Harnak in hneksak na si cu

Thatlonak tuah awk i kan i mernak hnga lo i ralring dingah harnak in hneksak kan si. Harnak in hneksak na si tikah thatlonak na tuahnak hnga lo i ralring tuah! Thatlonak na tuahnak hnga lo caah harnak in hneksak na si.. Harnak in hneksak na si tikah zumhnak in na tei a hau, zumhnak in na tei tikah inkhawhnak na ngei, inkhawhnak na ngeih tikah ziaza ttha an pek, ziaza ttha nih cun ruahchannak an pek ve, ruahchannak na ngeihmi nih cun zeitik hmanh ah an deuh lai lo... Bawipa nih bia a kan kamhmi hi kan caah a ttha bik le a kan deuh ballomi biakamnak an si zungzal..

Jeim nih cun hneksaknak na cungah a tlum tikah mi vanttha na si tiah ati. Mi vanttha kan si nak cu zumhnak in hneksaknak cu kan tei tikah kan caah a ttha deuhmi thluachuahnak le lawmhnak kan hmai ah chiahpiak kan si caah asi. Peter zong nih hneksaknak nan cungah a tlun cu nan zumhnak hi a tak maw? taklo ti hngalhnak caah asi tiah a ti ve.. Hneksaknak na cung i a tlun tikah na ruah awk cu Pathian fa ka si caah hneksak ka si tihi na hngalhchih awk ah ka duhmi asi.. Pathian sinin hneksaknak kan cung i a tlun tikah tinhmi a um zungzal mi cu kan caah tthatnak, Thlarau in tthannak, taksa le thinlung in tthannak caah an si zungzal.. Hneksaknak kan cung i a tlun tikah Bawipa nih a kan kaltak ballo, kan herh ning in bawmtu asi zungzal. Amen!

  • Harnak in hneksak na si cu na zumhnak a tak maw, taklo? ti hngalhnak caah asi..
  • Harnak in hneksak na si cu na zumhnak afek maw, feklo? ti hngalhnak caah asi..
  • Harnak in hneksak na si cu na zumhnak asit maw, sitlo? ti hngalhnak caah asi..
  • Harnak in hneksak na si cu zumh awktlak, hngatchan awktlak, bochan awktlak Pathian asinak langhter a duh caah asi..
  • Harnak in hneksak na si cu tthatlonak na tuahnak hngalo caah asi..
  • Harnak in hneksak na si cu tthatlonak tuah awkah na mernak hngalo caah asi..
  • Harnak in hneksak na si cu Bawipa nih na dirhmun thlen an duh caah asi..
  • Harnak in hneksak na si cu Bawipa nih an tinhpiakmi chungah an hruai cang caah asi..
  • Harnak in hneksak na si cu Bawipa nih an tinhpiakmi tlinlainak ding caah asi..
  • Harnak in hneksak na si cu Bawipa nih Thlarau le thunlung in tthang seh ti an duh caah asi..
  • Harnak in hneksak na si cu taksa in thluachuah tlamtling na hmuhnak ding caah le thluachuah na hmuhmi relzia na thiamnak ding caah asi..
  • Harnak in hneksak na si cu na zumhnak a tthannak ding caah asi..
  • Harnak in hneksak na si cu zeibantuk harnak paohpaoh inkhawhnak na ngeih chinnak ding caah asi..
  • Harnak in hneksak na si cu a tu na sining hnak in attha deuhmi ruahchannak aum rih ko ti langhternak caah asi..

   Josef zong a unau hna nih an zuar, kum 11 chung sal sinak dirhmun in a um, kum 2 thong ah a tla, harnak tampi tonnak he hneksak asi ve. Sihmanhsehlaw hneksaknak caan a dih tikah Bawipa tinhmi caan a hung phan i Izipt ram a um kum 13 hnu ah uktu bawi a hung si (salm 105:17-19). Josef nih a mang vialte cu a hung tling diahmah i a unau rual le a pa le he a vision bantukin an van i ton cu Izipt ram kum 22 a um hnu ah asi. Chim duhmi cu Bawipa tinh ningin hneksaknak na in tikah na lung dong hlah, Bawipa nih a tinhmi caan a phak tikah cun na caah tthatnak le thluachuahnak lawngte an si te lai. Amah belte hneksaknak na in tikah na tluk sualnak hnga lo ralring tein Bawipa ttihzahnak he nun i zuam ko, Lungsau tein zumhnak in tei law inkhawhnak ngei ko, mah vialte hnu ah na zumhnak nih a hrinmi ruahchannak ruangah lungtthawnnak he hmai ah kal zungzal ko. Bawipa nih sunparnak co ko seh..
—-
JOB 36:21
Ṭhat lonak tuah awkah naa mernak hnga lo i ralring tuah, Zeicahtiah cu ruangah cun pei harnak in hneksak na si cu.