Pathian thawngtha aupitu le ngaitu kannih cio zong nih kan hngalh a herhmi cu Baibal cawnnak kanngeih ah siseh cawnnak ngeilo in Thawngtha kan chim zongah siseh Thlarau tthawnnak le biataknak nih hin a kan zulh zungzal awk asi. Thawngtha chim hi a biapi tuk ko nain Thiang Thlarau tthawnnak nih a hnu in a zulh loah cun ngaitu thinlung ah thlennak zeihmanh a umter lo. Cucaah cun ngeih nuam men Thawngtha hnak in attha deuhmi cu Thiang Thlarau tthawnnak he chimttimi Thawngtha hi a biapi bik. Thawngtha chim thiamnak hnak in a biapi deuhmi cu Bawipa nih a tthawnnak he thluachuah a pekmi Thawngtha hi a si. Amen! Cucaah cun Jesuh Khrih kong Thawngtha kan phuan cio tikah hin kanmah duhnak le cawnnak menmen in maw kan chim, Thiang Thlarau hruainak le duhning in dah kan chim ti hi kan izoh tthan lengmang cio awk asi i kan thawngtha hi Bawipa nih thluachuah a pe ve maw ti hi kan zohthan lengmang awk a herh. Kebeipa zong Johan le Peter nih Jesuh Khrih min tthawnnak in damter asi tikah mipi cu an khuaruah a har tuk ciamman i Peter le Johan an zoh ning hna kha a hman ti lo ti kha Peter nih a hmuh hna tikah a thawh hna i mah kebeipa damter asi ruangah hin, nan khuaruah ahar i ar ko cun kanmah lehlam cu nan kan zoh. Kanmah tthawnnak le thil ti khawhnak in kan tuahmi le damtermi asi ttung lo, nan rak zumh lomi le vailam ah nan rak thahmi Jesuh Khrih Min tthawnnak in pek damter asi cu tiah mipi cu a rak leh hna. Amen! Cucaah cun mikip nih kan hngalh a herh taktak mi cu Jesuh min le A Thawngtha zumh hi tthawnnak le damnak, luatnak, zungzal nunnak aum ti hi kan i cinken ve cio awk a si. Halleluijah. Amen!
Lalmkaltu 3:16
Hi kebeipa thazang a petu hi amah min ṭhawnnak cu a si i atu i nan hmuhmi le nan hngalhmi hi amah min zumhnak thawngin tuahmi a si; hi bantukin nan hmaika ah a damtertu hi Jesuh min zumh hi a si.
Pathian cu Thlarau asi i Hrinthannak ka hmu cang atimi le zumtu ai timi poah nih cun Thlarau le biatak bak in biak a herhmi Pathian asi hi kan hngalh a herh. Amen! Cucaah Pathian cu Thlarau kan ti lengmang mi hi asi i Pathian duhning in kan thangthat kan biak khawhnak dingah cun pei Khrih cu kan caah a thih i thih hnu thawhtthannak in Van a kai hnu ah Thiang Thlarau cu kanmah bawmtu dingah le Pathian duhning in kan biak khawhnak dingah a vun thlah fom cu. Amen! Van fianter kan duh chihmi cu zumhnak in hrintthannak kan hmuh hnu ah hin Thlarau tthawnnak nih a zulh awk le lam a kan hruai awk asi. Amen! Ataktak le ngaingai tiah cun Thlarau in Hrinmi lawng pei Hrintthan taktakmi cu kan si ko cu tiah! Pathian cu Thlarau asi i Thlarau le biatak (Jesuh nih ratpimi cu vel le biatak hi asi) lawnglawng in biak khawh asi hi rak i cinken ve mu! Kanmah zuam tthawnnak menmen si loin Khrih Thlarau tthawnnak in nikhat hnu nikhat kan tthan i kan tthawng chin lengmang ding khi asi. Amen! Mah vialte hi minung nih tuah khawhmi asi lo caah kan biakmi kan Pathian nih zeidah a kan duhpiakmi le tinpiakmi asi tihi a nawlngeihnak he kawl cio in Bawipa sin ah bawmh hal ko hna usih. Amen! Thlarau le Biatak in kan Pathian cu biak ahaumi Pathian asi! Khrih Thlarau na chungah a um cang maw? Bawipa Thlarau nih in pemhter cio ko hna seh.
Johan 4:24
Pathian cu thlarau a si i a biatu hna nih cun thlarau le biatak in an biak awk a si,” tiah a ti.