Minung kut in sakmi biakinn le jesuh khrih nih sakmi biakinn

Pathian umnak caah minung kut in sakmi Biakinn na upat le na ṭihzah tlukin Jesuh Khrih nih Amah umnak dingah sakmi na pum hi na ṭihzah in na upat awk le na dawt i na duhpaoh in na hman hrimhrim awk asi lo. Pathian umnak caah tiin minung nih sakmi biakinn pulpit cungah khin sualnak phunkip tuahnak in le kuakzuknak le zuudinnak hna ah hei hmang usihlaw ahohmanh athin ahunglomi le ailawmmi kan um hrimhrim lailo... Keimah nih ka theihmi chungah hin Pathian umnak le biaknak caah tiin minung kut in sakmi Biakinn ah zuu an ding, kuak an zuu timi le sualnak phunkip tuahnak ah an hmang timi cu ka hngal bal hrimhrim lo.. Tuahngam dingah aruatmi zong  kan um lai ka zum hrimhrim lo.. Minung nih sakmi Biakinn chung hmanh ah sualnak kan tuah ngamlo i kan duh paoh in kan um ngamlo ahcun zeitindah Jesuh Khrih hrimhrim nih Amah pum in Amah umnak ah asakmi kan pum hin kan duhmi sualnak paoh kan tuah ngam hnga? Biakinn chung hmanh ah kuak na zuk ngamlo ahcun zeitindah Jesuh Khrih umnak inn na pum, Thiang Thlarau Biakinn hin kuak na zuk ngam.. Kuak lawng silo in sualnak phunkip khi na tuah ngam..

Zumtu tampi nih cun Pathian umnak le biaknak caah minung kut in sakmi Biakinn hi kan dawt ngaingai, kan dawt awk le kan ṭihzah hrimhrim ding cu asi ko. Minung kut nih sakmi Biakinn hmanh na dawt ko ahcun Jesuh Khrih nih sakmi Biakinn na pum hi na dawt i ṭha chinchin in na zohkhenh awk asi hnga lo maw? Minung tampi cu minung kut in sakmi Biakinn hi kan dawt, kan ṭihzah, kan upat tlukin Jesuh Khrih nih athih hnawhmi, anunnak in acawkmi kanmah pum hi kan daw, kan ṭihzah in kan upat naisai lo.. Biatak cu Jesuh Khrih nih athih hnawhmi hi minung kut in sakmi Biakinn hi silo in Pathian nih Amah he lo in sermi minung tu hi athihhnawhmi cu kan si...

Minung kut in sakmi biakinn hmanh cutlukin kan upat le kan ṭihzah ahcun Jesuh Khrih hrimhrim nih Amah umnak dingah athisen le apum in acawkmi le asakmi kan pum, Thiang Thlarau biakinn (Jesuh Khrih Pum) hi kan upat le kan ṭihzah chinchin awk asi hngalo maw? Kan pum hi Jesuh Khrih nih apum le athisen in cawkmi, Amah umnak ah sakmi Thiang Thlarau Biakinn asi... Minung kut in kan sakmi biakinn kan upat le kan ṭihzah tlukin Jesuh Khrih nih athisen le apum in acawkmi le asakmi kan pum Pathian  Biakinn hi ṭihzah le upat in daw usihlaw Bawipa nih a nunnak pek in asak hnawhchanmi hi sullam angei taktak hnga...

Minung kut in sakmi cu Biakinn tiah auh asi i thing, tlakrawh le canphio hmang in sakmi asi. Jesuh Khrih nih apum hrimhrim in Amah umnak caah sakmi cu kanmah pum hi asi i thing, tlakrawk le canphio hmang loin Amah pum(Jesuh Khrih pum) ahmang.. Minung kut in sakmi biakinn cu minung nih hmuhkhawhmi lengah sak asi.. Jesuh Khrih nih sakmi inn cu lenglei ah silo in minung lungthin chungah Amah umnak inn, Biakinn (Pathian Biakinn, Thiang Thlarau Biakinn) asak..
Jesuh Khrih nih Amah umnak ding caah sakmi kan pum cu Thiang Thlarau Biakinn tiah auh asi..
Jesuh Khrih nih Amah umnak ding caah sakmi kan pum cu Pathian Biakinn tiah auh asi..
Jesuh Khrih nih Amah umnak ding caah sakmi kan pum cu Pathian lo tiah auh asi i Pathian inn ti zongah auh asi...

Jesuh Khrih nih Amah umnak ding caah sakmi kanmah zumtu, Pathian fale vialte hi Jesuh Khrih pum tiah auh kan si i pumpak cio ah aṭengnge tiah auh kan si.. Zumtu Pathian fale, hrinṭhan cangmi, Thiang Thlarau ngei cangmi nangmah le keimah hi Jesuh Khrih pum kan si timi khi hei i hngalh in pumpak cioah kan i herh i kan ipeh dih timi khi hei hngalh dih usihlaw zeitlukin dah sullam kan va ngeih hnga i hmual kan va ngeih hnga?

Pathian umnak le biaknak ah minung kut in sakmi Biakinn hmanh na ṭihzah, na dawt i na upat ko ahcun Jesuh Khrih nih Amah umnak ah asakmi na pum, na thinlung, na zeizong vialte hi na dawt, na ṭihzah awk le na upat awk asi. Minung nih sakmi Biakinn hmanh na upat le na ṭihzah ko ahcun Jesuh Khrih hi cu na ṭihzah bak awk le na upat i na dawt bak awk cu asi ko... Jesuh Khrih nih athisen le apum in cawkmi le Amah umnak ding caah sakmi cu nangmah hrimhrim hi an si ko.. 

Biakinn cawk le sersiam kan duh tlukin Pathian dawt, Bawipa Jesuh Khrih dawt, Thiang Thlarau dawt le kanmah le kan innchungkhar dawt i sersiam, minung dang dawt le sersiam kan timi hi Pathian Fa an si ve khawhnak hnga kan bawmhmi hna khi hei sihsehlaw vawleipi hi adam chin lengmang ko hnga... Bawipa nih sunparnak co chin ko seh... 
1 Korin 3:9, 3:16-17, 1 Korin 6:19-20, Rome 8:9, Lamkaltu 20:28, 1 Peter 2:24,