Hmunzakip ah aummi ka miphun vialte hna Bawipa kawlduhnak hi nan thinlung chungah Thiang Thlarau nih inkhahter cio hram ko hna seh. Kawl zungzal cem dingmi hi zeidang si loin Bawipa kan hmuh i kan i hawikomh zungzal tiang hi kan kawlcem ding arak si. Nangteh an khamhtu na Bawipa hi na tong bal maw? Na hmu bal maw? Hawikomhnak nan ngei bal maw? Biatak cu Bawipa Jesuh Khrih he nai Na ton ve taktak tik lawngah na hngalh dih te lai, a tu lioah ka theih in ka fian ko i ka hngalh ko tiah na ruahmi hi na hngalh taktak mi le na pemh cangmi si loin fiannak tiang lawng na phanhmi an si kho men. Sihmanhsehlaw Bawipa Jesuh he nai ton taktak ahcun na hngalhnak taktak a tling te lai. Amen! Bawipa hmuhduhnak le tonduhnak in hngalhduhnak tiang Thiang Thlarau nih na chungah rianṭuan hram ko seh. Nai hrawng Thawngṭha bia ka ṭial lonak asau i a ka hlammi zong nan um lenmi ka hmuh caah Bawipa ka thangṭhat. Nan hlammi hi keimah si loin Thawngṭha biatak nan haal caah asi. Thawngṭha kan i hrawmhmi cungah ruahchannak ka ngeih bikmi cu Bawipa Jesuh he tonnak le hawikomhnak kan ngeih tiang thluachuah hmu cio usih tihi asi. Thawngṭha kan hrawmhmi hna na rel thawngin zeidah an pek i an ṭhathnem tihi ka ruah ve lo awk aṭhalomi asi. Na rel tiang lawng si ve ti loin Bawipa kawlnak leiah lungthawhnak le lungṭhawnnak an peknak thawngin Bawipa he naihniam taktak in nan umṭinak cio ah Bawipa nih thluachuah kan pek piak ko seh.
Nihin ka lungah aum ngaimi hrawmh kan duhmi cu sual ngaihchihnak kan tuah tikah zeibaktuk thinlung in dah kan i ngaihchih ah Bawipa lung aton i kan lawmhter cem timi hi hrawmh kan duhmi cu asi. Mizei hmanh sualnak le palhnak, ṭhatlonak hi kan tuah cio mi chungin Bawipa nih a kan duhpiakmi cu nan sualnak ngaihchih in mertak cang hna uh tihi asi. Cu hmanh ah minung tampi nih kan sualnak ngaihchih in kan mertak tikah hin Bawipa alung kan fahtermi damter lei hnak in kan tuahmi sualnak ruangah dantatnak le chimhrinnak kan in dingmi kan luat khawhnak ding caah hin kan i ngaihchihmi a tam deuh in ka hmu. Sihmanhsehlaw Pathian lung a tongmi le a lawmhtermi sual ngaihchihnak cu Pathian cung hrimhrim ah kan sual ti hngalhnak in kan tuahmi sualnak ruangah a lung kan fahtermi damternak dingah ngaihthiam hal in sual ngaihchih hi asi. Sualnak na tuahmi naa ngaihchih tikah dantat le chimhhrin na ṭih ruangah maw na ngaihchih? Pathian alung na fahtermi na hngalh i damter na duh ruangah dah naa ngaihchih. Ngaihchih ciocio asi nain Pathian thinlung ahcun tampi ai dang lai ka zumh.
- Dantat ṭih ruangah ngaihchihmi cu Pathian na dawt ruangah ngaihchihmi si loin harnak ton na ṭihmi le chimhhrinnak ton na ṭihmi ruangah naa ngaihchihmi asi..
- Pathian alung na fahtermi na hmuh caah naa ngaihchihmi cu dantatnak le chimhhrin dingmi na ṭih ruangah siti loin Pathian na dawt tuk ve ruang i alungthin na faktermi damter dingah naa ngaihchihmi asi...
- Tahchunhnak: Nu nih va cungah asual tikah a va he ṭhen a ṭih ruang i ngaihthiamnak a halmi nih maw avapa thinlung a damter deuh lai? Avapa thinlung a fahtermi vialte ahmuh ruang i aa ngaihchih taktakmi nih dah avapa thinlung a damter deuh lai? Minung tampi nih Pathian thinlung kan hmattermi damter tu hi zuanhnawh loin Pathian thinlung kan hmattermi nih a chuahtermi zawtnak tu hi damter dingin kan zuanhnawh zungzal tawn... Biatak cu Pathian thinlung kan hmattermi adam hlan chung cu hma nih cun zawtnak achuahter lengmang ko lai. Hma nih achuahtermi zawtnak zuanhnawh hnakin Pathian thinlung kan hmattermi damter hi zuanhnawh usihlaw hma adam taktak ahcun zawtnak cu amah tein atlaunak hmanh na hngal te lai lo. Chim ka duhbikmi cu Pathian thinlung kan hmattermi vialte tu hi damter dingin sual ngaihchihnak he fuhpanh cang hna usihlaw hma nih achuahtermi zawtnak, dantatnak le chimhhrinnak hna hi cu khuazei an phanh hmanh kan hngalhlo caan an phan te lai.
- Biatak cu nihin i na tonmi zawtnak le damlonak, tlamtlinlonak, harnak, sifahnak, dantatnak le chimhhrinnak vialte hna hi Pathian thinlung na hmattermi, hma nih achuahtermi zawtnak theitlai tu an si. Pathian thinlung na fahtermi hma a dam hlan chung cu mah vialte hi damter dingah zuanhnawh hmanh law damnak tling na hmu bal lai lo. Damnak tling na hmuhnak ding ahcun ahram asimi Pathian thinlung na fahtermi adam ta a hau...
- Minung tampi nih kan buai lengmang mi cu hma nih a chuahtermi zawtnak, taksaknak le tlangrai hna hi heh tiah kan zuanhnawh i damter kan izuam. Hma adam hlan chung paoh cu sii na din lengmang zongah sii nih chikhat an bawmh lai nain sii tha adih in na tak asa ṭhan lai i na zawt kel in na zaw ṭhan ko lai. Biatak cu sualnak kan tuahmi vialte hi Pathian cung hrimhrim ah an si caah Pathian lung kan fahtermi vialte le Pathian thinlung kan hmattermi vialte damternak dingah sual ngaihchihnak taktak he Bawipa hmai kan kawl i kan fuhpanhnak lawng nih damnak tling taktak kan hmu lai. Amen...
- Bawipa nih a duhcemmi le alawmh cemmi sual ngaihchihnak cu kan tuahmi sualnak ruangah dantatnak le chimhhrinnak, zawtnak ttih ruangah ngaihchih hi si loin Pathian cungah kan sualmi ruang hrimhrim ah Pathian thinlung kan hmattermi le kan fahtermi kan hngalh ve ruang tu ah sual ngaihchih in Bawipa zangfahnak kan kawlmi hi aduhmi cu asi...
Dantat le chimhhrin na ṭih ruangah maw na sual naa ngaihchih lai? Pathian na dawt i alung na fahtermi damnak dingah dah na sual naa ngaih chih lai.. Pathian hmai kan kawlmi vialte hi dantatnak le chimhhrinnak ṭih ruangah si ti loin Pathian lung kan fahtermi damter dingah ngaihchihnak he fuh cang hna usih. Pathian lung kan fahtermi ruangah ngaihchihnak he kan fuh tikah dantat ṭihnak ruang si ti loin Pathian alung kan fahtermi damternak caah asi i ka tuahmi sualnak ruangah Bawipa thinlung ka fahtermi damternak caah fuhpanhnak nih cun Bawipa a lawmhter hrimhrim lai.. Pathian nih kan tuahmi sualnak le ṭhatlonak ruangah dat a kan tat tikah hin kan cungah a thinhunnak damnak ding caah si loin Amah hmai ka kawlnak ding ca tu ah asi ka zumh. Ka tuahmi sualnak ruangah Pathian a lung ka fahtermi damnak dingah timi sual ngaihchihnak lawng nih Pathian lung ka fahtermi hi a damter khawh. Amen! Pathian alung na fahtermi damter maw na zuanhnawh lai? Pathian na lawmhter lonak langhtertu dantatnak le chimhhrinnak lohter dah na zuanhnawh lai? Pathian alung kan fahtermi kan hmuhkhawh taktak ve ruangah kan fuh ko ahcun dantatnak le datlonak cu Amah nawl an si dih. Biapibikmi cu Pathian kan cungah ai lawmh hi asi. Amen! Pathian a lawmhter ding asi ahcun dan a kan tat hmanh ah kan caah aṭhabik asi zungzal ko. Biatak cu Pathian nih dan a tat tikah hin ai lawm lai ka zum loh, amah belte ngaihchih in Bawipa fuhpanh kan hngalhkhawh ve lo caah hin dan a tat tawn asi deuh.
Paul sin in siseh Jesuh Khrih sin in siseh Lamkaltu hna sin in siseh Thawngṭha an phuannak ah a hrampi in an dirpi lengmang mi cu nan sualnak i ngaihchih ulaw nan tuah lengmang mi sualnak hi mertak cang hna uh tihi fakpi in an chim lengmang mi asi. Cucu Keimah bantukin nunnak dihlak in Pathian aduh i arian aṭuanmi paoh nih fakpi in kan dirkamh ciomi Thawngṭha biatak asi ko. Atu i ka van ṭial hnawhchanbikmi Thawngṭha cu sual kan i ngaihchih tik le sualnak kan tuahtawnmi kan mertak tikah hin zeibantuk thinlung nih hin dah Bawipa a lawmhter cem hnga tihi chim ka duhmi cu asi. Bawipa zangfahnak le velngeihnak kan kawl cionak ahhin kanmah caah ṭhatnak ding lawng si ve ti loin Pathian a lawmhtermi thil kan zohchih thiam ve tikah Bawipa kan cungah ai lawmhnak nih cun pumpak kanmah cung cio caah lawmhnak tling a kan phanhpitu an si dih hrimhrim lai. Sualnak ngaihchih in Bawipa hmai ah azangfahnak na kawl tikah dantatnak le chimhrinnak ṭih ruangah si ve ti loin Kan tuahmi sualnak le ṭhatlonak ruangah Pathian thinlung kan fahtermi damnak ding caah azangfahnak kan hmuhnak ding ca tu ah Bawipa hmai kawl cio cang hna usih tiah kan sawm hna. Bawipa kan cungah alawmhnak ni a tlan ahcun Bawipa asunparnak zong kan pum in siseh kan thlarau in seh kanmah cung in siseh mikip cungah siseh alanghter ve te lai. Amen! Bawipa nih sunparnak co zungzal sehlaw Bawipa adawmi vialte nih Amah he thukchin lengmang in hawikomhnak kan ngeihchinnak ah thluachuah kan pechin cio ko seh...
—
SALM 51:4
Ka sualnak cu, nangmah cungah, nangmah cung hrimhrim ah a si i a ṭhalo ah na ruahmi kha ka tuah.. Cucaah cun bia na ka ceih tikah na hmaan ko i sual na ka phawt tikah na ding ko.
LAMKALTU 26:20
A hmasa bik ah Damaskas khua le Jerusalem khua ah, cun Judah mi hna umnak ram dihlak ah, cun Jentail mi hna sinah, 'Nannih nih nan sualnak kha i ngaichih u law Pathian leiah khan i mer u law nan i ngaihchihnak a langhtertu thil kha tuah hna u,' tiah ka ti.