Hmunzakip ah aithekmi ka miphun, unau vialte hna Bawipa nih nan umnak cio ah a dawtnak thukchin in inhngalhter ko hna seh. Ka hngakchiat tein Jesuh Khrih hi Pathian fapa, vailam cungah ka sualnak vialte a thihpitu asi i thawhtthannak he nunnak a ka serpiaktu asi tihi ka rak zumh lengmang ve ko nain Khamhnak tling taktak ka hmuh, Thiang Thlarau ka chungah a um ka hngalh cu Pathian ka Pa nih a ka chimh ningin kum (27) na si ah Khamhnak na hmu ti ka si. Amen. Nangteh na biak lengmangmi Pathian nih zeitik ah dah na hrintthan an ti ve? An chim ve cang maw? Mah thawngtha areltu tampi zong hi keimah bangin Jesuh Khrih ka zumh ko tiin Khamhnak taktak hmu loin le Thiang Thlarau angeilomi na si kho ve men ko dah kaw, minung tampi cu kan zumh kan ti lengmang ko nain kan zumhmi Jesuh Khrih nih a pum hrimhrim in a dirhmi kan pum, Amah biakinn hi Amah um loin midang an um rih ko. Kan pum hi Pathian nih Jesuh Khrih in Amah umnak inn ah asermi biakinn asi nain Amah Pathian umlo in midang tu kan umter tawn. Biatak cu na zumhnak in na zumhmi Jesuh Khrih hi Thiang Thlarau in na chungah aum cang na hngal maw? Na hngalhlo ahcun na chungah aum rih lo bia asi ko lai. Jesuh Khrih hi Thlarau in kan chungah aum cu chimlo, hling hmete nih a kan chunh hmanh ah a celh in kan celhlo i kan chungah hling a um cu mi nih chim haulo in kanmah tein kan hngalh ko dah kaw... Nang zong Pathian nih Amah umnak hrimhrim ah a sermi na pum chungah hin ahodah a um na hngal cang maw? Na pum chungah aum dingmi hi Thiang Thlarau, Bawipa Jesuh le Pa Pathian bak an um awk asi. Amen...
Jesuh Khrih nih lamkaltu hna a rak cawnpiakmi hna cu nannih cu misurnge nan si tihi asi. Amah belte cu misurnge ah hin phunhnih in nan um i phunkhat cu thei atlailomi (misurnge car) nan si, phunhnihnak cu thei atlaimi (misurnge) nan si ati. Nang thei atlaimi nge maw na si? Thei atlailomi nge dah na si? Chimchih ka duh lengmang mi cu thei atlailomi paoh cu mei chungah peih nan si lai tihi cawnpiak lengmang kan si nain nihin zumtu aitimi tampi hi theitlai cu chimlo, zumtu kan si le silo hmanh midang caah kan langhter kho ngaingai loh. Thei tlainak hi nangmah na tlai hmasanak in midang sinah a tlai chin ding khi asi. Biatak cu Jesuh Khrih nih vawlei ah taksa in a um lio ah a cawnpiak lengmang mi hna cu thei nan tlai awk asi tihi asi zungzal. Minung vialte hi Jesuh Khrih um hlah sehlaw vawlei ah a um dingmi pakhat hmanh kan um lo. Zei caah tiah cun minung vialte ser kan si hi Bawipa Jesuh Khrih caah ser kan rak si. Jesuh Khrih nih Misur ruang taktak cu Keimah hi ka si i nannih cu ange nan si tihi asi. Aruang a um lawng ah age a um kho mi kan si i aruang nih cun ange hi thei tampi tlai seh ti a kan duhpiak zungzal. Theitlaimi thinkung khi zoh lengmang law thinkung note khi theitlaimi asi ballo i puitling thinkung lawng nih thei atlai tawn. Cubantukin minung fa angei lengmang mi hna khi hngakchia si loin nutling sinak aphan cangmi hna nih an hrin ve. Thlarau in theitlaimi na si khawh ve nak ding ahcun a tu na sining hin si loin Thlarau in nutling le patling sinak na phanh lawngah thei na tlai kho ve hnga. Sihmanhsehlaw abiapi tukmi cu Jesuh Khrih nih achim lengmang bangin Amah he kan i peh lawnglawng ah asi kho mi asi. Bawipa Jesuh he kan ipeh hnu ah duhsah, duhsah in kan tthang i nutling, patling sinak kan phanh tikah thei kan tlai arak si deuh. Nang zeitindah theitlai naa timh?
Nihin zumtu vialte nih kan thinlung ah kan chiah ngaimi le kan ruah ngaimi cu Baibal kan rel tuk ruangah le thla kan cam tuk ruangah, rawl kan ulh tuk ruangah, Baibal sianginn kan dih ruangah thlarau in puitling kan si lai tiah kan zumhmi hi kan thlen caan a phan cang tiah ka ruah. Biatak cu kan tuahmi kan tuah tuk ruangah Bawipa nih thlarau in puitling sinak a kan pek si loin Bawipa Jesuh he thlacamnak in hawikomhnak kan ngeih lengmang ruangah le Thiang Thlarau he hawikomhnak kan ngeih lengmang, Pathian he hawikomhnak kan ngei lengmang ruang tu ah Thlarau in puitling sinak kan phanh asi deuh. Kan tuahmi kan tuah lengmang ruangah Pathian he hawikomhnak tiang kan phan lo bantukin Thiang Thlarau he hawikomhnak tiang zong kan tuahmi kan tuah ruangah kan phan hlei lo. Sihmanhsehlaw kan zumhnak he kan fuhpanhmi tuahnak ruang tu ah arak si deuh. Zumhnak in tuahmi tuahnak le tuahnak in Pathian lungton zuamnak tuahnak cu tampi ai dang. Bawipa Jesuh zumhnak he pehnak in hawikomhnak tiang kan phanh lo ahcun zeitik hmanh ah Thlarau in nutling, patling sinak kan phan kho hrimhrim lai lo tihi ralttha tein chim ka duh. Cawnnak sangsang kan ngeih ruangah le Baibal sianginn kan kai ruang zongah, rawl kan ulh lengmang ruangah puitling sinak kan hmuh si lo in Bawipa Jesuh he hawikomhnak tampi kan ngeihnak lawnglawng in thlarau in nutling, patling sinak kan hmuh arak si. Bawipa Jesuh he hawikomhnak tling kan ngeih khawhnak dingah cun zumhnak in le Thiang Thlarau hruaining in Baibal relnak, Amah he tontiang thlacamnak, Thiang Thlarau hruainak in rawlulhnak, Bawipa fialning in cawnnak hna zong cu kan tuah a hau ve thotho. Bawipa Jesuh he hawikomhnak tling tiang a phan lomi nih Pathian rian kan tuan ve mi zong hi tthawnnak nih cun a kan zul bal lai lo. Biatak cu Pathian hi tthawnnak in a khatmi Pathian asi i Pathian kan Pa he hawikomhnak tling na ngeih ko ahcun na kalnak ah a kal ve lai i na tuahmi paoh an tuahpi ve tik ahcun Amah tthawnnak hmang loin a um kho hrim lomi Pathian asi.
Maw ka unau taktak asi mi chimh kan duhmi cu Bawipa Jesuh he pehnak in hawikomhnak tling na ngeih ve rih lo ahcun Bawipa he zumhnak in i peh hmasa ulaw pehnak na ngeih hnu ah zumhnak in hawikomhnak ngeih duh tu ah Baibal rak rel law, zumhnak in Amah he tonnak in hawikomhnak ngei ding in thla rak cam, zumhnak he Amah he umtti dingah rawl rak ulh ko. Ka chim lengmang mi cu na tuahmi na tuah ruangah Bawipa nih an cohlan le an ton, bia an ruah in hawikomhnak nan ngeih si loin na zumhmi Amah he pehnak thawngin tonding tiang thla na cam ruangah an cohlan i an ton asi deuh, na zumhmi Amah he bia ruah ding in Baibal na relmi ruangah bia nan i ruah asi deuh i na zumhmi Amah he hawikomh ding in rawl na ulh ruang tu ah hawikomhnak nan ngeih a rak si deuh. Bawipa Jesuh thawngin Pathian Fa cohlanmi le ka fa tiah Pathian kan Pa nih auh vemi keimah nih thazang pek kan duhmi cu Bawipa nih an chimmi le an fialmi na theih bak tiang a hmai ah kunnak in hawikomhnak tuah zungzal ko. Biatak cu kan Pathian hi fiang tein bia achim zungzal mi Pathian asi. Pathian nih bia an ruah ahcun na hngalh hrimhrim ko lai. Hngalhlo awk tthalo in ahodah asi zong an chimh hrimhrim lai caah Pathian na ton i bia an ruah tiang, Bawipa Jesuh he hawikomhnak na ngeih tiang, Thiang Thlarau nih an umpinak na ngalh tiang zumhnak in Bawipa hmai ah kun zungzal ko tiah kan sawm.
- Dum ngeitu cu Pathian asi, Mitsur ruang cu Jesuh asi. Mitsurnge cu Minung kan si.
- Thei atlailomi Mitsurnge car le Jesuh chungah aum lomi cu zumlotu an si.
- Thei atlaimi mitsurnge cu zumtu, Jesuh chungah aummi kanmah hi kan si.
- Zumhnak in Jesuh kan peh, Thiang Thlarau toihnak in Jesuh nih a kan peh ve.
- Zumhnak in Jesuh kan pehnak lawngin thei kan tlai kho lo i Jesuh nih Thiang Thlarau in a kan peh ve lawngah thei kan tlai kho. Kan zumh timi lawngin si loin kan zumhmipa nih kan zumhnak a kan cohlannak ah Thiang Thlarau kan hmuh ve awk asi.
- Thei kan tlai khawhnak taktak cu Jesuh chungah kan umnak le Jesuh kan chungah umnak hin asi lai. Jesuh kan chungah umkanak hin si loin Thlarau in puitling sinak kan phanh hnu tu ah thei tampi taktak cu kan tlai te lai.
- Ahohmanh Jesuh chungah aum i Jesuh a chungah aummi cu thei atlai khomi cu kan si. Pathian kan chungah aum i Pathian chungah kan um ti fiang tein kan hngalhnak cu Thlarau a kan pekmi ah hin asi. Thlarau a kan pekmi ah hin asi ka ti tikah kanmah thlarau khi chim duhmi si loin Pathian Thlarau, Jesuh nih a kan toihmi Amah Thlarau, Pathian kan pa le Pa nih Fapa a kamhmi Thiang Thlarau a kan toihmi hi ka chim duhmi asi. Thiang Thlarau kan chungah aumnak hin thei atlai khomi cu kan si.
- Pathian kan chungah aum ning cu hitihin asi: Jesuh nih Pathian cu Nangmah le Keimah cu pakhat kan si bantukin Keimah cu Nangmah chungah ka um i Nangmah zong Keimah chungah na um caah Kei, a ka zumtu vialte an chungah um ning law Nang ka chungah um tuah, cu thawng cun kan chungah an um kho lai i pakhat taktak zong an si kho lai tiah Pa, Pathian cu Fapa nih a rak nawl. Jesuh Khrih cu kan chungah aum ahcun Jesuh chungah Pathian aum caah kan chungah an umtti tinak asi.(Johan 17:21-23)
- Jesuh nih ka chung i nan um i ka bia kha nan chungah ahmunh ahcun thei tampi nan tlai lawng hmanh si loin nan ka halmi paoh nan hmuh ko lai tiah ati.
- Jesuh nih ka chungah nan um peng lawngah thei tampi tlai khomi nan si lai i ka bia kha nan chung i ahmunh lawngah nan ka halmi paoh cu nan hmuh lai tiah ati.
- Ahmun dingmi thei tampi kan tlai khawhnak ding cu Jesuh chungah kan umnak le Jesuh Khrih bia kan chungah a hmunhnak thawng hin asi lai. Jesuh Khrih chungah umnak lawngin si loin Jesuh Khrih bia zong kan chungah a um ve le a hmunh ve ahau taktak.
- Jesuh chungah le Pathian chungah kan um ti kan hngalhnak cu Pathian Thlarau, Khrih Thlarau, Thiang Thlarau kan chungah aumnak hin asi. Anmah chungah kan um ve ti kan i hngalhnak zong cu Thlarau a kan pekmi thawng lila hin kan hngalh khawh ve.
- Zei cu dah Jesuh Bia kan chungah a hmun ding cu asi hnga? Jesuh chungah kan um lawng si loin Abia kan chungah ahmunh ding bia hrimhrim aum. Zei bia ko dah asi hnga?
- Cu Bia cu Jesuh nih "Keimah nih kan dawt hna bantukin pakhat le pakhat i daw uh" a kan timi hi asi. Jesuh nih a kan cahtakmi bia hi kaa in chim thiamnak le tuahnak in kan tuah khawhmi dawtnak tiang lawng khi si hrim loin thinlung taktak in Thiang Thlarau nih a kan bawmhnak thawngin aluangmi DAWTNAK, ruahchannak ngeibaklo in langhtermi DAWTNAK taktak hi a chim duhmi cu asi.
- Cucaah cun pei Paul zong nih anganbik ah achiahmi cu "DAWTNAK" a rak sinak kha asi cu... DAWTNAK na ngeih lo ahcun zeizong vialte hi pakpalawng asi ko ati lengmang nak kha asi fawm cu...
------
JOHAN 15:1
"Mitsur ruang taktak cu keimah hi ka si i dum ngeitu cu ka Pa a si.
JOHAN 15:2
Thei a tlai lomi ka nge vialte kha a tan dih hna i thei a tlaimi nge vialte kha an tlai chinchin nakhnga a thianh hna.
JOHAN 15:4
Keimah ah hin i peh u law kei zong nanmah he kaa peh ve lai. Mitsur nge nih amahte in thei a tlai khawh lo i a ruang ah aa peh lawngah a tlai khawh bantukin nannih zong keimah chung i nan um lo ahcun nan tlai kho ve lai lo.
JOHAN 15:5
Mitsur ruang cu keimah hi ka si i a nge cu nanmah hi nan si. Ahohmanh ka chungah a um i kei zong a chungah ka um ahcun, amah cu thei tampi a tlai khomi cu a si; zeicahtiah keimah loin nan tuah khawhmi zeihmanh a um lo.
JOHAN 15:6
Ka chungah a um lomi cu mitsur nge car bantukin lengah hlonh an si ko. Cu bantuk nge cu an pumh hna i mei ah an paih hna i cuka ah cun an kang dih.
JOHAN 15:7
Ka chung i nan um i ka bia kha nan chungah a hmunh ahcun, nan duhmi paoh kha nan ka hal lai i nan hmuh ko lai.
1 JOHAN 4:13
Kannih cu Pathian chungah kan um i Pathian cu kan chungah a um ti fiang tein kan hngalhnak cu Thlarau a kan pekmi ah hin a si.
1 JOHAN 2:27
Sihmanhsehlaw nannih cu Khrih nih a Thlarau kha an toih cang hna. A Thlarau nan chung i a um paoh ahcun ahohmanh cawnpiaktu nan herh hna lo. Zeicahtiah a Thlarau nih cun zeizong vialte kha an cawnpiak hna i an cawnpiakmi hna cu biatak a simi kha a si, ahmaan lomi a si lo. Cucaah Thlarau cawnpiaknak kha zul u law Khrih chungah cun um camcin ko u.
1 JOHAN 2:20
Sihmanhsehlaw nannih cu Khrih nih Thiang Thlarau kha an toih hna caah nan dihlak in biatak kha nan hngalh.