Jesuh khrih tlunin na onh maw?

Bawipa Jesuh nih a kan fialmi cu Keimah nih kan dawt hna bantukin pakhat le pakhat i daw uh tihi asi. Nihin zumtu vialte nih kan i dawt awk asi timi cu kan chim cio ko nain kan i daw taktak ne maw tihi ruah caan aza cang. Kan i dawt cionak hi kan kaa lawng le kan tuahnak lawng cun a ngah lai lo. Caan tampi ahcun kan kaa hin biadawh le biattha kan chim, tuah awk zong kan tuahpiak ko hna hnga nain kan thinlung cun kan rak rem ziar tawn hna loh.  Cun minung vialte hmuh ah thilttha tampi a tuah bantuk cun kan tuah taktak ko nain kan thinlung hmutu cu Bawipa tthiamtthiam asi ko. Mi zei hmanh hi kan dawt tik hna ah kan chunglei le lenglei khat tein kan dawt hna awk asi. Ahlan zumtu hna cu khualtlung an rak dawt tuk hna, khualtlung dawtnak in thluachuah ham an rak thiam tuk. Lot nih vancungmi hna a rak hmuh hna tikah a inn ah an tlun hlantiang an hmai ah kun in arak nawl hna. Nihin zumtu vialte nih hin teh khualtlung le mileng, misifak le Pathian nih athlahmi Amah riantuantu hna zeitlukin dah kan dawt ve hna i kan inn ah tlung ve hna seh ti kan duh ve ning hi a si hnga? Khua chungmi pa dihlak nih Lot a khualtlung hna cu rak chuahpi hna law ihpi hna sih an rak ti lio ah hin a khual pawl chuahpi hna i an ihpi ding hna hnak cun a fanule pa ahngal rih lomi ihpi awk i chuahpi le pek hi arak ngamh deuh. 

Lot nih a timi cu ka innchungah a lut cangmi cu ka kilven bak hna awk asi tiin a khualtlung a dawt taktaknak hna cu arak langhter. Nang le kei nih teh khualtlung le mileng, mi sifak le Pathian nih athlahmi Amah rianttuantu hna hi zeitlukin dah kan dawt hna tihi fakpi in kan ruah can aphan cang. Khualtlung le mileng, mi sifak le Pathian nih Amah riantuantu ah athlahmi hna na dawt khawh ve taktak rih hna lo ahcun Bawipa ka zumh ko na ti lengmang rih ko hmanh ah nangmah ca lawng asi rih ko ti kha afiang. Zumtu taktak cu kanmah ca lawng nung ding si loin midang caah a nung ve dingin khamh kan rak si. Biatak cu Jesuh hi hmuh khawh awk in ara lai lo, tlunnak inn a hmu ve lomi khual sinah a ra lai, mileng sinah a ra lai, Pathian nih athlahmi Amah riantuantu hna sinah ara lai, mi sifak hna sinah ara lai, mah vialte tluninn kan onh hna lo ahcun kan dawt ve ko, kan timi Jesuh nih kan thinlung taktak cu fakpi in a kan hmuhpiak ve lai i biaceihni ah tluninn nan ka onhlo cu ta tiah ti kan si ve te lai. Khualtlung le mileng, Pathian nih athlahmi Amah rianttuantu hna le Mi sifak hna na dawt taktak khawh ve rih hna lo ahcun zumnak ah hngakchia te ka si rih ko hih tihi rak i hngal ve ko.

Nihin zumtu tampi cu kanmah le cang cun Pathian aduh ngaimi le adaw ngaimi kan i lawhter nain kan duh taklo le dawt taklo hi kan nun in kan langhter chin lengmang ko. Cucu Pathian rianttuantu hna le mi sifak hna, mileng hna le khual tlunin kan onh hna lonak hin kan langhter. Pathian kan duh taktak le kan dawt taktak ahcun khual  le mileng kan dawt hna awk, Pathian nih athimmi Amah rianttuantu le mi sifak hna hi innkaa kan onpiak hna awk  le kan dawt hna awk asi. Keimah bia si loin Jesuh nih a timi kan chimh hmanh lai muh: Keimah nih ka thlahmi hngakchia tluninn a onhmi nih Keimah tluninn a ka onh asi, Keimah tluninn a ka onhtu nih a ka thlahtupa tluninn a onh asi ati ve. Nang teh a hodah tluninn na onh  tawn ve? Pathian nih Amah rianttuantu ah thimmi hna tluninn na onh hna lo cu Jesuh tluninn ka onhlo asi ti hi rak i hngalh ve. Jesuh Khrih tluninn na onhlo ahcun Pathian tluninn na onhlo asi kha van i cinken ve.. Nihin kan miphun ah le biakinn kipah Thiang Thlarau rianttuannak a hulnak cu Jesuh Khrih nih a thlahmi hna Amah rianttuantu innka kan kharkanh tuk hna ruangah le lung lawm tein tluninn kan onh hna lo ruangah hin asi. Thiang Thlarau nih khua fakpi ruah khawhnak in bawm hram ko seh. Mah thawngtha na rel tik i na thin hna a hun ahcun Bawipa he kai hlat ngaingai cang hi ta ti zong hi rak philh hlah. Thiang Thlarau bawmhnak tein dawh mah thawngtha hna hi ka ttial ko hih.

Bawipa a daw taktak ka si maw, si lo? ti hngalh na duh ahcun mah tahfung in rak i tah ko. Mah tahfung hna hi na ngeih lo ahcun Pathian ka dawt ve ko na ti hmanh ah na kaa te asi ve rih ko ti kha a fiang ko lai. Jesuh nih azultu hna sinah a chim lengmang mi cu keimah nih ka thlahmi hna an bia angaimi paoh nih Keimah bia an ngaih asi, an hlawmi hna paoh nih Keimah an ka hlawt asi ati. Keimah a ka hlawmi paoh nih a ka thlahtu pa an hlawt asi tiah achim tthan. Nangteh Jesuh Khrih aduh ngai le adaw ngai lawh ttung i Amah nih athlahmi hna an bia angai duhlomi le a hlawmi ah naa tel ve sual maw? Jesuh nih a thlahmi hna an bia angailomi le a hlawmi na si ahcun Jesuh bia na ngaihlo le na hlawt asi kha rak philh hlah, Jesuh bia ngailo le hlawmi na si ahcun Pathian he kaa hlatuk ti kha i cinken cikcek. Pathian he nai hlat ko ahcun ka caah ruahchannak zeihmanh ka ngeilo ti kha rak i fiang rih. Mah le mah i hngalhnak  tahfung hin van i tah ve hmanh law mi zeidah na si kha na hngal ko lai:

  • Bawipa a daw taktak mi na si ahcun khualtlung le mileng a dawmi na si hrimhrim ko lai. Khualtlung le mileng a remlomi cazin chungah naa tel ve rih asi ahcun nangmah le nangmah kha zei ngai te ka si rih lo hih tiah rak i hngal ko...
  • Pathian ka dawt tuk tiah ttap lengmang hmanh law thleidannak thinlung na ngeih lengmang ko rih ahcun thukpi ka pil rih lo hi ta tiah rak i hngal ko...
  • Pathian hi kaa in si loin na lungthin taktak in a dawmi na si ko ahcun Pathian rianttuantu, Amah nih athlahmi le thimmi hna cu na dawt hrimhrim ko hna lai. Na ti khawh tawk tein Innkaa onhtu le bawmtu na si hrimhrim ko lai. Pathian riantuantu le  thlahmi innka kharkanhtu chungah naa tel ve ko ahcun zangfak ka si rih ko hih tiah rak i hngal ko. Attuh le asik an um cu ta na ti ko lai nain Bawipa nih chiattha thleidan khawhnak Adam sinin an peknak a hlan tuk cang caah Bawipa nih an pekmi chiattha thleidannak an pekmi kha rak hmang ko...
  • Pathian ka dawt ti lengmang hmanh law mi sifak le atlaumi cungah dawtnak thinlung taktak na ngeih ve rih lo ahcun na kaa te lawngin Pathian ka dawt ve rih tihi rak i hngal ve ko.
  • Pathian a daw ve taktak mi ka si na ti ko bu i Thiang Thlaarau riantuannak na lunghrin i na zumh khawh tak ve rih lo ahcun chambaunak tampi ka ngei rih tihi rak i philh hlah. Kan kaa in Thiang Thlarau ti chim thiam mennak in Thiang Thlarau riantuannak hi hngalh khawh asi loh, Thinlung innkaa onpiaknak le cohlan zia thiamnak lawngin ngeih khawhmi le hngalh khawhmi asi. 
  • Cathiang ka rel ngai ti ttung i Thiang Thlarau he hawikomhnak tampi na ngeih rih lo ahcun ralrinnak tampi rak ngei. Thiang Thlarau ngaihchiattertu na si sual lai. Baibal relnak tiang lawng hin Thiang Thlarau rianttuannak tling tein hngalh khawh asi lo. Amah he umttinak le hawikomhnak lawngin Thiang Thlarau rianttuannak cu hngalh khawh asi....

-----
LUKA 9:47
Jesuh nih an ruahnak kha a hngalh i cucaah ngakchiate pakhat kha a lak i a pawngah a dirter i
LUKA 9:48
annih cu, "Ka min in hi ngakchiate tluninn a onhtu nih keimah tluninn a ka onh a si, cun keimah tluninn a ka onhtu nih keimah a ka thlahtu tluninn a onh kha a si. Zeicahtiah nan lak i a hme bikmi cu a ngan bikmi a si," tiah a ti.

LUKA 10:16

A zultu kha a thawh hna i, "Nan bia a ngaimi paoh nih ka bia an ngaih a si, an hlawmi hna paoh nih keimah an ka hlawt a si, keimah a ka hlawmi paoh nih a ka thlahtu kha an hlawt a si," tiah a ti.

JOHAN 13:20

Biatak kan chimh hna: Rian ka fialmi tluninn a rak onhtu paoh nih keimah an ka onh a si, keimah tluninn a ka onhtu paoh nih a ka thlahtu tluninn a onh a si," tiah a ti.