Kan nih cu a nung mi kan Pathian nih a fapa Zisuh Khrih thisen thawnnak hmangin khamh I luat ter mi kan si ti lawng zum lo in Rom 8:17 nih “Kannih cu Pathian rocotu kan si, Khrih roco hawi kan si; zeicahtiah Khrih teminnak kha kan I hrawm ahcun a sunparnak zong kan I hrawm velai.” A ti bantukin a teminnak kan I hrawm ve lawng ah a sunparnak kan I hrawm lai ti a zum mi kan si. Kolose 1:13-14 ahcun “Zeicahtiah amah nih cun muihnak thawnnak chung khan a kan chuah I a dawtmi a Fapa pennak chungah khan him tein a kan luhpi I a Fapa thawng cun luatnak kan hmu I kan sualnak cu ngaihthiam kan si.” a ti. A pennak chung ah zumhnak thawng in fa sinak ro a co tu kan si caah Zisuh Khrih chung ah khamhnak a hmu mi lawng siloin Zisuh Khrih hrimhrim kha kan nunnak Bawi ah cohlang in kan nunnak dihlak hi amah sunparnak caah amah nih a duhning in a hman awk a si ti zong kan zumh.
Nihin kan chan cu Thiangthlarau chan a si caah Thiangthlarau tel lo cun mi zeihmanh nih Pathian duhnak a tuah kho lo ti kan zumh caah zumhnak in kan tuahnak kip ah Thiangthlarau sawm a herh zungzal ti a zum mi kan si. A chambau mi minung nih hin zumhnak in Biatak chung ah kan nun ahcun Thiangthlarau bawmhnak thawngin thil zeipaoh hi a tuah kho mi kan si ko ti hi kan zumh. Khrih thawngin kan hmuh mi luatnak hi diriam ngai in pumsa duhnak tuahnak ding men caah siloin Bawipa nawl ngai in nitin kan nunnak I a sunparnak kan langhter khawhnak hnga caah luat ter mi kan si ti kan zumh.
Thisen in cawkmi kan si caah kan nunnak zong hi amah nih a uk awk a si I amah caah nung ding mi kan si ti kan zumh caah kan tuahmi paoh hi Bawipa sunparnak an si dih awk a si ti a zummi kan si. Zumhnak hi tuahnak nih a zulh tik lawng ah a nung I tuahnak aa tello ahcun a thi ti kan zumh. Nawlbia zong hi Pathian sin in kan hmuhmi a si caah kan ngeihmi zumhnak nih hlawt ter lo in zumtu kan nun ah Thiangthlarau thawngin tlinter a si ti kan zumh.
Matthai 28:18-20 chung ahcun “Jesuh nih cun a hun naih hna I, “Vancung le vawlei cung I a ummi nawl ngeihnak vialte cu pek ka si cang. Cucaah khuazakip ah va kal u law miphun vialte kha a ka zultu ah va ser hna u; Pa le Fapa le Thiangthlarau min in tipilnak va pe hna u law, kan fialmi vialte hna hi an zulh nakhnga va cawnpiak hna u. Cun hihi philh hlah u: nan sinah a zungzal in, caan dongh tiangin ka um lai,” tiah a ti hna.” Tiah a chim bantukin laimi phun vialte hi vawlei cung khuaza ram kip ah Pathian nih a kan thlah hi miphun dang hna sin ah nun in a Thawngtha phuang ding ah le a sunparnak langhter ding ah a kan thlahmi kan si ti hi kan zumh. Cucaah vawlei miphun vialte nih kan hngalhmi le kan tinco mi Khrih dawtnak hi an hngalh le an tinco ve nakhnga Bawipa nih a ram kauhnak caah rian ngan pi a kan khinh ti zong kan zumh fawn.
A kan chiah cio nak hna miphun nih titsa nunnak caah tuanvo an kan laaknak vialte ah kannih zong nih thlarau ram in an dawtnak cham ve ding ah rian kan ngei ti zong kan zumh. Cucaah laimi phun vialte nih Pathian nih kanmah zohkhenhtu ding ah a hman mi hna miphun vialte sin ah nunnak thanwgtha hi an theih ve I a pennak chung I nunnak an hmuh khawh ve nakhnga Pathian nih tuanvo a kan pek ti zong kan zumh. Sihmanhsehlaw zei lei paoh ah kan nak in a fim deuh mi kan umnak miphun hna hi vawlei fimthiamnak hmang in cawnpiak i thlen cu a si khawh lai lo caah Thiangthlarau bawmhhal nak he kan nun in Thawngtha chim ahcun Bawipa nih a thlen hna lai ti zong kan zumh.
2 Korin 5:18 chung ahcun “Hi thil vialte a tuahtu cu Pathian a si I Pathian nih cun Khrih thawngin kannih a ral a simi cu a hawi ah a kan thlen I midang zong a hawi I ser ve awk rian cu a kan pek.” A ti bantukin Biatak in kan hmuh mi zumhnak thawngin Pathian nih a dawtnak a kan hngalh ter mi paoh nih a sunparnak langhter ding rian a kan khinh ti a zum mi kan si. Bawipa min thangthat si ko seh.