Maw ka miphun vialte hna le ka unau vialte hna, Pathian bia nih hin zeitlukin dah an thawt ve i abia ah hin naa nuamh ve. Pathian a ngei lomi caah cun thawtnak a um bal lai lo i pawpi a ngeilo mi caah cun rawlttam a um ve bal lai lo. Pathian hi kaa lawngin dawt khawhmi Pathian a si hrimhrim lo ee. Bawipa nih kan miphun a kan zangfah i ram tthatnak ah khua kan sa cang hna, tlamtingnak tampi chungah kan nung hna nain kan nganhmi a um i cucu Pathian kan lawmhter lo mi hi asi. Nihin kan sining tein kan nun lengmang ko ahcun tuhnu kumhra ah hin zeidek kan lawh te hnga. Ahlei in ramdang a phan cangmi kan miphun nih Pathian kan fuhpanh ning hi zoh tikah atthang lei si loin tumchuk lei kan panh cuahmah ko hih. Cuve bang in Lai lei zong phaisa a tam lai i Pathian duhnak cu kan kaltak cuahmah ve ko lai ka zumh. Khrihfabu kip cioah ai pummi kan tlawm cuahmah, ramdang kan phanhkaa cio Pathian kan kawl ning le nihin Pathian kan kawl ning cu tampi kan i dang cang hih. Ka thinlung a fak ngaingai mi cu kan miphun hi kan vaivuai te sual ko lai maw tihi ka phang. Pathian nih thimmi le dawtmi miphun si hi attha i lawmh aum tuk nain Pathian nawl ngeih lo ahcun ttih a nung cemmi asi ve. Israel tuanbia kan theih lengmang mi kan chim hna hmanh lai, Izypt ram in Moses nih a chuahpi hna ah hin patling lawnglawng hmanh tingruk leng an si nain Kanaan ram a lutmi cu minung pahnih lawng an si. Ramcar chungah tingruk cu Pathian nih a rak thah dih hna i minung pahnih lawnglawng an nung, kamhmi ram chungah minung pahnih te lawng an rak lut. Na ruat ve bal maw? kan miphun hi Bawipa nih thimmi le dawtmi kan si kan ti cio nain nihin kan dirhmun zoh tikah Pathian duhnak kan kawl lo hih. Pathian hmuh loin a duhnak hmuhkhawh le tuahkhawh hrimhrim asi lo. Israel mi hna Moses nih a rak hruai lio hna ahhin an lakah chun ah khuadawn in zan ah meiceu in Pathian a rak umpi ko hna bu ah an rak rawk ko. Pathian hrimhrim an sinah a um zungzal ko hi an mit bakin an rak hmuh khawh ko nain na sual peng ko. Nihin kannih zumtu sin zongah Jesuh nih candongh tiang nan sinah ka um lai tiah bia a kan kamh ve.. Na sin a um cu na hngalh taktak ve cang maw? Kannih miphun vialte nih hin teh Pathian nih a kan umpi taktaknak te kan hngal in a duhnak kan zul ve cang maw? Kanmah khuakhannak ah dah kan tang peng rih ko lai?
Minung vialte sinin Bawipa nih a duhbikmi hi zeidah asi hnga. Phun tampi in kan chim cio ko lai nain keinih chim ka duhmi le Bawipa nih a chimmi cu hihi asi. Kan Pathian hrimhrim nih a chimmi cu ka duhbikmi cu fek tein nan ka dawt le nan ka hngalh hi asi tiah a ti. Amen. Hal kan duh ve mi cu Bawipa hi na daw maw tihi asi? Minung tampi nih le nangmah hrimhrim nih na ka chimh dingmi cu ka dawt ko, Pathian hi ka dawt ko tikhi asi ko hnga. Pathian dawt kan ti lengmang mi hi teh zei cem khi dah asi hnga? Pathian nih a kan halmi cu fek tein kan dawt le kan hngalh hi asi. Dawt kan ti lengmang mi hi bia in chimmi khi si loin kan dawtmi hna cung i kan chimmi khi dawtnak cu asi. Cu na dawtmi nu/pa cu na hmuh na ton hlan le pehtlaihnak in hawikomhnak na ngeih hlan ahcun zeitindah na dawt khawh lai i na duh khawh lai? Dawtnak hi na dawtmi sinin hmuhmi le comi na ngeih ve lo ah zeitindah na dawt khawh lai? Ka chim duhbikmi cu Pathian duhning taktak in na dawt khawhnak ding ahcun Pathian sinin Amah dawtnak na co hmasa a hau ti kha ka chim duhmi cu asi. Mi tampi nih nan ka chimh dingmi cu Fapa Jesuh Khrih in pei Pathian nih a kan dawtnak cu a chim i a langhter cang i a kan pek cang cu nan ka ti ko lai. Cucu asi taktak ko nain minung tampi cu theihnak tiang lawngah kan tang i Pathian sin taktak in Dawtnak a co lomi le Jesuh Khrih a chungah aum lomi tampi kan um. Pathian nih dawtnak in a kan pekmi Jesuh Khrih na chungah a um hlan chung cu dawtnak tling na ngei kho bal lai lo i Pathian nih nan ka dawt pei ka duhko cu a timi zong cu na tlinh kho ve bal lai lo...
Pathian hngalh kan ti lengmang mi zong hi mi nih chimnak tiang le Thawngtha chimtu nih an chimnak tiang ah hin hngalhnak tling an phan lo i Baibal kan relmi hngalhnak zong hi hngalhnak tling an phan hrimhrim lo. Mah ti ka ti tikah hin minung tampi nan khuaruah zong a har kho men nain biatak cu Baibal hi Pathian nih thaw a chuah hnawhmi asi ve caah tthawnnak a ngeimi asi. Thawnnak angeinak cu catlak cungah si loin minung thinlung cung tu ah Thiang Thlarau in thawnnak a langhter. Baibal cu na zumh taktak ko ahcun ziah naa nunpi ne lo, naa nunpi ahcun ziah Pathian nih bia a kan kam bantukin rian a ttuan ne lo tihi ruahlo awk tthalo asi. Baibal kan relmi le Thawngtha chimtu hna sin in kan theihmi Jesuh kong le Cathiang vialte nih an tial hnawhchanmi pa Jesuh Khrih he tonnak kan ngeih hnu lawngah hngalhnak tling kan ngei. Phundang in mi pakhat pa hi ca in a kong na rel lengmang mi le amah mipum taktak in na tonmi cu tam taktak ai dang lai. Cuve bantukin nihin zumtu tampi cu Jesuh Khrih kong hi minung tampi sinin kan theih cang nain kanmah nih tonnak a ngei rih lomi lawngte kan si. Bawipa Jesuh Khrih zumhnak in Pathian nih kamhmi Thiang Thlarau na hmu ve cang maw? Thiang Thlarau he hawikomhnak teh na ngei maw? Jesuh Khrih zumhnak thawngin Pathian nih ka fa an ti cang in Pathian hi na hngalh taktak ve cang maw? Mi nih chimmi Pathian hi maw ka hngalh na ti, Nangmah hrimhrim nih na tonmi Pathian dah na hngalh ve cang... Keinih ka chim dingmi cu hihi asi. Biatak asi i cucu Keimah hrimhrim nih hin Bawipa zangfahnak thawngin sertu Pa ka hngalh ve cang i ka ton ve cang. Amen. Jesuh nih a chimmi cu a ho hmanh nih an ka hngal lo i ka Pa zong hi a hohmanh nih an hngal ve lo, Pa lawnglawng nih a ka hngalh i Keimah lawng nih ka Pa hi ka hngalh ve tiah ati. Cun Keimah nih an sinah ka phuanmi hna lawng nih ka Pa hi an hngalh ve tiah ti. Biatak cu Pa loin Fapa hngalhnak lam a um lo i Fapa loin Pa Pathian hngalhnak lam a um ve lo ti cu a fiang cang! Jesuh nih a chimmi cu ka Pa nih zeizong vialte hi ka kut chunngah a ka pek dih cang tiah ati. Zeizong vialte chungah a tling dih i kanmah le Pa Pathian hngalhnak tiang zong hin Jesuh Khrih cungah a um dihmi an si. Pathian tlamtling tein na hngalh khawhnak ding cu lamkhat a um i cu lam cu Jesuh Khrih sin lawnglawng in asi...
MATTHAI 11:27
Ka Pa nih zeizong vialte kha ka kut chungah a ka pek dih. Pa dah ti lo nih cun ahohmanh nih Fapa kha an ka hngal lo i Fapa le an sinah a phuanmi hna dah ti lo nih cun ahohmanh nih Pa kha an hngal lo.
Adonghnak ah fakpi in ka ruahpi ulaw ti ka duhmi cu Bawipa hi na daw taktak maw? A hngal te na hngal taktak ve cang maw? Pathian na hngalh lo le na dawt khawh ve rih lo ahcun zumtu ka si na timi hi pakpalawng bak asi. Zumhnak nih hin ruahchannak tampi a kan pek, Sihmanhsehlaw zumhnak kan ti lengmang mi nih kan zumhmi Jesuh Khrih he tonnak le pehnak, hawikomhnak tiang a kan phanhpi lo ahcun fak deuh in kan zumhnak hi kan ruah caan asi cang. Zumtu vialte kan nun ah a biapi cemmi cu Jesuh Khrih a zummi nih Fa sinak kan ngeih bantukin Fa asimi nih cun Pa cu kan hngalh hrimhrim awk a si. Pathian hi fiang tein na hngalh lo ahcun na daw kho ve hrimhrim lai lo. Na hmuh ballo mi le na ton ballo mi cu na daw kho bal lai lo. Hiti ka ti tikah hin Pathian cu zeitindah kan hmuh khawh lai i kan ton khawh lai tiah nan ruah men lai nain biatak cu zumtu vialte nih hmuh dingah le ton ding ah hin pei a fapa hmanh zuah loin a run thlah cu. Mah ti ka ttial tikah hin keimah nih ka hngalh lomi le ka dawtlo mi kong si loin fek tein ka dawtmi cu Pathian asi ti hi asi i fiang tein ka hngalhmi cu ka Bawipa ka Pathian hi asi ti hi asi. Nangteh fiang tein na hngalhmi Pathian kong hi na chim ve in fek tein na dawtmi Pathian kong hi na chim ve cang lai lo maw? Biatak cu Dawtu Pa he nan i ton hlan chung paoh cu a tu i ka ttialmi bia vialte hi na caah khuaruahhar asi ko lai. Dawtu pa na ton taktak tik lawnglawngah Pathian cu na hngalh khawh lai i na dawt kho ve te lai.... Tuahnak tampi in Pathian dawt rak tim duh hlah, Amah he nan i ton hnu ah Amah duhning in dawt ning an chimh te ko lai... PATHIAN NIH KA DUHBIKMI CU FEK TEIN NAN KA DAWT LE NAN KA HNGALH HI ASI TIAH ATI... Jesuh Khrih thawngin kan Pathian nih sunparnak co dih ko seh.
--------
HOSEA 6:6
Ka duh bikmi cu fek tein nan ka dawt hi pei a si cu, nan raithawinak hi a si ṭung lo, Ka mi nih nan ka hngalh hi pei a si cu, khanghthawinak nan ka pekchanh hi a si ṭung lo.