Zumhawktlak nun i theitlai

Atu i ca tawite ka ṭialmi hi hringtu nulepa ca deuh ah asi.. Hringtu nulepa nih hin fale cu kan dawt dih cio ko hna ti cu biatak asi ko. Amah belte kan fale kan dawt ning hna cu kan hmuhkhawhmi an takpum le duhnak zulh hna hi asi deuh... Micheu nulepa cu fale an hngakchiat lio ah hin ihlo bakin kan pawm, kan puak hna i hngilhlo in caan saupi kan um.. Mah ca aṭialtu hi Bawipa zangfahnak thawngin Fapa pahnih le fanu pathum angeimi ka si ve caah fale zohkhenhnak ah tonmi tete cu ka ngei ve. Chim ka duhcemmi cu nulepa nih fale kan dawt ning hi hmuhkhawhmi an pum ca le an eidin dingmi, hrukdingmi hnipuan, an pum damnak tiang lawng hi kan i buaipi khim. Bawipa nih a kan dawtning cu kan thinlung, kan ruahnak, ka pum, kan thlarau tiangin a kan dawt.. Nihin i na fale na dawtning hna hi hnipuan le eidin men, anmah duhnak zulh tiang lawng asi ahcun na fale na dawtning hna hi atlingmi dawtnak chungah alut rihlo tinak asi.
Phungthlukbia 22:6
A zulh awk a simi lam kha ngakchia cu cawnpiak law, a upat tikah mah cucu a pialtak ti lai lo. 

Na fale na dawt taktak hna ahcun a thlarau caah Pathian bia le Bawipa duhning in cawnpiak in zohchunhtlak in na fale caah nangmah nung, cubantuk ṭhiamṭhiam in Pathian fa an si hnu ah an thinlung le ruahnak, pum tiangin Bawipa duhning le lawmhning in ṭhanter hna.. Kan fale tampi hi pum cun an ṭhangtuk nain an thinlung le an ruahnak, an thlarau cu an ṭhanning ahman hrimhrim lo. An ruahnak le an pum, an thinlung aṭhan hmanh ah taksa duhnak le nuamhnak lawng an zuanhnawh ko… Biapi asimi cu Nu le Pa hi fale caah Bawipa kan biakmi le kan dawtning ah zohchunhtlak kan si maw timi hi asi. David Siangpahrang caah cun hringtu anu hi zohchunhtlak taktak arak si…
Fale hi ihlo bak in zohkhenh tiang zong Bawipa duhnak le tinhning asi neisai lo. Na fale caah caan na pek cemmi hi an i nuamhnak le an pum ca men ah maw asi? Biatak cu an thlarau in siseh an thinlung in siseh, an ruahnak in siseh an pum in siseh Bawipa an zumh, an ṭih i an dawtnak he an ṭhannak i an nun dingah caan na pek ve awk asi. Na hmuhmi le na tonmi kipah na nun in na cawnpiak hna maw? David Siangpahrang nih Kanu nih an Biak baktukin kan Biak ve, Kanu nih na rian aṭuan bantukin ka ṭuan ve ati. Na fale nih hin kanu le kapa nih an in Biak bantukin le na rian an ṭuan bantukin ka ṭuan ve caah ka zangfah tuah tiah thla an cam ngam hnga maw?

Vawlei cungah asungbikmi le arawk kholo rosungbikmi na fale hi zeihmanh in cawkkhawhmi le thlenkhawhmi ansi loh. Biatak cu na fale hi an nun chungah annun rawk hmanh sehlaw an thlarau cu atlau kho bal lai lo, an nung chung i an zumh ning tein Bawipa nih bia aceih ko hna lai. Na fale hi zungzal nunnak ah maw naa kalpi hna lai? Zungzal rawhnak hmun ah dah na kalter hna lai? Atu liote hi nangmah le keimah kutchungah an um liote asi… Nihin i na ngeihmi phaisa le na kawlmi dihlak zong in thlenawk le cawkkhawhmi an si lo. Na zeizong vialte hi Bawipa sinah naa kalpi khawh dingmi hna pakhat hmanh an umlo nain na fale cu Bawipa bia in le Bawipa zumh buin na ṭhanter hna ahcun naa kalpi khawh te hna lai.. Amen. Bawipa sinah naa kalpi khawh dingmi na fale caah buailo le na nunnak dihlak peklo in naa kalpi khawhlomi chawva le adang vialte caah caan na pek dihmi hi ka fale ka dawt taktak hna tiin zeitindah na ti khawh?

Atu ah fakpi in ṭial ka duhmi cu fale kan dawtning hna hi taksa men tiang lawng an si i ahmu kho deuhmi nih taksa le ruahnak(fimnak) he kan ṭhanter hna nain thinlung thiang le thinglung ṭha in ṭhanter kan daithlanh i zungzal nunnak ahmu dingmi an Thlarau caah kan ruat lemlo. Na fale hi na hmuhkhawhmi an pum fah lai le rawlṭamfah lai, umnak ngeihlo lai tiang lawng si ti loin hmailei ah Bawipa duhning in an ṭhang lai maw timi he zohkhenh hna uh. Atu I na zohkhenh ning tein an upat tikah an si te ko lai. Atu I caan na pek lengmang mi hna hi Bawipa duhnak le Bawipa lawmhternak leiah na hanpi ko hna ahcun an nun chung vialte sullam angeimi an si zungzal lai I kanu le kapa nih an in Biak le na rian an uan bantukin na caah zumhawktlak tein na rian ka uan i kan zumh ko Bawipa tiah thlacam an ngamh ve te lai. Amen… Nihin I na fale na zohkhenh ning hna le zohchunhtlak na simi nih an hmailei kong ruahchannak apek.. Na fale hmailei ruahchannak hi nangmah nun in cawnpiaknak he aipehtlaimi asi… Na fale hi an pum lawng siti loin an thinlung, an ruahnak, an thlarau tiangin dawt le zohkhenh, lamhmuhsak tiang zuanhnawh cang hna usih….

  1. Zohchunhtlakmi nun angeimi nulepa nih “zohchunhtlakmi fale ahrin ve lai”. 
  2. Bawipa alawmhtermi nun angeimi nulepa nih “Bawipa alawmhtermi fale ahrin ve lai”.
  3. Bawipa aṭihmi nun angeimi nulepa nih “Bawipa aṭihmi fale ahrin ve lai”.
  4. Bawipa nawlngaimi nun angeimi nulepa nih “Bawipa nawl angaimi fale ahrin ve lai”.
  5. Dawtnak nun angeimi nulepa nih “Dawtnak angeimi fale ahrin ve lai”.
  6. Zangfahnak nun angeimi nulepa nih “Zangfahnak angeimi fale ahrin ve lai”.
  7. Bawipa bochan le hngatchan nun angeimi nulepa nih “Bawipa bochan le hngatchan nun angeimi fale ahrin ve lai”.
  8. Nifate Thiang Thlaraua he thlacam hawikomh duhnak nun angeimi nulepa nih "nifate Thiang Thlarau he thlacam hawikomh duhnak nun angeimi fale ahrin ve lai."
  9. Nifate Baibal relduhnak nun angeimi nulepa nih "nifate Baibal relduhnak nun angeimi fale ahrin ve lai."
  10. Nifate Thawngṭha ngeihduhnak nun angeimi nulepa nih "nifate Thawngṭha biatak ngeihduhnak nun angeimi fale ahrin ve lai."
  11. Cangai cu asir in alawn caah “ Cangai fale zong an sir in an lawn ti asi”.
  12. Nangmah na sining te hi “na fale an si ve te ko lai”. 
  13. Na tuh bantukin na zun ve lai timi cu nangmah lawng nih na zun lawng hmanh silo in “Na nun theitlai kha na fale cungah alang ve lai tinak asi chih”.

————-
Psalm 86:16
Turn to me and have mercy on me; show your strength in behalf of your servant; save me, because I serve you just as my mother did.
Salm 86:16
Keimah leiah i mer law ka zaangfah tuah; ka nu nih a rak in biak bantukin kei zong nih kan biak ve caah, thazang ṭhawnnak ka pe law ka khamh tuah.