Mah le mah teikhawhnak cu jesuh kan chung umnak hin asi!

Dawtnak kan ti lengmang mi hi Pathian sin in arami asi i minung nih ser chawmmi le tuah chawmmi asi hrimhrim lo. Cu dawtnak ruangah cun a Fapa kha kan sual ngaihthiamnak caah kan sinah arun thlah hi asi. Amen! Kan nih zumtu hna nih Patian kan dawt, kan duh, kan tlaihchan kan ti lengmang mi hna hi kan mah nih Pathian kan dawt hmasa mi si loin amah nih a kan dawtnak cu alanghter hnu lawnglawng ah kan dawt khawh ve nak le kan duh, tlaihchannak khawhnak cu asi. Khrih sin in adawtnak tling khitkhet tein alanghter bu hmanh ah hin Pathian duh ning in adawt zia kan thiam kho hrimhrim rih lo. Cu dawtnak tling khitkhet in kan ngeih khawhnak ding caah cun pei Khrih cu kan caah athih fawm cu. Amen! Khrih nih Thiang Thlarau bawmtu a kan pek mi nih cun dawtnak chung taktak ah cun a kan nunpi i nunzia a kan thiamter. Amen! Khrih tel loin dawtnak poahpoah cu donghnak an ngei i kan tuah khawh vial tiang lawng hi kan i dawtnak cu asi ko. Sihmanhsehlaw Khrih sin in arami dawtnak cu zungzal nunnak ca le zungzal hmunmi ca bak ah asi i aithleng hrimhrim bal lo. Amen! 

1 JOHAN 4:10
Dawtnak cu, Pathian kan rak dawt hi a si lo, amah nih a kan dawt i kan sual ngaihthiamnak caah a Fapa kan sinah a run thlah hi a si.

1 JOHAN 4:19
Kannih nih Pathian kan dawt cu Pathian nih a kan dawt hmasa caah a si.

Nihin i zumtu aiti mi vialte nih hin teh vawlei cu kan tei taktak maw? kan taksa duhnak nih maw a kan uk? Thlarau duh ning in dah kan nun? ti hi ruat caan acu cang. Kan nih cu Khrih kan zumhnak thawng in Pathian Fale tiah auh kan si i vawlei teitu ti zong ah auhmi kan si kan ti lio ko caan zongah hin kan mah siarem ning in le kanmah ruahnak, kan mah hmuh ning hi attha bik kan ti peng rih ko lo hme maw ti hi asi. Cu lawng hmanh si loin vawlei tei cu chim loin kanmah le kanmah hmanh kan i tei kho taktak hme maw? ti zong hi a ka ruahter caan atampi. Vawlei teitu si kan duh asiah cun kanmah le kanmah kan i tei hmasa le kan i uk khawh hmasa zong hi aherh taktak ve. Cun kan minung hawi nun thlen le khamhnak hmu ve hna seh ti kan duh bangin kan mah nun hi tling khitkhet in kan i thleng hmasa hi ahau ve. Cu hnu lawngah kan aupimi Nunnak Petu Thawngtha nih hmunhma alak khawh lai i kan phuanmi Thawngtha cu Bawipa nih Thluachuah a kan pek piak lai. Amen! Pathian nih kawh auh kan si tikah hin minung hawi an nun va tah len khi si loin kanmah nun tu remh le i tah pengtu hi arak si deuh. Cu ti cun kan nun kanmah le kanmah kan i tahnak le remhnak nih cun nunnak in chimmi Thawngttha cu achuahpi i mikip nih kan nun zoh in an lungthin ah Bawipa nih rian atuan. Amen! Sihmanhsehlaw kanmah le kanmah i tei khawhnak te hna, i uk khawhnak te hna, itah khawhnak te hna, iremh khawhnak te hna ape khotu cu Khrih Thlarau bawmhnak thawng lawngin asi. Amen! Bawipa min thangtthat si ko seh! 

1 JOHAN 5:4
zeicahtiah Pathian fa a simi paoh nih cun vawlei kha a tei khawh. Vawlei kan tei khawhnak cu kan zumhnak hin a si.

1 JOHAN 5:5
Vawlei cu ahodah a tei kho? Jesuh cu Pathian Fapa a si tiah a zummi lawng nih an tei khawh.
Cucaah kan nih cu vawlei kan tei khawhnak hi kanmah thawnnak le thilti khawhnak thawng in si loin Khrih kan zumhnak thawng in le Khrih thawnnak thawng in asi. Amen! Ka nawlh rih lai kan nih cu Pathian Fale kan si i Khrih kan zumhnak thawng in vawlei teitu, sualnak teitu kan si cang. Vawlei na tei rih lo le mah le mah na tei rih lo ahcun na chungah Thiang Thlarau nih na ngeih rih lo caah asi kho men. Zumhnak in vawlei teitu, mah le mah teitu na si khawhnak ding ahcun Jesuh Khrih ka zumh timi tiangah tang ti loin Amah he ton ding le hawikomhnak ngeih ding tuin Bawipa hmai rak kawl ko. Bawipa Jesuh he hawikomhnak tling ngeihnak lawng nih teinak tling tiang an phanhpi lai. Nihin zumtu tampi cu kan zumh kan ti dih nain kan zumhmi Jesuh he ai tong ballo mi le hawikomhnak a ngei ballomi lawng te kan si. Jesuh he nai ton ballo le hawikomhnak na ngeih ballo ahcun zumhnak tiang lawngah na tang rih asi ko. Zumhnak tling nih cun Bawipa Jesuh he tonnak le hawikomhnak tiang bak a kan phakpi. Bawipa Jesuh he ton ding le hawikomhnak ngei ve dingin rak zum ve cang tiah kan sawm. Bawipa Jesuh he tonnak le hawikomhnak tling na ngeih hnu tu ah vawlei teitu taktak le mah le mah tei khotu sinak cu na phanh ve te lai. Baibal nih a kan cawnpiakmi cu Pathian Fapa a zummi lawng nih vawlei an tei khawh ati: Biatak cu Pathian Fapa, Jesuh na zumhmi na chungah a um lawnglawng ah mah Baibal bia hi na cungah a takin hman khawhnak tthawnnak na ngeih lai. Jesuh Khrih na chungah a um hlan chung paoh cu ka zumh na ti zongah na zumhmi Pathian Fapa na chungah a nun rih lo caah vawlei tei khawhnak le mah le mah tei khawhnak cu na ngei rih bal lai lo. Vawilei na tei khawhnak le mah le mah na tei khawh lainak cu Pathian Fapa na chung um cangnak thawngin asi ko lai. Bawipa nih sunparnak co ko seh!