Jesuh vawlei a rat chanh cu kalnak lam a hmu kho bak lomi bawmh a herh ko nain bawmtu a ngeilomi Keimah bantuk hna caah hin asi. Jesuh nih a duhbikmi cu sining tein chim hi asi i hmuhmi kha hmuh ti i hmuh lomi cu ka hmu lo e ti hi a duhmi asi. Mitcawpa nih a mit cawt ai hngalh bantukin a dam i khua a hmuh taktak cang zong kha al awk tthalo in a hngalh ve. Amen! Khua a hmu ngai lawh ttung i hor ah a tla ding tampi an um. Sihmanhsehlaw Thlarau ah mit dei ttunglo i ka dei ko a timi hna caah Jesuh a ra lo i Thlarau mitcaw asi aa hngalmi bawmh ding tuah ara. Amen! Minung tampi cu ka Thlarau mit a dei ko a ti ruang teah hin sual phawtnak cu anmah tein an cungah an i tanter peng rih ko. Cucaah cun Thlarau mitcaw na si ahcun na mit cawt na hngalh i damtertu ah Jesuh na thim ahcun fiangput in na Thlarau mit a dei kha na hngalh ve ko lai. Amen! Jesuh nih damter ai foih bikmi cu mah damlonak i hngalhnak hin asi. Amen! Damlo nain ka dam ko ti cang ahcun damter awk a ttha in kan ttha hrim lo.
Mitcaw hna pahnih nih Jesuh Khrih cu kan damter ko law tiah bawmh an hal i ka damter khawh lai tiah nan zum maw tiah a hal ve hna. Annih nih an lehmi cu na damter khawh lai tiah kan zumh tiah an leh ve. Jesuh nih a timi hna cu nan zumh ning tein si ko seh tiah a leh hna tikah damnak an hmu ti kha ka hngalh. A biapi tukmi cu Thlarau mitcaw ka si na ti ko bu zongah hin na zumh ning tein na Thlarau mit dawiter na si ko lai. Amen! Nihin ni tiang Thlarau mitcaw ka si ka ti ko nain keimah ning te ka si ko na timi zongah hin na zumhnak te nih a phi chuahmi cu a tu na sining te kha asi ko. Zumhnak taktak cu a tthu sawh kho ballo i a mit khua a hmuhnak dingah lamkip a kawl tawn. Cu ve bantukin Thlarau mit dei na duh taktak ahcun na tthu sawh kho lai lo i Thlarau mit deitertu Pa he nan i ton hlan tiang cu na kawl hrimhrim ko lai. Kan damlo caan ah siibawi sin phanh kan i foih bantukin Thlarau mitcawtnak hin damtertu Pa sin kal hi kan i foih ve hnga lo maw? Thlarau mit deinak dingah cun Jesuh Khrih sin na panhnak lawng in na dam lai. Amen! Na Thlarau mit a dei rihlomi ah na khuaruah rak har hlah, deitak na duh rih lo ca tuah asi ti tu kha rak i fiang ko. Thlarau mit dei a duhmi vialte hna deiter khotu cu Jesuh lawng asi. Amen! Jesuh Khrih sinah na thinlung dihlak he rak kir ko. Na Thlarau mit deiter na duh taktak ahcun na thlarau mit deinak hi a phi asi ko lai. Jesuh Khrih sinah a rami poah cu an dam thaai dih (An mit deiter tthan an hau ti lo). Amen! Bawipa min thangthat si ko seh....
JOHAN 9:39
Jesuh nih cun, "Hi vawlei cung i ka run hi, mitcawmi nih khua an hmuh i khuahmumi cu mitcaw ah an i can nakhnga, biathlehnak tuah awkah a si," tiah a ti.
JOHAN 9:41
Jesuh nih cun, "Nan mit cu rak caw seh law, sualphawt nan si hnga lo. Sihmanhsehlaw nanmah nih, 'Khua kan hmu kho,' nan ti ruangah hin sualphawt nan sinak cu a tang peng ko," tiah a leh hna.
Thiang Thlarau hruainak in kal hi zumtu asimi poah nih cun kan thinlung nih a duh i kan kaa zong nih a duh nain Thiang Thlarau hruaining taktak a hngal kholomi tampi kan um. A ruang cu kan hngalhlomi pi kha a hngal ngai bantukin kan um caah asi. Mitcawmi pa Jesuh nih a damtermi pa cu pumhnak in an tthawl kha a hmuh tikah Mi Fapa cu na zum maw tiah a hal tikah Amah cu ka zumh khawh nakhnga a hodah asi ka chim tuah tiah a leh ve. A mit cu khua hmuhter asi cang ko nain a ho set hi dah a damtertu asi ti kha a hngalh ngaingai lo. Cu ve bangin nihin zumtu tampi hi Jesuh Khrih nih a kan khamh ti cu kan hngalh i kan zum nain Khamhtu asimi Jesuh Khrih he Thiang Thlarau in ai tong lomi tampi kan um. Jesuh nih a lehmi cu na mit an damtertu le Khamnhnak an petu Pathian Fapa cu nangmah he aa chawn lengmang mi, na hmu cangmi Pa hi asi ko tiah a leh tikah Khamh cangmi Pa nih cun a khukbil in Mi Fapa cu kan zumh tiah a leh. Halleluijah. Amen! Khamhnak kan hmu cang ti kan i hngalh hnu ah hin a biapi tukmi cu a kan Khamhtu Pa he hin kan i ton le kan hmuh hrimhrim a herh ve. Nang Jesuh Khrih an Khamhtu Pa hi na hmu cang in a aw na thei ve cang maw? Khamhnak hmuh lawng hi a za hrim lo, an Khamhtu Pa na ton hrimhrim a herh!
JOHAN 9:35
Jesuh nih an ṭhawl kha a theih. Amah cu a va hmuh i, "Mi Fapa cu na zum maw?" tiah a ti.
JOHAN 9:36
Mipa nih cun, "Bawipa, amah cu ka zumh khawh nakhnga aho hi dah a si ka chim tuah?" tiah a leh.
JOHAN 9:37
Jesuh nih cun, "Amah cu na hmuh cangmi kha a si ko i atu i nangmah an chawn lengmangtu hi a si," tiah a ti.
Nihin zumtu tampi Thlarau hruainak kan hngalh khawhlonak le zumhawk tlak in kan nun khawh lonak cu Khamhnak tiang lawngah kan i zat caah asi. Khamhnak tiang aa zami si ti loin an Khamhtu Pa Jesuh na tonnak tu nih Thlarau hruainak an thiamter lai i Amah caah zumh awktlak in an nunter lai. Amen! Na ka hal dingmi cu Thiang Thlarau ka ngei cang ko hi teh na ka ti lai. Ahman bak! Thiang Thlarau na ngeihmi Pa nih khan Amah he thukpi in theihter le hmuhter kha an duh hnga lo maw? ti hi kan lehnak cu asi hnga. Thiang Thlarau nih a duhbikmi cu Jesuh Khrih kong chim le a duhnak tuah hi a si zungzal. Ka chim duhbikmi cu an khamhtu Pa he hin nan i ton bak awk le a aw na thei ve awk le na chungah a um ko hi na theih awk bak asi. Minung tampi nih cun Thiang Thlarau ka ngei rua tiah a timi zong tampi kan um rihmi hna hi ruah awk ngai asi i "rua" nih cun an nunter lai lo. Jesuh Khrih cu Thiang Thlarau le Mei in tipil a kan petu asi, Thiang Thlarau kan chungah a um cang ka hngalhnak cu ka chunglei Mei bangin a kang zungzal nak hin asi. Amen! Thiang Thlarau in Jesuh ka chungah a umnak cu Mei kangh in a kanghnak hin kan hmuhsak hnga ti hi hi Thawngtha ttialtu i tehte cu asi. Tampi tehte kan ngei ko... Ka Saya Tthabik le cawnpiaktu tthabik, ka Bawipa cu Jesuh Khrih Amah Thlarau in a ka umpitu lawng hi asi. Amen!
THLARAU MITCAW SI HNGALNAK NIH NA THLARAU MIT A DEITER LAI I THLARAU HRUAINAK ZULH DAWI THIAMLONAK NAA HGALHNAK NIH HRUAI THIAM PA HE AN TONTER LAI. AMEN!!!