Dawtnak Taktak

Dawtnak taktak

Dawtnak kan ti tikah Pathian sin in a ra mi dawtnak le minung kan sinak kan thinlung in a ra mi dawtnak tiin phun hnih a um. Pathian sinin a ra mi dawtnak cu minung nih kan ngeih cio mi dawtnak he an i khat lo. Mi vialte hi kanmah le kan si khawhning cio cun dawtnak hi kan ngei dih cio hna. Sihmanhsehlaw minung kan i dawtnak cu duhdanhnak a ngei I dawtu lawng dawt khawhnak phun khi a si. Johan 3:16 ahcun Pathian nih vawlei hi a dawt hringhran caah a fapa ngeihchunte kha a pek ti kan hmuh. Cu ti a kan pek cu kan I hlawhnak a um ruangah siloin nawl ngai lo in misual kan si ko lio ah fapa ngeihchun hmanh ui lo dawtnak phun khi a si. Minung nih cun kan hawi le a kan dawtu cu kan dawt khawh cio ko hna nain a kan daw ve lo mi le kan ral a si mi hna cu kan daw kho hna lo. Asinain Pathian tu nih cun a ral kan si ko lio ahkhan kan caah a nunnak a pek khawh. Ral tiang dawt khawhnak dawtnak phun hi cathiang nih a kan cawnpiak mi Pathian dawtnak cu a si. Dawt ai hlawhmi dawtnak cu a fawi nain dawt ai hlawh lo mi dawt cu a har ngaingai. Cucu Pathian sin in a ra mi dawtnak lawng nih a tuah khawhmi phun a si.

Pathian cu dawtnak a si caah zumtu taktak a si mi nihcun Pathian dawtnak hi kan ngeih hrimhrim awk a si. Cu dawtnak kan ngeih lo ahcun zumtu kan si rih lo ti nak a si. Nihin zumtu ai ti mi kan nun zoh tikah a zumh lei cu biapi Ngai ah kan chiah nain zumhnak chung in a luangmi dawtnak taktak ngeih hi kan tolh lengmang hna. Dawtnak in Pathian nih a fapa ngeihcun kan pe hlah sehlaw zumh ding kan ngei hnga lo. Cucaah zumhnak cu dawtnak in kan hmuh mi a si ti kha fiang tein a lang. Cucaah mi zeihmanh nih zumhnak kan ngei kan ti ahcun dawtnak ah a langh hrimhrim awk a si. Cu cu minung hawi dawtnak siloin amah Pathian hrimhrim dawt khawhnak phun khi a si. Pathian cu amah sin in a ra mi dawtnak lawngin dawt khawh a si. Johan 14:15 ahcun nan ka dawt ahcun ka nawlbia hi nan zulh hna lai a ti. Cucaah Pathian dawt cu a nawl zulh hi a si ko. Pathian nawl zulh cu zumtu taktak ca lawng ah a si kho. Zeicatiah zumhnak thawngin Pathian dawtnak kha an chung ah a um caah a si. Pathian dawtnak nih cun tuah khawhlo mi a ngei lo.

1 Johan 4:8 I kan hmuh mi cu dawtnak a ngeilo mi nihcun Pathian kha an ngei lo, zeicahtiah Pathian cu dawtnak a si a ti. Cacaah mi pakhat nih zeitluk hmanh in Pathian cu ka zumh ko a ti zong ah Pathian a dawt tung lo ahcun a zumhnak cu pakpalawng a si ko. Dawtnak ai tello ahcun zei bantuk thil tha kan tuah mi hmanh hi Pathian thinlung ah pakpalawng an si dih. Kan tuah mi vialte Pathian thinlung I rim a hmui ter tu cu dawtnak a si. Kolose 3:23 ahcun zeithil nan tuah hmanh ah Bawipa caah ka tuah ti mi lungput ngei in nan lungthin dihlak in tuan u a ti. Zumhnak thawngin kan chung ah a um mi dawtnak nihcun zeithil kan tuahmi hmanh hi Bawipa caah ti mi lungput a kan ngeih ter caah kan ruahchannak zong hi minung sinin si lo in Bawipa sin ah ruahchannak a kan ngeih ter caah aho sin hmanh ah lungdong lo le thinhunnak um lo tein a kan um ter khawh.

Zumhnak a ngei i Pathian a daw taktak mi nih cun a minung hawi cung zong ah zaangfahnak thinlung a ngeih caah a ral tiang dawt khawhnak dirhmun kha a chung i a nung mi Pathian dawtnak thawngin a ngei kho. Minung thinlung in a chuakmi dawtnak nih cun a dongh tiang dawt khawhnak a ngei lo. Sihmanhsehlaw Pathian sin in kan hmuh mi dawtnak tu nih cun a dongh tiang dawt khawhnak a kan pek caah Bawipa caah zumh tlak nun a kan ngeih ter. Pathian sin in a ra mi dawtnak nihcun Bawipa caah sian lo mi a ngei lo. Fapa ngeihchun hmanh ui lo in pek siannak dawtnak phun hi dawtnak taktak a si caah Pathian nih amah a zumtu vialte cu cu dawtnak phun cu ngei hna seh law keimah hi ka dawtnak chung ah hawikomhnak ngei hna seh ti hi Pathian tinhmi a si. Dawtnak chung ah Pathian he hawikomhnak kan ngei kho cang maw? Kan ngeih khawh rih lo ahcun Thianghtlarau sawm hna usih law dawtnak taktak chung in nung cang hna usih. Bawipa nih dawtnak taktak na ngeih khawh ve nakhnga thluachuahnak in pe ko seh.