Vawlei cung minung vialte nih hin kawlmi kan ngei cio i taksa in nun damnak le chawva hi fakpi in kan kawl cio. Thlarau lei nunnak taktak a kawlmi hi cu minung tlawmte taktak kan si. Nihin zumtu ai timi tampi zong nih hin kan kawlmi taktak cu Thlarau nunnak lam lei si loin chawva in tlamtlinnak hi fak deuh in kan zuanhnawh cio ko. Jesuh nih hin chawva a biapinak hi a chim ballo i zungzal nunnak a biapinak tu hi cu fakpi in a chim, minung pakhat nunnak hi vawleipi he a tahchunh. Minung pakhat nunnak hi zeitlukin dah a sung tihi minung nih kan hngal kho ngaingai loh, Sihmanhsehlaw Pathian le Fapa Jesuh nih cun fiang tein an hngalh caah a Fapa hrimhrim cu vawlei khamhtu ah a run thlahnak cu asi i cu ve bangin Fapa Jesuh zong nih cun nunnak a biapi tuknak kha a chim lengmang ve. Minung pakhat nunnak hi vawleipi hngak in man sung deuh asi i misualmi Bawipa lei an kir tthan tikah hin vancungah lawmhnak nganpi a um tiah a cawnpiak hna. Rumnak taktak phanhnak lam cu Jesuh Khrih zumhnak hin asi. Jesuh nih a chimmi ka duhtukmi cu Keimah zumhnak in hrintthan uh, Hrintthannak in Pathian Pennak chungah lut uh, Pathian Pennak nan um hnu ah zeidah tuah hna seh ti kan duhmi hna kawl uh, Zeidah tuah hna seh ti kan duhmi hna nan hmuh hnu ah nawl ngeihnak he zulh dawi ulaw thildang vialte zong kan pek tthiamtthiam ko hna lai tiah a ti, zeizong vialte pek nan si ko lai tiah Jesuh Khrih nih bia a kan kamh. Amen...
Zei ruangah dah Pathian zumtu le Khrih hnuzulhtu vialte nih hin Baibal nih Phaisa nan van kawl lai tiah a kan cawnpiak lo nain Phaisa hnu hi kan zulh deuh hnga i Pathian duhnak zulh le tuah hi fakpi in i thim loin phaisa kan hmuh khawhnak lam lawng te hi kan kawl cio hnga. Phaisa hi maw a ngan deuh hnga kan biakmi kan Pathian dah. Pathian maw a ngan deuh? Phaisa dah? tiah in hal hna ning law nan ka leh dingmi cu Pathian ta ti hi asi lai nain na kawlmi cu Pathian asi lai ka zum lo, na kawlmi cu na kaa nih angan deuhmi hi Pathian asi na timi kha si loin na thinlung in a herh deuh tiah na ruahmi phaisa tu kha asi ko. Sihmanhsehlaw biatkak cu Pathian tello in rumnak tling hi hmuh khawh asi naisai lo i na rum bal lai lo. Rumnak hi phaisa ngeih tungmang lawng hi si loin phun tampi ngeihnak lawngin rumnak a tling. Chawva a kawlmi nih chawva nan hmuh ve taktak ko lai i damnak a kawlmi le dawhnak a kawlmi nih a hmuh zong chikhat ca cu nan hmuh lai ve ko lai nain a hmunlomi lawngte an si. Biatak cu Fapa Jesuh Khrih zumhnak in Pathian a kawlmi nih Pathian an hmuh lai i Pathian a hmumi nih Amah duhnak zulh le ttihzah zong an ngeihchih lai. Pathian ahmu taktak mi caah cun zeizong vialte hi hmuhchih dih asi, rumnak zong a um i fimnak le thiamnak, ngandamnak in zeizong vialte a tling taktak. Rumnak le zeizong vialte hmuhnak lam hi lamdang a um lo i lam pakhat lawnglawng a um, cucu Jesuh Khrih zumhnak hin asi. Amah zumhnak in ai thok lengmang ding khi an si nain nihin minung vialte nih kan kawlmi cu Jesuh Khrih in si loin minung vialte nih kan kawl ning lamdang in kan kawl cio i a hmuh zong kan hmu bal lai lo. Nihin na hmuhmi hi cu chimtlak ngaingai an si hrim hna lo...
Minung nih rumnak lam tiah kan ruahmi hna hi na ruat bal tawn maw? Tuan kawl khawhnak hi rumnak asi lai tiah kan ruah, rian tampi tuannak hin kan rum lai tiah kan ruah, fimnak le thiamnak caan saupi cawnnak in Degree tthattha ngahnak in rumnak asi lai tiah kan ruah, Ramdang kalnak in rumnak asi lai tiah kan ruah, uktu le bawi sinak in rumnak asi lai tiah kan ruah, sihmanhsehlaw mah vialte hna hi rumnak a phaktertu lam pakhat hmanh an si lo i a donghnak ahcun kan pum hrawktu lawngte an si dih hna. Acung i ka ttialmi hna a ngeimi na si ahcun na pum an hrawk hlan ah Bawipa kawl ko, biatak cu kan ngeihmi chawva le fimnak zeizong vialte hna hi kan chan a kan tawitertu le kan pum a kan hrawktu lawng te an si dih hna. Sihmanhsehlaw Bawipa nih a ratpimi thluachuahnak nih cun ngeihchiatnak a phur hrimhrim lo. Ka theihmi rumnak lam pakhat aum i cucu ahman bakmi asi; Cucu Fapa Jesuh Khrih zumhnak in ai thokmi lam hi asi. Sihmanhsehlaw Jesuh aa zummi tampi zong caan a rauh cun kan rak zulh tawn lengmangmi kan lam tthing ah kan kir tawn i Pathian nih a kan hmuhsakmi Lam kha zulduh taktak loin kan kawlmi hi chawva an si tthan tawn. Chawva kawlnak nih hin rumnak lam an phanhpi lai lo i Fapa Jesuh Khrih zumhnak in Pathian duhnak a hmu i a zulmi hna tu nih hin kan hmuh. minung vialte nih fak cem in kan kawlmi hi phaisa asi i kan nun chung vialte ah caan kan pek cemmi zong phaisa asi. Biatak cu kan Biakmi kan Pathian hi Fapa Jesuh Khrih zumhnak in pehtliahnak le hawikomhnak ngei cio usihlaw kan caan kan pek bikmi hi kan Pathian sisehlaw cu kan kawl lengmang mi rumnak taktak hi kan hmuh ko hnga. Phaisa kan duh ruangah Pathian kawl si loin Fapa Jesuh Khrih zumhnak thawngin Pathian duhnak na kawlmi le Amah he umtti na duhnak thawng nih rumnak le nun duhdim nunnak taktak cu an phanhpi hrimhrim lai. Biatak cu Zumtu le zultu vialte hi lungsau nun ngeihnak zong cawnpiak chih kan si i lungsaunak nun nih hin rumnak kan phanh tiang a kan bawmh lai. Alung adong lengmang mi le a kir lengmangmi nih cun khuaawng an pemh bal lai lo. Cubantuk tthiamtthiam in alung adong lengmangmi na si ahcun na chungah Thiang Thlarau a um lo caah asi ko, Thlarau nih a chuahtermi cu lungsaunak hi asi. Amen.
Cathiang nih a kan cawnpiakmi hi zohtti hna usih. Mahka ah hin fakpi in chimchih ka duhmi cu nihin zumtu tampi cu Baibal nih ati, Paul nih ati tinak tiang ah kan tang dihmi hi Bawipa nih a kan duhpiakmi asi loh, Bawipa nih a kan duhpiakmi cu Cathiang chung i aitialmi hi kan zumh tikah kan thinlung ah hmunhma lakter i a takin i nunpinak in atheitlai hi a kan duhpiak mi cu asi. Cu nih a ti tinak tiang lawng tangmi si ti loin Baibal nih a chimmi tu kha na nun lam an hmuhsak taktak tu le thluachuahnak an phakpi tu ah rak hmang ve. Theihnak tiang le relnak tiang lawng si ti loin nunpinak tiang a phanmi relnak le theihnak, hngalhnak si cang ko hna seh. Na zumhmi hi a phi na hmuh hlan tiang Bawipa sinah kawl ko. Ezekiel nih a chimmi hna hi tuukhal le tuu kong asi i Israel mi hna tuukhal an fellonak le anmah zawn lawng an i ruahnak kong hi tampi a chim hnu ah keimah hrimhrim nih Tuukhal pakhat kan pek hna lai a ti. Tuukhal a kan pekmi cu Jesuh Khrih hrimhrim hi asi i Amah hi a kan zohkhenhtu Tuukhal cu asi i Amah thawng cun kannih cu rumnak pek awkah biakamnak tuah kan si. Biatak cu Jesuh hi rumnak lam asi ko nain rumnak angeitu Jesuh tu kawl loin minung nih kan ruahmi rumnak chawva kan kawl caah hin rumnak tiang kan phanh cio lonak asi. Biatak cu Jesuh hin rumnak lam biakamh kan si ko nain Jesuh zumhnak in Pathian duhnak zulhnak le nawl ngeihnak he kawl loin kanmah fimnak le thazang in kan kawl caah kan hmuh lonak asi.
Biatak cu Jesuh nih kei cu nunnak kha nan ngeih i duhdim nun nan ngeih nakhnga caah ka ra tiah a ti. Biatak cu Jesuh lo cun Bawipa hi thangthat khawh asi lo i Bawipa a ttihmi si zong hi a ngah lo, Bawipa ttihnak um lo cun lunglawmhnak zong a um bal fawn lai lo. A nawlbia zulh nuamh theihnak ding zong ah hin Jesuh tello in cun ngeih khawh asi lo i a nawlbia zulhnak um lo ahcun mi lung lawm na si kho ve bal lai lo. Sihmanhsehlaw biatak cu Pathian fapa Jesuh Khrih na zumhnak in Thiang Thlarau na hmuh tik lawngah Bawipa duhning in a thangthat khomi le Amah a ttihmi, Lunglawmmi, A nawlbia zulh a nuam in a theimi, a nawlbia zulh anuam in a theimi sinak in lunglawmmi sinak tiang Thiang Thlarau nih an phanhpi lai. Cutik lawnglawng ah na innchungkhar cu Bawipa ah ai lawmmi innchungkhar nan si lai i Bawipa thawngin thluachuakmi, arummi, alianmi le khuaawng tongmi innchungkhar sinak thluachuah nan hmu lai. Amen. Rumnak hi chawva tampi ngeih hi si loin Bawipa nih a kan pekmi cungah lunglawmh le diriam te um thiam tuhi Bawipa nih mirum a timi cu kan si. Bawipa nih a kan pekmi cungah lawmh thiam le hnangam tein nun thiam tuhi rum cu asi. Atu i na ngeihmi vialte cungah naa lawmh thiam lo ahcun zeitik hmanh ah naa lawm thiam ve bal lai lo. Adonghnak ah Bawipa Jesuh hi zeizong vialte ngeitu asi nain cu vialte cu nangmah le keimah a kan dawt tuk caah ahlawt dih i kanman khamh awkah le nunnak duhdim pek awkah ara. A rum taktak nain sifahnak tu hi keimah le nangmah caah ai thim, sifahnak le harnak, ningzahnak vialte ai thim cu keimah le nangmah kha rumnak pek awkah le luatnak ka hmuh khawhnak hnga caah le nunnak duhdim ka ngeih khawh nakhnga caah asi. Amen. Ka chim duh bikmi cu rum duh ah Pathian kan fuh lai tinak khi si loin rumnak lam cu Jesuh lawng hi asi i Jesuh loin kan tuah khawhmi zeihmanh a um lo tihi asi. Jesuh lawnglawng hi lam le biatak le nunnak cu asi ko. Catlang cungah tialmi relnak in si ti loin thinlung cungah Thiang Thlarau nih a ttialmi tu mikip nih na nun ah rel ve cang ko hna seh... Minung vialte nih rumnak kan kawl, kan hmuhnak lam cu Jesuh lawnglawng in asi lai. Rumnak na kawl ahcun na hmuh bal lai lo, Jesuh kawl law Jesuh na ton hnu ah Amah nih a herh a ti ning an chap ko lai...
~~~~~
EZEKIEL 34:23
Cun annih zohkhenhtu dingah tuukhal pakhat kha an cungah ka chiahpiak hna lai i cucu ka sal David kha a si lai;
EZEKIEL 34:25
Annih kha rumnak pek awkah anmah he biakamnak ka tuah lai; ram chungin sahrang kha ka ṭhawl dih hna lai i saṭil tlonnak hmun ah khan lungdai tein an um lai i tu chungah khan an it lai.
JOHAN 10:10
Mifir cu fir duh le thah duh le hrawh duh lawngah an ra. Kei cu nunnak kha an ngeih i duhdim tein an ngeih nakhnga caah ka ra.
SALM 112:1
Bawipa cu thangṭhat u! Bawipa a ṭihmi cu mi lunglawm an si. A nawlbia zulh a nuam in a theimi cu mi lunglawm an si.
SALM 112:3
An innchungkhar hna cu an rum an lian lai i khua awng an pem zungzal lai.
2 KORIN 8:9
Nannih nih kan Bawipa Jesuh Khrih vel kha nan hngalh ko: a rum nain nanmah ruangah sifak ah a cang, cuti a can cu a sifahnak khan nannih kha rumter an duh hna caah a si.