Bawipa Pathian nih Israel mi hna ramcar chung i a rak hruai hna tikah hin a rak i tinh bikmi cu khuaruahhar thil tikhotu Pathian asi nak langhter hi a rak si. Sihmanhsehlaw a chuahpimi hna Israel mi nih cun an rak i hngatchan ngam hrimhrim lo. Ti a um lo tikah Izypt ram an ngai tthan i Izypt ram nih zeidah a rak pek hna kha an chim tthan lengmang. Ti um lonak Ramcar chung i nithum an kal hnu ah cerhkha a umnak hmun kha a phan i ti cu a khaat caah an ding kho lo. Cu tikah Moses cu an zai hnawh i zeidah kan din lai? tiah an ti. Sihmanhsehlaw Pathian nih a tinh taktak mi cu cerhkhaa an phak ah siseh ti a um lonak hmun an phak ah siseh ei awk rawl an ngeih lo tikah siseh sa hawt in ei an duh tikah siseh mah vialte Pekhotu an Pathian ka si hi hngal hna sehlaw lung lawm tein Bawipa na thimmi miphun na fale hna hi kan dang a car cang, kan ti a hal cang, kan rawl a ttam i sa kan haw cang tiin khuaruahhar thil tikhotu Keimah Bawipa Pathian sinah an thinlung dihlak he an au tikah Izypt ram i khuaruahhar ka tuahpiak hna bantukin khuaruahharnak phunzakip he a thimmi a miphun diriamter hi arak si... Sihmanhsehlaw Israel mih nih cun an Pathian hi an rak hngatchan in an i bochan ngam hrimhrim lo..
Cubantukin nihin zumtu vialte hna zong nih hin bochannak nun le ngatchannak nun taktak cu kan ngei ve lo. Kan tonmi harnak kip ruangah Bawipa sinah kan zai tawn. Harnak nih maw? Lungre theihnak nih maw? Dam lonak nih maw? Sifahnak nih maw? Ngeihchiatnak nih maw? Thihnak nih maw? a kan tlunh tikah Khuaruahhar a tuah tawntu kan Pathian nih kan cungah khuaruahhar tuah a duh tthan ko hih timi zumhnak in bochannak nun ngeilo in kan Pathian sinah kan zai tawn i a kan timhpiakmi thluachuahnak vialte kan sung tawn. Zeitik caan paoh ah Bawipa nih hin kan caah a ttha lei in khua a kan khan piak zungzal ko timi hi philh hrmhrim hna hlah usih.. Vuivainak nih hin Pathian a lawmhter ballo i Bawipa nih zei thil dah a tuah tthan lai ti zumhnak in hngahnak nih hin khuaruahhar thil tikhotu Pathian asinak a langhter! Chim ka duhbikmi cu na duhlomi le na ttihmi na ton tikah na lung rak dong hrimhrim hlah, na Pathian nih khuaruahhar thil tuahpiak le a tu na si ning hnakin thilttha deuh tuahpiak an duh caah asi ti hi ka chim duhmi cu asi.. Na tonmi kipah Bawipa na Pahian nih zeidah ka cungah tuah a duh timi zumhnak he na hngah ko ahcun na dang a cer tikah na tihal diriamh tertu na Pathian asi lai i ngeihchiatnak na ton tikah hnemtu le na mitthli hnawttu na Pathian asi lai, harnak na ton tikah bawmtu na Pathian a sinak a langhter lai, lungre theihnak na cung a phanh tikah na thilrit changtu Pathian asinak a langhter lai, na rawl a ttam tikah an khimtertu na Pathian asinak a langhter lai. Amen.
Chim kan zuam lengmang mi hi na tonmi kipah kan Pathian nih zeitik hmanh ah a kan kaltak ballo ti hi asi. Kan Pathian nih khuaruahhar fakpi a tuah lengmang cu minung caah lam a pih caan ah hin a si tawn. Na caah hmailei kalnak lam a pih caan a um maw? phanghlah! Bawipa nih na cungah rianttuan a duh caah asi i lam dang an serpiak lai. Israel mi an hmai ah rilisen nih a kham hna i an hnu in Faro ralkap nih an dawi ve fawn hna tikah an caah luatnak lam a um lo nain Pathian nih rili sen a cheu i leiro in Israel mi vialte a kalter ko hna. Kan caah luatnak lamttha a ngeitu le a kutcak tthawnnak a langhter zungzaltu kan Pathian a min thangtthat si ko seh.. Kan Pathian cu ti din awk na ngeih lo tikah ti khaa hi ti thlum a canter khotu Pathian asinak a langhtertu asi lai. Bawipa kan Pathian cu na zumh i naa bochan peng ko i lungsau tein zeidah a ka tuahpiak lai ti na hngah ko ahcun na ngeihchiatnak a khaa mi cu lung lawmhnak a thlummi ah an serpiaktu na Pathian asinak a langhtertu asi lai. Amen! Na tonmi thilkip le na cungah a cangmi thil vialte hna hi na donghnak le an donghnak an si lo i cu cungah nawl a ngeitu cu na Pathian asi. Na Pathian hi na cung i nawl ngeitu asi ko ahcun na tonmi vialte pin lei ah hin ruahchannak a um ko, na hmuh khawh rih lo i na hngalh khawh rih lo hmanh ah ruahchannak a um zungzal ko. A donghnak ah cah kan duhmi cu na tonmi thil hi a donghnak an si loh, Bawipa nih na cungah rianthar ttuan a duh caah le a tu na sining hnak ttha deuh in thluachuah pek an duh caah le cawisan an duh deuh caah na tonmi an si timi hi cah kan duhmi cu asi.. Bawipa nih na tonmi kipah an umpi zungzal ko i thluachuahnak zong in pechin ko seh. Amen....
—-
EXODUS 15:22
Moses nih khan Israel mi cu Rili Sen khan a thawhpi hna i Shur ramcar chungah khan an lut. Ramcar chungah cun ni thum an kal i ti zeihmanh an hmu lo.
EXODUS 15:23
Cerh Khaa kha an va phan i a ti kha a rak khaat tuk caah an ding kho lo. Cucaah cun a min ah Cerh Khaa tiah an sak.
EXODUS 15:24
Moses cungah khan an zai i, "Zeidah kan din lai?" an ti.
EXODUS 15:25
Moses nih Bawipa sinah thla fak piin a cam i Bawipa nih cun thingtan pakhat a hmuhsak i cu thingtan cu ti chungah khan a paih i ti cu a khaat kha a lo. Cuka ah cun Bawipa nih zulh awk phunglam a pek hna i a hnek zong a hneksak hna.