Mizei hmanh Pathian riantuan kan duh ahcun kanmah duh ruangah si loin midang nih a kan fial ruang zongah si loin Pathian fialnak le kawh auhnak in Pathian rian hi kan rak ttuan awk te arak si. Genesis in Biathlam tiang kan rel tikah Pathian riantuantu vialte hna hi Pathian kawh auhnak (Calling) lawng tein a rian an rak ttuan hna. Nihin zumtu vialte hna hi teh zeitindah Pathian riantuan kan i timh ning le kan ttuan ning cio asi hnga? Pathian nih Amah riantuantu dingah kawh auhmi na si ko ahcun phang hlah, khuaruahhar in Amah tthawnnak bak he an hruai hrimhrim lai. Biatak cu Pathian rian kan ttuan lai kan ti tikah hin kanmah cawnnak le thiamnak men in cun Pathian rian kan tlinh kho lai lo i fial hnawhchanmi rian zong kan lim bal lai lo. Sihmanhsehlaw Pathian kawh auhnak in fialmi na si ko ahcun Amah nih tthawnnak le teinak he an hruai lai i na kalnak kipah nangmah hmang in a sunparnak a langhter zungzal ko lai. Maw ka unau vialte hna Bawipa zangfahnak thawngin khamhnak kan co bantukin a riantuantu ah thim kan si lai zong hi kanmah ruangah si loin Pathian, Amah tinh ning lawng tein a rak si ve ko tihi chimh kan duh. Cucaah cun Pathian nih zei rian dah an fial hi na hngalh tiang ahmai ah kun zungzal ko.
Biatak cu kan Pathian cu fiang tein bia achimmi Pathian asi i na hmailei thil vialte, na tuah lai dingmi vialte an theihpiaktu Pathian hrimhrim asi zungzal ko.. Pathian nih chiti thuhnak in le Thiang Thlarau tthawnnak in Amah rianttuan dingah kawh auhmi na si ve maw? Pathian rianttuan naa timh ve asi ko ahcun Pathian nih an auh hlan tiang hngak ko... Pathian chim loin minung hmanh nih an company riantuan dingah minung an kawl i zeidah an caah an tuah khawh ding an zoh dah kaw? Pathian nih hin nangmah le nangmah naa hngalh hnak in an hngalh deuh hi rak philh hlah, Cucaah cun Pathian hnatlak ning in kawh auhnak he (Chiti) thuhnak in a riantuantu si cio ko hna usih. Pathian kawh auhnak le chiti thuhnak tello in Pathian riantuan hi ngol cang hna usih.... Pathian riantuan na duh taktak ahcun Pathian sinah thlacam law an leh tiang thlacam ko.
- Minung hi Pathian nih chiti thuh lawngah Amah caah hmantlak kan si.
- Minung hi Pathian nih chiti a kan thuh hnu ah Amah Bawipa Thlarau in hmanmi kan si.
- David nih kei cu Jacob Pathian nih chiti thuhmi ka si a ti.
- Paul nih Fapa Jesuh le Pathian nih a riantuan ding ah kawhmi (chiti thuhmi) ka si a ti ve.
- Nang le kei teh a ho nih dah Pathian rianttuan dingah kawhmi le auhmi kan si ve? Pathian chiti thuhnak tello in cun Pathian rianttuan hi a fawi lai ka zum lo.
- Baibal sianginn kan kai ruangah maw? Pathian rian kan tuan lai... Kan hrintthan ruangah maw? Pathian rian kan ttuan lai? Rawl ni 40 kan ulh ruangah maw? Pathian rian kan ttuan lai? A taktak asimi cu ahmasa bik ah kan hrinthan hnu ah Pathian kawh auhnak in le chiti thuhnak bak in Pathian rian kan ttuan awk asi.
- David nih keimah kha hmangin Bawipa Thlarau nih a chim, ka lei ah a bia cu a um ee a ti. Kannih teh a ho nih dah hmang in a chim i kan lei i a um bia hi teh a ho bia dah asi ve hnga?
- David kha Bawipa Thlarau nih hmang in a chimmi le a lei cungah a chiahmi bia cu hi hi asi: Uktu le hruaitu nih an hruaimi mipi kha Pathian ttihnak le dinnak in an uk hna i an hruai hna tikah khuadawm nih phenh loin a chuakmi zing ni ceu dawh a hung chuah vuaimai bantuk khin hruaitu le hruaimi si hna seh, uktu le ukmi si hna seh kan dihlak in dontu le phentu um loin thluachuahnak cu kan cungah a tlang vuaimai lai. Amen!
- Mah vialte a tlin khawhnak hnga kan Khrihfabu kip Pastor hna le upa hna, nubu upa hna, mino upa hna, sunday school saya/mah upa hna, kan sianginn kip le kan miphun hruaitu le uktu vialte cungah Pathian dawtnak kan ngeih cio a herh. Khamhnak kan co cio hnu ah Pathian nih Amah tinhning le duhning in a rian kan ttuan khawhnak hnga thimmi le chiti thuhmi kan si cio a herh. Thimmi le chiti thuhmi kan si hnu ah Pathian Thlarau nih hmanmi le Amah bia a chimmi kan si cio a hau. Cu vialte hnu ah kan tuahmi vialte hi Pathian ttihzahnak le mi vialte cungah thleidannak um loin dinnak le ruannak he kan uk, kan hruai hna ahcun Bawipa tinhmi thluachuahnak he kan miphun le kan ram, kan Khrihfabu kipah damnak a um lai..
————-
2 SAMUEL 23:1
Cun mah hihi David bia hmanung bik cu an si: Jesse fapa David bia, sangpi ah cawimipa, Jakob Pathian chiti thuhmi, Israel mi hla dawh phuah thiamtu bia cu:
2 SAMUEL 23:2
"Bawipa thlarau nih keimah kha hmang in a chim, Amah bia cu ka lei cungah a um.
2 SAMUEL 23:3
Israel Pathian nih a chim cang, Israel lungpi nih a ka chimh cang: Uktu nih mi kha dinnak in a uk hna i Pathian ṭih buin a uk hna tikah,
2 SAMUEL 23:4
Khuadawm a thiangmi zing i a hung ceumi ni bantuk, Zinglei ceunak bantuk khin annih cungah a rung ceu, Vawlei in ram a khohtertu ruah bantuk a si.