Kimot Ministry Kong

Kimot

Vawlei cung khuazakip ah a um mi laimi phun vialte chung ah Bawipa ram caah pumpek in rian ka tuan ve lai tiah biakhiahnak ngei in mah nunnak sungh in rian a tuan ti mi kan si hna. Minung fial chom le hnek chom si loin Thiangthlarau thawnnak le lamhruainak thawngin Zisuh Khrih chung ah nung in Pathian sunparnak a langh khawh nakhnga zumhnak le dawtnak he rian a tuan mi kan si.

Mah pumpak thangthat kawlnak caah siloin kan tuahmi vialte hi Bawipa sunparnak caah si ko seh timi lungput he zumhnak in hmai nor mi ralkapbuu kan si. Kolose 3:23 ahcun, “Zei thil nan tuah paoh ah, minung caah si loin Bawipa caah kan tuan ti lungput ngei in nan lungthin dihlak tuan u. Bawipa nih nan tuan man an pek hna lai kha philh hlah u; a mi ca I a chiahmi laksawng kha an pek hna lai. A rian nan tuanmi bawi taktak cu Khrih kha a si.” a ti. Bawipa min thangthat si ko seh!.

Pumsa duhnak le mah zawnruahnak kal taak in Khrih caah mah vailamtah put in riantuan awk ah sining dihlak he Bawipa rian ah manhlo ngai in rian a tuan mi kan si. Mah pumpak nunnak ah Thiangthlarau he hawikomhnak ngei in le Khrih chung ah kan nunnak fehter hmasa in kan chungkhar, kan hawikom, kan khrihfabu cio ah nun in thawngtha phuan ding ah thlarau dawtnak thinlung dihlak he kar a hlang mi kan si.

Pumpak cio nunnak ah siseh, innchungkhar ah siseh, khrihfabu ah siseh Khrih he pehtlaihnak a feh khawhnak hnga le Bawipa ram kauhnak caah ti in mah lungtho tein pumpeknak he thlacamnak in siseh, thawngtha chimnak in siseh Bawipa ram caah rian a tuanmi kan si. Cathiang chung Rom 14:7 ah cun “Ahohmanh mah ca lawngah kan nung lo, ahohmanh mah ca lawngah kan thi lo; kan nun ahcun Bawipa caah kan nung i kan thih ahcun Bawipa caah kan thi. Cucaah kan nun ah siseh, kan thih ah siseh, Bawipa ta kan si.”a ti bantukin kan miphun hawi si hna seh, vawlei cung mi vialte nih si hna seh Bawipa dawtnak an hngalh ve khawh nak hnga Khrih thawnak bochan in le Thiangthlarau umpinak le lamhruainak bochan in kan sining dihlak he Bawipa rian a tuan mi kan si.

Thiangthlarau nih mi thinlung chung ah rian a tuan i a pennak a kauh khawh nak hnga tiin pumpek a duh mi vialte riantuan ti mi kan si caah nang zong Bawipa nih na thinlung chung ah amah sunparnak caah pumpek in riantuan duhnak thinlung an ngeih ter ve a si ahcun hi Bawipa sunparnak rian ahhin a lam kip in zeitik caan paoh ah tel khawh a si ve. Na thinlung, na ruahnak, na thazaang, na caan, na ngeihchiah pek in Bawipa pennak a kauh chin khawhnak caah le a sunparnak cu vawlei cung khuazakip i a langh khawhnak hnga caah Bawipa nih an hngah ko.

Kanmah pumpak ah luatnak tling a um khawh nakhnga caah siseh, cu luatnak tling ngeih a duh ve mi caah Thlarau, thinlung, taksa ah Thiangthlarau thawngin luatnak tling kan hmuh cio khawh nakhnga pakhat le pakhat a bawm chanmi buu kan si caah Luatnak tling hmuh a duh taktak mi paoh nih thlacamnak rak cah khawh zungzal a si.