak lawng a kawlmi zumtu pawl khi biaknak minung an si. An chung taktak in Pathian kha an dawlo i a nawl an ngai kho lo. Asinain minung hmai ahcun an kaa in Bawipa a tha an i ti i Pathian thatnak cu an chim lengmang. Minung hmai ah duhnung ngai in an i um ter i a thli in thil tha lo an tuah zungzal. A thli in in an tuahmi nih zeizong vialte hmutu Pathian kha an tih taktak lo ti kha a langh ter. Biaknak minung nih cun biakinn taktak (Pathian sakmi) a si mi an pum) kha daw lo le upat tung lo in minung sak chommi biakinn tu kha an sunhsak deuh. Sihmanhsehlaw an pum thiangthlarau biakinn tu cu nu le pa sualnak, zuu, kuak le din einak phunkip ah an hman i an hrawh zungzal.
Khrih minung tu nih cu minung lungton nakin Pathian lungton an i zuam caah anmah duhnak kha an kaltaak i biatak cawnpiaknak tu kha an zulh deuh. Khrih ruangah Pathian kha an dawt i a nawlngaih kha a duhnak ngan bik ah an i chiah. Khrih minung nih cun Pathian cu liangan tukmi tihzah awktlak a si ti kha kan hngalh caah an tizah an i upat i a thli in zeihmanh an tuah ngam lo. Kan pum cu Pathian nih amah sunparnak caah a kan hlanhmi a si ti kha an hngalh caah minung sak chommi biakinn lawng ah Pathian kha bia lo in an umnak kip ah an pum thlarau biakinn hmangin Pathian kha an biak in an thangthat i upatnak an pek. An chung i a nungmi Khrih ruangah dawtnak nih a uk hna caah inn khawhnak an ngei i an kalnak kip ah Pathian sunparnak a lang.
2 Timote 3:5 ahcun "kan biaknak phung hi a lenglei in an i tlaih lai, sihmanhsehlaw a chung i a ummi thawnnak taktak kha cu an duh lai lo, cu hna cu hrial i zuam hna." tiah kan hmuh. Biaknak minung nih cun Pathian cu an biak ve ko nain anmah nih a tha an tining le an siarem ning in an biak caah biatak cawnpiaknak nakin anmah duhnak tuah kha an i thim deuh. Sihmanhsehlaw Khrih minung nihcun mah sunparnak nakin Pathian sunparnak pek kha an duh deuh caah an duhnak kha hlaw in Pathian duhnak tu kha an i thim deuh zungzal. Biaknak minung nihcun thluachuahnak kha an i thim i khrih chung i a nung mi nihcun thluachuah nakin thluachuah a ngeitu amah Pathian kha an i thim zungzal. Hihi biaknak minung le khrih minung sinak an i dannak cu a si. Biaknak phung nihcun Pathian he remnak a ser khawh lo caah Pathian remnak lawngin hmuhmi zungzal nunnak cu an co lai lo. Sihmanhsehlaw khrih nun ngeihnak nihcun Pathian he remnak a ser i Pathian fa ah a kan can ter. Cucaah Pathian fa le caah chiahmi zungzal nunnak cu Khrih minung sinak lawng in co khawh a si. Cucaah biaknak minung maw na si, khrih minung dah nan si? Bawipa nih a bia kan zaate caah thluachuahnak a pek cang caah kan Pathian a min thangthat si ko seh.