Nikhat cu a holh kholomi khuachiah nih a tuahmi pa Jesuh Khrih nih a damter i a holh khawh tikah mipi kha an khuaruah a har dih. Sihmanhsehlaw micheu nih an i thawh i khuachia a tthawl khawhnak cu Beelzebul tthawnnak in pei asi ko cu tiah an ti i Pathian Thlarau tthawnnak in a tuahmi asi ti kha an zumh duh lo caah Jesuh Khrih cu Pathian sin in arami khuaruahhar tuah kha an fial. Beelzebul tthawnnak in si loin Pathian Thlarau tthawnnak tuin ka damter mi asi ti hngalhternak caah hi bianabia hi a chim hna. Voikhat cu mipa chungin khuachia a chuak i dinhnak a kawl lengmang, a hmuh lo tikah a rak chuahnak inn i kirtthan ding in biakhiahnak a ngei. A hung kir i inn cu thiang hirhiar tein a rak i thenh kha a hmuh tikah amah hnak in a chia deuhmi khuachia (7) kha aa sawm hna i a umnak tthing inn ah cun an um. Cucaah a hlannak in a dongh lei ah kha mipa kha a umtuning a chia deuh tiah a ti hna. Hi kong he pehtlaiin Pathian Thlarau tthawnnak tello in chikhat lung thlennak vialte hi cu pakpalawng men asi i chikhat lungthawhnak le sual kaltaknak cu Thiang Thlarau nih hmunhma a rawlh lo ahcun a hlan i an rak tuah tawnmi nunning hnak chia in Santan nih aa cit tthan ko hna lai ti khi a sullam cu asi.
Jesuh Khrih nih a bia kaakhat in khuachia a tthawl hna, azawmi a damter hna, a thimi a thawhter hna, kebei le mitcaw a damter hna i cucu a za lan ko. Amen! Jesuh Khrih nih damtermi le luattermi na si taktak ahcun Jesuh Khrih thisen nih voikhat ah zalak in na sual an ttawl piaknak le an luatternak ah hin a za ko. Sual tuah poah ah thah lengmang ahaumi caw thi si loin Amah thisen bak in dawh thianh kan si khah. Amen! A donghnak ah a chiah deuhmi nun a ngeimi cu khuachia bawi Beelzebul nih luattermi an si i Kei nih luattermi cu zungzal ca in zaalak in ka luatter mi hna hi an si ti khi Jesuh Khrih i bianabia sullam cu asi. Amen! Jesuh Khrih nih a rat hnawhmi cu nun hrawhchin awkah si loin kan nun tu a kan remh i a kan thianter. Amen! Sualnak chungah pilter chin lengmang dingah khamh si loin Zungzal Nunnak le vawlei kan nun chung i dawtnak le daihnak, lawmhnak kan hmuhnak hnga caah khamh kan si. Amen!
LUKA 11:26
Cun a va chuak i amah nakin a chia chinchinmi thlarau pasarih kha aa ratpi hna i cuka ah cun aa umpi hna. Cucaah a donghnak ah cun kha mipa kha a hramthawk i a sining nakkhan a umtuning a chia deuh," a ti.
Sihmanhsehlaw khuachia nih tuahmi pa bangin Jesuh Khrih Thawngtha na theih i ka zumh na ti hnu ah a hlan i na nunning hnakin a tu na nunning a chiat deuh ahcun na chungah a ummi khuachia a chuak rih lo tinak asi. A hlan i na nunning te na nunmi nih a langhtermi cu Jesuh Khrih nih Thlarau in hrintthan nan hau timi chungah tello in ruahnak hrintthan tu na si tinak asi. Zei ruangah mah bantuk Thawhgtha hi ka ttial lengmang ti ahcun kan miphun chungah hin a luat taktak ttunglo i a luat ngaimi bantukin a ummi ka tamtuk caah asi. Peter nih nal profet hna le cawnpiaktu hmanlo kong a ttialmi ahcun Hrintthan kaa tete foihnak ah khan pumsa duhnak an hman tiah a ti. Mi an cawnpiakmi kha luatnak nan hmu lai tiah bia an kamh hna nain an mah hmanh rawhralnak a phakpitu an ziaza sal an si i taksa duhnak kha an tuah peng ko rih tiah ati. Khrih vel cu ka caah a za tiin na duh poah na nun chung poah cu Khamhnak chungah si loin khamhnak tlang tuah naa vel tinak asi ko. A tu kan chan ah hin a ho dah kan nal profet le cawnpiaktu hmanlo cu asi ne: Nangmah te bak dawh na si khah! Na luat le luat tak lo cu mi nih zei an ti hmanh ah naa hngalh ko ttung. Na taksa duhnak sal na si rih chung poah cu Pathian sal si loin Satan sal tu na si rih ko kha a fiang ko. Hi thawngtha nih hin na nun in khek ve ko seh. Amen! Jesuh Khrih Khamhnak thawngtha theihnak thawngin a lung a van i lawm i chikhat a nunhlun a kaltak ttung i a nunhlun a kir hnawh tthanmi caah hin a va poi hringran dah, Uico nih a luat a kir hnawh timi le vok cu kholh hnu ah nawncek ah aa bual tthan timi phungthlukbia kha an cungah a hman ngaingai timi le Dinnak lam kha rak hngal lo lawlaw hna sehlaw an caah a tha deuh suamau hnga tiah Peter nih a rak chim mi hi nihin zumtu aiti mi tampi cung zongah a hman ngaimi asi ve.
2 PETER 2:19
Luatnak nan hmu lai, tiah bia an kamh hna, sihmanhsehlaw anmah hmanh kha, rawhralnak a phakpitu hna an ziaza sal kha an si — minung hi a teitu paoh sal a si ko.
2 PETER 2:20
Kan Bawipa le kan Khamhtu Jesuh Khrih an hngalhnak thawngin hi vawlei cung thurhnawmhnak in a luatmi hna cu, hi vawlei cung thurhnawmhnak nih khan a tlaih ṭhan hna i a tei ṭhan ahcun, a hramthawk i an rak umning nakkhan an donghnak cu a chia deuh.
Jesuh Khrih nih Pathian Thlarau tthawnnak in khuachia tuahmi pa a damtermi kong i an zumhlonak ruangah a lehmi hna cu minu nih a theih i a lung a tlintuk tikah nangmah an hring i an cawmtu nu hi zeitluk in dik aa lawmh hnga tiah thangpi in a au. Sihmanhsehlaw Jesuh nih a lehmi cu lawmhnak taktak cu nihin ka chimmi Pathian bia a thei i a ngaimi cungah hin lawmhnak a tam chinchin tiah a leh. Pathian bia a thei i a ngaimi cu mi zeidah asi ne: Jesuh Khrih cu Pathian fapa asi ti i a zum i Thlarau in hrintthanmi hna hi kan si. Amen! Khuaruah harnak tuah nan ka fial i ka tuah dingmi cu hi hi asi: Neneveh khuami hmelchunhnak cu Jonah asi bantukin a tu chanmi luatnak caah Mi Fapa hi hmelchunhnak ah taar ka si ve lai tiah ati. Sullam cu Nineveh khuami hna nih Jonah Thawngtha an theih tikah sual ngaihchihnak he buri khuh in nawlnak nih luatnak a pek hna bangin ka sinah a kirmi cu ngaihthiam an si ve lai ti hi asi. Amen! Nihin ni tiang sualnak a tuah pengmi le a zum duh lomi cu Biaceih ni ah Neneveh khuami hna le chimram siangpahrang Nu nih sual an in phawt hna lai. Chimram siangpahrang Nu cu Solomon fimnak ngeih duh ah ram hlapi in ara i a bia a hung ngeih. Mah fimmak let tampi hnak in man sung deuhmi zungzal Nunnak hmu dingah na ka kawl in ka aw theih ding le ka nawl ngaih dingah na ra cang ve lai lo maw? tiah Jesuh Khrih nih an sawm ve.... Bawipa nih sunparnak co ko seh....
LUKA 11:27
Jesuh nih hi bia a chim dih tikah hin mizapi lak cun minu pakhat a hung au i, "Nangmah a rak in hring i a rak in cawmtu nu hi zeitluk in dik aa lawmh," tiah a ti.
LUKA 11:28
Sihmanhsehlaw Jesuh nih a thawh i, "Pathian bia kha a thei i a ngaimi caah cun zeitluk in dik lunglawmhnak a si chinchin," tiah a leh.