Ruahchannak

Ruahchannak

Zumtu kan nunnak ah nitin thazaang a kan petu cu ruahchannak a si. Khrihfa kan lam thluan i zeithil kan tonmi kip ah teinak a kan petu cu ruahchannak a si. Salm 31:24 ahcun "Bawipa cungah a ruahchannak a chiami vialte hna, lungthawng le thazaang thawng in um ko u!" a ti. Mi tampi nih kan ruahchannak a dik lo ruang ah zumnak in kaar kan hlang kan ti cuahmah lio ah inntuar khawhnak le teinak kan ngei kho tuawn lo. Kan i ruahchannak ai palh tikah inntuar khawhnak ka ngei kho lo.

Johan 16:17 ahcun "Nannih nih keimah he nan i pehnak thawngin lungdaihnak nan hmuh nakhnga, hihi kan chimh hna. Vawlei nih harnak an pek hna lai, sihmanhsehlaw tih hlah u. Vawlei cu ka tei cang, tiah a ti. Keimah he aa pehmi paoh nan lam a tluang lai a ti loh, vawlei nih harnak an pek hna lai ti tu hi a kan cah ta mi a si. Cu nih fiang tein a langhter mi cu Khrih he a tak in pehtlaihnak a ngeimi paoh cu vawlei harnak a pek hrimhrim a herh tinak a si. Sihmanhsehlaw vawlei nih a tei hna lai lo ti kha fiang tein a van langhter than. Cucaah zumtu paoh nih cun khrih ruangah vawlei nih harnak a kan pek awk a si ko ti kha kan cohlan awk le kan i ruahchan awk hrimhrim a sinak kha a langhter.

Kan i ruahchannak a palh tikah inn khawhnak le tuar khawhnak kan ngei tawn loh. Kan chung i biatak a um tik lawng ah biatak in a chuakmi ruahchannak nih kan chung ah rian a tuan. Zumtu nih harnak kan ton can paoh ah in khawhnak cu kan tonmi kan cohlang khawhnak thawngin a si. Kan tonmi harnak kan cohlan khawhnak cu "Vawlei nih harnak an pek hna lai" timi biatak ruangah a si. Mi tampi nih cun zumtu nih harnak hi kan ton awk a si lo ti i kan ruah caah kan i ruahchanlo mi har kan ton tak tikah kan cohlang duhlo i tuar khawhnak kan ngei lo. Kan tonmi harnak hi Khrih ruangah kan ton awk a si ko tiah biatak ruangah a cohlang kho mi nih cun "Tih hlah u, vawlei cu ka tei cang" timi bia nih ruchannak a kan pek tiah thawnnak kan ngei i cu thawnnak nihcun chuak lak in tei khawhnak a kan pek.

1 Korin 13:13 ahcun "A hmun zungzal mi thil pathum an um, cu hna cu zumhnak, ruahchannak le dawtnak an si a ti." A hmun zungzal mi thil pathum lak ah ruahchannak hi pakhat ah ai tel ve. A ruahchannak vawlei chaw le va ah a bunh mi hna cu ruahchannak a petu hna chaw le va a dih tikah an i ruahchannak a dih ve. Cu bantuk ruahchannak cu a rawk kho mi asi caah cathiang nih a chimmi ruahchan he an i khat lo. A hmunlo mi thil in kan hmuhmi ruahchannak cu donghnak a ngei. Sihmanhsehlaw a hmunmi thil in kan hmuhmi ruahchannak cu donghnak a ngei lo. Vawlei cung ahcun a hmun zungzal mi thil pakhat lawng a um hi cucu Biatak a si.

Mark 13:31 ahcun "Van le vawlei cu an rawk lai nain ka bia cu a rawk lai lo." a ti. Zumtu kan nunnak ah ruahchannak a kan petu cu biatak a si. Biatak in kan hmuhmi ruahchannak lawng nih harnak kan tonmi chung ah intuarnak khawhnak le teinak a kan pek khawh. Cu cu Pathian nih vawlei ah tlongleng mi a fa le vialte kan nun ah biatak in kan hmuhmi ruanchannak nih vawlei nih amah ta kan si ruangah kan tonmi harnak vialte hi tei kho hna seh ti kan duh cu a si. Cu ruahchannak thawngin teinak na hmuh i Pathian sunparnak a langh khawhnak hnga thiangthlarau nih in bawm ko seh.