Na fale na vuak tawn hna le fak deuh in na chimh hrin tawn hna kha na mit thlam a cuang ve maw? Fale hi zeitindah kan chimh hrin cio hna hi fak deuh in kan ruah a hau cang. Kan lung an kan ton lo tik le kan thin an kan hanter tikah diriam tuk in kan fale kan chim hrin hna in fak tuk in kan vua sua hna maw? Mah hmanthlak na zohnak nih hin na thinlung ah bia tampi a chim lai i tampi an cawnpiak lai tiah zumhnak ka ngei. Kan fale hi kan duhtuk ko hna i kan dawttuk ko hna nain kan ing a puang cio cang ahcun duh tawk tein vuak hmangmi kan si hi a poi ngai tawn tiah ka ruah. Fale hi duh an nung tuk i an sung tuk hringhran. A can tampi ahcun ka fale ka zoh hna i ka lung an si tuk ruangah hin mitthli thlak buin an lu cungah kutchuang in Bawipa sinah lunglawmhnak ka chim tawn. Nangta na fale hi na lung an si tuk ve ko lo maw? An lu cungah kut chuangin mitthli he thlacam lawmhnak na chim ve maw?
Baibal zong nih kan fale hi Khrihfa ziaza in cawnpiaknak tu he tthanter hna uh tiah fial kan si. Khrihfa ziaza in cawnpiak hna uh ti ah a kan fialmi cu Pathian dang aum lo, nihin i nangmah le keimah nih kan biakmi Pathian lawnglawng hi Pathian nung cu asi tihi asi i a nungmi Pathian asi timi cawnpiaknak lawng khi si loin an cuhungah Pathian a nun tiang an zumh i an ngeihnak hnga lam nan hmuhsak hna lai tihi asi. Na fanu hna le fapa hna hi Baibal relnak le Pathian bia cawnpiaknak he na tthanter ko hna ahcun thinhung tuk in chimh hrin an hau hrimhrim lai lo. Innchungkhar ah a biapi bikmi cu fale si loin Nu le Pa nih Pathian dawtnak hi thukpi in kan hngalh a herh. Nu le Pa Pathian dawtnak a hngalmi fale cu vuak hau lengmang cu an si hrimhrim lai lo. A ruang cu Fale hna nih hin Nu le Pa kan tthutto dir ning tein le kanmah ziaza tein an tthang (Nu le Pa nan tthat ko ahcun fale an ttha hrimhrim ko lai). Nu le Pa nih Pathian dawtnak na ngeih lo ahcun zeitluk in na vuak hna i na chimh hrin hna zongah an upat tikah cun an tlau thotho ko lai (or) Na fale cu na dawt tuk ko hna lai i na vua in na si bal hna lai lo nain an upat tikah cun an tlau thotho ko lai. A biapi bikmi cu Nu le Pa nih fale kan dawt taktak hna ahcun vuak le raknak sawhsawh si loin Pathian dawtnak tu hi Nu le Pa nih kan ngeih khawhnak hnga zuan hnawh hna sihlaw kan fale zong hi Khrih dawtnak he tthanpi hram hna usih.
Na fale caah Ro tthabik na khon piak khawhmi hna cu nangmah na nun zohchunh awktlak tein Pathian sinah na nunmi te hi asi ko lai ( vawlei chawva ro hna hi cu a hmum lomi an si i a hmunmi cu Jesuh Khrih lawng asi). Zumh awktlak tein na nunmi theitlai nih cun na fale cungah thluachuahnak a phurh lai i na ngeihmi Jesuh Khrih cu na fale chung zongah a lut ve lai. Amen! Kan ceunak cu kan fale le kan innchungkhar nih pei an hmuh hmasa awk le an tinco hmasa awk cu asi cu tiah... Ro vialte lakah a ttha bikmi Ro cu Jesuh Khrih hi asi ko. Na fale nih vawlei ah a sungbikmi Ro Jesuh Khrih an ngeih khawhnak dingah timhtuahnak rak ngei ve cang. Nu le Pa nih Jesuh Khrih nan ngeih ko ahcun Fale zong nih an ngeih hrimhrim lai timi hi rak i cinken ve muh. Fanu le fapa hna nunzia dawh tein le Pathian duhning in tthang hna seh ti na duh ahcun nu le pa nih kan Pathian kong theihnak tiangah nung ve ti loin Amah he thlacamnak in hawikomhnak le umttinak tu he kan kaltti ko ahcun kan fale vialte zong nih a nganbikmi Pathian he hawikomhnak thluachuah cu an van hmuh ve te lai. Bawipa nih thluachuahnak in pe ko hna seh....
EFESA 6:4
Nu le pa hna, nan fale kha an thin hung seh tiin ti hna hlah u. Khrihfa ziaza le cawnpiaknak he tu khan ṭhanter hna u.