Zumtu tampi hi Bawipa nih a kan thuhtak tawn timi hi kan ruat tawn lo i kan hngal tawn rua lo tiah ka ruah! Bawipa nih a ka thuh tak ko hih timi fiang tein na hngalh ahcun Amah kawl lawng hi a tang ko, caan tampi cu kan hngalh lo caah Bawipa kan kawl ve ton loh.. Bawipa nih a kan thuhtaknak a ruang cu hung ka kawl hna sehlaw an ka kawlnak ah hin ka duhnak tampi hngal hna sehlaw tthang hna seh tihi a kan duhpiakmi asi. Kan hngakchiat lio i bik kan i thuh bantuk khi asi. Minung pakhat kan hmuh khawhlonak ah ai thup i kan hmuh hlan tiang kan kawl bantuk khin Bawipa nih hmuh ding tein hung ka kawl ve hna seh ti a kan duh. Cu ti te cun a kan thuhtak tik i kan kawlnak nih hin a kan thanter i a awl ah a har ah Bawipa duhnak le thinlung tampi hmuh khawhnak kan ngei...
Biapi asimi cu Bawipa nih zeitik hmanh ah an thuh tak thai ballo. Chikhat an thuhtak cu a ka daw taktak in a ka kawl ve hnga maw? ti i an testnak asi. A karlak ah maw lung dong in Bawipa he hawikomhnak na rak tuah tawnmi kha ngawl lai cih. Fakchin in kawl law kawmciar einak in arsa na ei can a phak tikah Bawipa na duh dawtnak a tthang in a ngan chinchin te lai mi hi kan chimh ngam ciami asi. Bawipa aw na theih khawh lo caan a um lai, Thiang Thlarau he naihniam lo ngaiin nan um caan a um lai, thlacam a thawt lo can a um lai, Baibal rel a thawt lo caan a um lai, na nun ah khingrihnak in na khah caan a um lai, na lawmhnak a tlau cuahmah caan a um lai, daihnak le hnangamnak nih an zamtak caan a um lai, lungsaunak le thinfualnak nih an in zamtak lai i thintawinak in na khah caan a um lai.Mah bantuk na um tikah na ruah zungzal dingmi cu zei sualnak le palhnak ka tuah ruangah dah an si hnga tiin na nun na van i chek vuaimai lai nain sualnak le palhnak ngaingai Bawipa cung i na tuahmi na hngalh lo tikah chim kan duhmi cu Bawipa nih a ka thuh tak ko hi ta tihi van i fiang te timi hi asi. Cucu na theih tikah na Bawipa Jesuh cungah le na Pa Pathian nih na nunnak in hmuh a duhmi a cung i zumhawktlak nun na ngeihmi le na dawt taktaknak kha hmuhter law Amah he nan i ton hlan tiang zumhtlak tein a cungah nung chin ko..
Salm ca ttialtu nih a timi cu Bawipa ka cungah na ttha ko, tlang cung ralhruang bantukin him tein na ka umter nain na ka thuhtak caan ahcun ttihnak in ka khat tiah ati. Mi zei hmanh hi dawtu nih a kan thuhtak le kan hmuh ti lo ahcun a celhmi le a raltthami kan um lai ka zum lo. Kan hlam cemmi le kan kawl cemmi cu Dawtu kan hmuh ti lomi le a aw kan theihti lomi hi a si ko lai. Nupi ka ngaih hlan ahcun nupi loin ka um kho ko nain nupi ka neih cang caah ka nupi loin ka um kho ti lai hi ka zum hrimhrim lo, cu ve bangin Jesuh ka ngeih hlan ahcun Jesuh loin ka um kho ko nain Jesuh ka ngeih cang caah ka Khamhtu Bawipa Jesuh lo cun ka nung kho ve hrimhrim lo.. Biatak asimi cu dawtmi kanmah hngakin Dawtu kan Pathian nih hin a let tampi in a kan dawt deuh i kan zawn a kan ruat deuh ti hi asi. Bawipa nih thuhtak na si tikah na hngalh ding cu Bawipa nih a ka daw taktak maw ti theih a ka duh ko hi ti kha rak i cinken ko muh.. Bawipa nih a ka daw taktak maw ti theih an duh tik i an thuhtak tikah theih a duhmi na dawt taktaknak kha langhter law hmuhter i zuam ve ko..
Biatak asimi cu minung hi rawl, ti le thli loin kan taksa a nung khawh lo bantukin Dawtu Pa Pathian le Khamhtu Jesuh Khrih, Bawmtu Thiang Thlarau lo cun kan nung kho ve hrimhrim lo. Maw Bawipa kan nun nih hin tihal in an hal i rawlttam in an tam, ka pum nih thli a herh bantukin ka thlarau nih an herh i nangmah lo cun ka nung kho lo, Nangmah lo cun ka nun a ro cuahmah ko. Sautuk in ka thuhtak hlah mu... Ka Pa..... kan ngai tuk cang ee...
—-
SALM 10:1
Maw Bawipa, zeicahdah lamhla tuk ah na um? Zeicahdah harnak caan ah naa thuh?
SALM 13:1
Zei can dah na ka philh lai, maw Bawipa ? Na ka philh zungzal ko lai maw? Zei can dah na ka thuh tak rih lai?
SALM 30:7
Bawipa, ka cungah na ṭha ko; tlang cungah a ummi ralhruang a him bantukin him tein na ka umter. Sihmanhsehlaw na ka thuhtak tikah ṭihnak in ka khat.