Ka Pa ka nunnak dihlak le atu ka sining taktak in ca ka ṭial. Ka Pa kan dawt deuhdeuh i kan duhnak angan chinchin, Nangmah loin cun ka thi sual lai ti hna ka phang. Biatak cu lawmhnak taktak le hnangamnak taktak hi Nangmah bak lawnglawng na si i Nangmah sin lawng in hmuh khawhmi le Nangmah he hawikomhnak lawngin hmuh zungzal khawhmi asi. Ka thinlung le ka nunnak taktak i a ummi cu Nangmah kong lawng hngalh hi si ti loin Nangmah hrimhrim hngalh le umṭi zungzal hi asi. Minung tampi nih hin Bawipa Jesuh kong cu kan chim a tam ko cang, Ka Pa, Pathian, Nangmah kong zong hi kan chim atlawm hrimhrim ti loh i Thiang Thlarau Min kan chim zong hi atam ngaingai cang ko. Cu vialte chim cu sualnak le duhlo dingmi asi hrimhrim lo nain na Min le na kong kan chim cuahmah ko buin hin Nangmah he cun kan umṭi ballo i kan i hlat taktak ko timi hi ka hmuhmi asi.
Pathian kong theih le Jesuh Khrih kong theih le Thiang Thlarau kong theih le hngalh tiang lawng hi maw na kan duhpiakmi asi hnga tiah cun si naisai hlah. Biatak cu na kong kan theih le kan hngalh tiang lawng siti loin Nangmah ngeih le Nangmah he hawikomhnak ngeihṭi le umṭi duh ruangah pei na Fapa hmang in na kan Khamh i Thiang Thlarau na kan pek cu… Ka Pa, Nangmah he umṭi ding, hawikomhnak ngeih ding le atak in kan i hngalhnak ding ah pei na Fapa in kan chung ah na umnak inn le na pennak cu na dirh I inn na sak cu tiah.… Ka Pa kan ngai zungzal i kan dawt taktak ko. Ka nunnak ah hin Nangmah loin cun ka car cuahmah cuh… Ka bat tuk tawnmi hi rian ka ṭuan tuk i ka thazang a dih ruangah si loin Nangmah he kaa hlat caan ah hin ka bat taktak hi arak si deuh.. Lawmh zungzalnak le hnangam zungzal nak cu Thiang Thlarau he hawikomhnak lawnglawng in hmuh zungzal khawhmi asi. Lawm tein le hnangam tein um zungzal na duh ahcun Thiang Thlarau he thlacamnak in hawikomhnak chungah nun zungzal ko.
Ka Pa ka zangfah law atu ka sining hnak in Nangmah he neih deuh le umṭi deuh, hawikomhnak thuk deuh ngeih ka duh. Na ka umpinak zong hi ka pum nih siseh ka thinlung le ka nunnak nih siseh ka Thlarau nis siseh, ka ruahnak nih siseh a hngalh chinnak hnga nizan hnak in tuni ah ka bawm chin ko. Na lumsatnak le na thawtnak vialte hi ka duh tuk. Nangmah loin cun ka thi sual taktak ko lai ee… Bawipa, Nangmah he hawikomhnak ah hin na thawtnak atling, Pathian na sinak atling, Biaktlak na sinak atling, thlumalnak na ngeihnak atling i retheihnak le thilrit vialte na hmaika in an tlau. Amen.. Minung phun vialte nih hin Thiang Thlarau he hawikomhnak in na thawtnak le na thlumnak, Nangmah Biak athawtnak vialte cu hmu cio ko hna seh… Pathian kan biak cio ko nain minung tampi caah cun thawtnak angei lo, zei ruangah tiah cun Thiang Thlarau he hawikomhnak an ngeih lo caah asi. Nu le va zong kan i ṭhitumhnak ah lawmhnak le thawtnak atling lo i hawikomhnak kan ngeih tik lawngah nu le va athawtnak taktak hmuh khawh asi. Pathian kan biak athawtnak amuru cu Thiang Thlarau he umṭinak in hawikomhnak ngeihṭi lengmang nak hin asi… Thiang Thlarau he hawikomhnak ka ti lengmang mi cu thlacamnak in Thiang Thlarau sawm le hngah hi ka chim duhmi asi.
Jesuh nih rethei le thilritmi vialte hna ka sinah ra tuah u, dinhnak kan pek hna lai atimi hi zeitindah na ruah? zeitindah Jesuh sin ahcun kan kal lai timi teh na ruat bal maw? Jesuh sin kal na duh tikah biakinn ah maw na kal lai? Zeitindah dah na kal lai I khuazei ah dah na kal lai? Khuazei ah dah na kawl lai? Biatak cu Jesuh sin kal na duh taktak ahcun biathli kan chim lai muh: Jesuh sin kalnak cu lamkhat lawng aum i cucu lungthin tak in thlacamnak lawngin kal khawh asi. Lungthin tak in thlacamnak in asin na kal tik lawnglawng ah na retheihnak le na thilrit caah dinhnak an pek lai. Cucaah pei ka ti lengmang cu Jesuh hi nunnem le mitoidor asinak taktak cu asin na phanh tik lawnglawng ah na hmuh lai I na co te lai. Amah he thlacamnak in hawikomhnak lo cun nunnemmi asi nak le mitoidor asi nak le athlum alnak vialte na hmu kho ngaingai lai lo I an hrawmh kho ve lai lo.
Pathian kan Biaknak ah thawtnak le hmual angeih cemnak hmuhkhawhnak amuru cu thlacamnak in Thiang Thlarau he hawikomhnak kan ngeihnak hin asi. Amen.. Ka chim duh cemmi cu Baibal relnak caan na pek tluk in thlacamnak in Thiang Thlarau he hawikomhnak caan rak pe ve law Thiang Thlarau hi rak hngak ve tihi asi. Thiang Thlarau he thlacamnak in hawikomhnak chung na luh tik ahcun Pathian biak a thawtnak taktak na co ve te lai. Teminnak lawngin Pathian duhnak na kawl ahcun na lung a dong te lai. Thlacamnak in Thiang Thlarau he hawikomhnak na ngei cang ahcun zeibantuk teminnak le harnak hmanh na cungah phan sehlaw hawikomhnak chung na luh in Bawipa Jesuh nih an lakpiak cuahmah thawtnak na hmuh ko lai. Amen… Na retheihnak le na thilrit cu Bawipa Jesuh hmai ah thlacamnak in hawikomhnak ngeihṭi dingah rak chuahpi ve. Bawipa nih an chaan hrimhrim lai. Amen..
Matthai 11:28-30
"Rethei le thilrit mi vialte hna, ka sinah ra tuah u, dinhnak kan pek hna lai. Ka seihnam kha i bei u, kei cu nunnem le mitoidor ka si caah ka nawl hi i cawn ve u; cun dinhnak kha nan hmuh lai. Ka seihnam cu a bei a nuam i ka thil cu a zaang," tiah a ti.