Aho asi na ka ti ve dah?

Nihin zumtu vialte kan dihlak ning hin ahodah Jesuh Khrih hi asi tiah ihal cio usihlaw kan chim cio dingmi cu Pathian fapa, van in vawlei ah minung vialte caah Nunnak Petu Pa asi tihi kan ti cio hnga. Sihmanhsehlaw na lehmi hi nangmah nih tonmi le a tak in nan i hawikomh hnu ah na chimmi asi lo ahcun mi nih chim chinmi, Baibal nih an chimhmi na chimmi tu khi asi. Cucu Jesuh Khrih nih "aho asi na ka ti ve dah" tiah an hal duh taktak mi khi asi loh. Mi nih chim chinmi le Baibal nih a kan chimh chinmi Jesuh Khrih kong na chimmi hi cu nunnak taktak a phan cangmi hna nih Jesuh Khrih kong kan chim ning asi hrim lo. Nunnak a phan cangmi le Pennak chung a um cangmi hna nih Jesuh Khrih kong kan chimmi cu kanmah nih kan tonmi le hmuhmi, Amah Jesuh Khrih he hawikomhnak kan ngeih cangmi hi pei kan chim cu. Cucu na nunnak in na teh vemi te kha "Jesuh nih aho asi na ka ti ve dah" tiah an hal duh ve mi cu asi..

  1. Jesuh Khrih anun lioah arak zultu hna pahnih cu Emmaus khua lei an kalpah ah Bawipa Jesuh nih arak ton hna nain Bawipa asi an rak hngal hrimhrim lo. Changreu acheu i apek hnu hna lawngah an rak hngalh. Aruang cu an rak umtti lo tuk le hawikomhnak tlawmte lawng an rak ngeih caah asi. (Luka 24:13-32). 
  2. Peter le azultu vialte nih cun Jesuh Khrih hi ahodah asi kha mi nih chimhchinnak in si loin Anmah nih tonnak le umttinak in an rak hngalh. Mary Megdalin cu Bawipa Jesuh Khrih nih thihnak in athawh hnu ah" Mary tiin a auh tikah Rabboni tiah fawite in arak lehtertu cu thukpi in Bawipa he hawikomhnak an rak ngeihciami thawngin arak si. (Johan 20:16) Bawipa Jesuh he umttinak le hawikomhnak na ngeih ballo ahcun fiang tein cun na hngal kho ve bal lai lo. Bawipa Jesuh hi aho dah asi ti fiang tein an hngalhtertu cu Amah he Thiang Thlarau in umttinak le tonnak hin asi lai.
  3. Samaria Nu nih a khuami hna cu ka tuahciami vialte a ka chimh dih tu pa hi Messiah cu asi kho hnga maw? tiah achimh hna, Cu thawng cun khuami cu Bawipa sinah an va kal i Amah chimmi le Amah hrimhrim an ton tikah " Minu nangmah chimmi ruang lawngah si ti loin Kanmah hrimhrim nih achimmi kan theihmi ruangah Amah hi vawlei khamhtu asi ti cu kan hngalh cang i kan zumh cang" tiah an ti. Biatak cu mah nih tonmi Jesuh Khrih kan hngalhnak kong hi kan chim cio awk asi. (Johan 4:29-42)
  4. Jesuh Khrih nih Mitcawpa cu damnak a pek tikah a ka damtertu cu Bawipa Jesuh asi ti a hngalh nain Ahmuh ballo caah ahosat asi kha afiang ti lo. Aruang cu amit acawt lio lawngah arak ton caah asi. Amit khua ahmuh hnu ah Bawipa nih aton tthan i Mifapa hi na zum maw? tiah arak hal. Mifapa cu ka zumhnak hnga ahodah asi ka chim tuah tiah arak leh ve. Jesuh Khrih nih nangmah he ai chawn lengmangmi hi ka si tiah a ti tikah "Ahmai ah akhuk aibil i Bawipa ka zumh' tiah ati. Amen! (Johan 9:1-38) Biatak cu Bawipa nih hin sualnak mitcaw kan si chung i damnak kan hmuh tiang lawng si loin kan mit nih khua a hmuh hnu hrimhrim zongah hin fiang tein ka hmu hna seh ti a duh. Amen! Bawipa hi hmuh le ton nai tim ve cang lai lo maw? Bawipa nih atimi cu lungthin taktak in a ka kawlmi nih nan ka hmuh lai? tiah ati. Lungthin taktak in na kawl ahcun na hmuh ve hrimhrim ko lai. Nangmah nih na hmuhmi le fiang tein na tonmi Bawipa Jesuh Khrih kong hi rak chim ve cang.
  5. Baibal le Thawngtha chimmi vialte hna zong hi mi nih chimchinmi le ttialchinmi tiang lawng asi ahcun hmual angei tuk hnga lo. Sihmanhsehlaw Thawngtha kan theih lengmang mi le Baibal ka rel lengmang mi hna hi mi nih chimchinmi tiang lawng si loin anmah nih an rak tonmi le hmuhmi, ngeihmi hi an kan chimh ciomi asi. Cubang in nihin zumtu vialte zong hi mi nih chimchinmi le Baibal relnak tiangin kan theihmi tiang lawng si ti loin kanmah nih tonmi le hmuhmi, hawikomhnak kan ngeihmi tuhi tehte kan khang ve awk asi. Biatak cu Bawipa Jesuh he  nai ton ballo le Pathian he bia nan i ruah ballo ahcun "AHO ASI NA KA TI VE DAH" timi bia halnak hi cu na let kho hrimhrim bal lai lo. 

Caan tampi ahcun mi nih an tonmi le Baibal nih a kan chimhmi Jesuh Khrih kong hi chimh le ceih cu kan huam ngai nain kanmah nih kan hmuhmi le kan tonmi Jesuh Khrih kong hi cu chim awk kan ngei tuk lo ti awk asi. Paul nih voi tampi lunghmuih taktak in le lungsinak nganpi he a chim lengmang mi cu Jesuh Khrih nih arak tonnak kong hi asi. Nangteh Jesuh Khrih nih an tonnak kong le bia an ruahnak hi chim awk na ngei ve cang maw? Mi nih an chimmi le Baibal nih a ti, Paul nih a ti, timi ah hin dah na tang rih ko lai.. Jesuh Khrih nih a kan duhpiak bikmi cu pumpak cio in Amah he ton le hawikomhnak ngeih ve hi asi. Thawngtha hi Baibal relnak le chim thiamnak lawng in a tling hrimhrim lo i Thawngtha taktak asimi Jesuh Khrih he tonnak le hawikomhnak ngeihnak tu he hin a tling. Atlingmi Jesuh Khrih he ton hnu ahcun tthawnnak nih a zulh zungzal, Pathian Pennak cu chim sawhsawhnak chungah um loin tthawnnak, dawtnak, daihnak, remnak nih an van zulh zungzal ve. Thawnnak lakah angan bikmi cu mah le mah ukkhawhnak te hna, taksa duhnak teikhawhnak te hna hi an si i Bawipa Jesuh he ton hnu ahcun taksa duhnak te hna hi anmah loh tein an lo cuahmah. Minung kanmah sining in taksa duhnak teikhawhnak a um lo i sumkhawhnak le zuamnak kan ngeihmi zong nih teinak tling an chuahpi bal lo. Biatak cu Bawipa Jesuh Khrih he tonnak le hawikomhnak kan ngeihmi tu nih hin Khrih Thisen tthawnnak thawngin an rak si kha an langhter. Khuahliti kong theihnak le ceihnak nih hin thlumnak a ngei lo i khuahliti ei tik lawnglawng ah thlumnak a ngeihnak le thawtnak a ngeinak cu hngalh khawh asi bantukin Bawipa Jesuh Khrih zong hi a kong theihnak ah tthawnnak le luatnak aum si loin Amah he tonnak le hawikomhnak tuin tthawnnak le luatnak aum arak si deuh.

Nangmah hrimhrim kha hal kan duhmi cu "Jesuh Khrih hi aho asi na ti ve dah?" Nangmah nih na tonmi an khamhtu Jesuh Khrih maw? Mi nih chimhchinmi an khamhtu Jesuh Khrih kong dah na chim ve lai? Biatak cu ahodah nupi le va a ngei ko nain a tong ballomi le a umtti ballomi a um bal? Biatak cu Jesuh hi a hodah asi ti hngalhnak tling an petu cu na relmi le na theihnak lawng hin si loin Amah he ton hnu lawng ah fiang tein na hngalh khawh lai. Lamkaltu vialte nih Jesuh Khrih kong an rak chim ah hin anmah nih an rak tonmi le Amah he hawikomhnak an ngeihmi le Amah he an rak umtti lio caan hrim ah Pathian nih a rak chawnhnak hna hi tehte an rak khan tawn. Nihin Thawngtha chimtu vialte hna nih kan chimmi Jesuh Khrih kong ah hin teh? Kanmah nih tonmi Jesuh Khrih kong maw kan chim? Baibal nih a kan hrilhfiahmi Jesuh Khrih kong tiang lawng dah kan chim? Bawipa Jesuh Khrih hi pumpak cio in kan tonlo le hawikomhnak kan ngeih lo ahcun Khamhnak ka hmu ve cang kan ti lengmang mi zong hi kan ruah caan a phan cang. Ziah zungzal nunnak hmanh kan pek lai tiah bia an kamhtu Pa tonlo le biaruahnak ngeilopi cun zungzal nunnak ka co lai na ti khawh. Biatak cu biakamnak hi minung pakhat lawngin le kanmah lawngin tuah awk atthami asi ttunglo, biakamnak tuah tik paoh kaphnih in pei kan um a haoh zungzal ko hi. Biakamnak fehter asi ning cu kanmah le Bawipa he hin kan fehter awk asi hnga lo maw?

Jesuh nih a chimmi cu ahohmanh nih an ka hngallo i ka Pa zong hi a hohmanh nih anhngal ve lo, Pa lawnglawng nih a ka hngalh i Keimah lawng nih ka Pa hi ka hngalh ve tiah ati. Cun Keimah nih an sinah ka phuanmi hna lawng nih ka Pa hi an hngalh ve i Ka Pa nih Keimah sinah a van hnuhmi hna le lam aser piakmi hna lawng nih an ka hngalh ve tiah Bawipa nih ati. Biatak cu Pa loin Fapa hngalhnak lam a um lo i Fapa loin Pa Pathian hngalhnak lam a um ve lo ti cu a fiang cang! Jesuh nih a chimmi cu ka Pa nih zeizong vialte hi ka kut chunngah a ka pek dih cang tiah ati. Zeizong vialte chungah a tling dih i kanmah le Pa Pathian hngalhnak tiang zong hin Jesuh Khrih cungah a um dihmi an si. Pathian tlamtling tein na hngalh khawhnak ding cu lam pakhat lawng a um i cu lam cu Jesuh Khrih sin lawnglawng hin asi... Biatak cu minung vialte hi Pathin nih Fapa Jesuh Khrih a kan peknak Thawngtha he a kan hnu dih cio i lam a kan serpiak dih cio, cu Thawngtha a cohlangmi vialte cu Jesuh Khrih sin phakpi kan si, Pa in Fapa sin phakpi mi vialte nih Fapa hi a hodah asi ti kha Pa Pathian nih hngalhter kan si ve. Pathian nih Fapa sin phakpimi vialte cu Fapa nih Pa Pathian sin a kan phakpi ve, phakpi lawng hmang si loin tlamtling tein ahodah Pathian hi asi ti kha a kan hngalhter ve. Kan taksa pum in kan thih hlan hrimhrim ah Fapa le Pa Pathian, Thiang Thlarau hi hngalhnak tling kan ngeihnak hnga Pa nih Fapa sinah Fapa nih Pa sinah Pa le Fapa nih Thiang Thlarau sinah an kan phanhpi. Nihin i mah Thawngtha a ttial cuahmah mi Keimah zong hi Fapa Jesuh Khrih bawmhnak thawngin a ka sertu taktak, ka Pa taktak asimi Pa Pa, Pathian he tonnak le biaruahnak, hawikomhnak ka ngei. Halleluijah. Amen. Hihi Fapa Jesuh Khrih nih keimah sin lawnglawng in Pa sin phanhnak lam aum atimi atlinternak asi. Amen. 

Adonghnak ah Bawipa Jesuh hi ka zumh tinak tiang lawngah tang ti loin Amah hrimhrim he tonnak le biaruah ttinak, hawikomhnak kan ngeih tiang zum cang hna usih. Bawipa Jesuh hrimhrim he tonnak le biaruahnak, hawikomhnak na ngeih hnu lawnglawng ah Jesuh nih "AHO ASI NA KA TI VE DAH" timi cu na leh khawh ve lai. Jesuh Khrih hi nangmah nih tonmi le hngalhmi asi ve lo le chunglei nunnak taktak in Aho asi ti na chim khawh ve lo chung paoh cu mi nih chimchinmi ah na tang rih caah asi ko. Hngalhnak tling kan ngeih taktaknak hi mi nih an kong an kan chimh tiang lawng si loin kanmah hrimrim nih kan hmuh hna le kan ton hna tikah  kan i hngalhnak atling bangin mi nih chimmi le Baibal nih ati tinak tiang lawng si ti loin pumpak cioin Bawipa Jesuh he aitongmi le bia airuahmi, hawikomh ttinak angeimi kan sinak in hngalhnak tling angeimi si cio ko usih. Amen. Bawipa Jesuh Khrih thawngin kan Pathian nih thangtthatnak hmu zungzal sehlaw Khrih thawngin Pa a hngalmi vialte zumtu kanmah thawng cio zong in Pathian nih thangtthatnak hmu chin ve ko seh. Amen....

----

LUKA 10:22

"Ka Pa nih zeizong vialte kha a ka pek cang: Pa nih dah ti lo nih cun ahohmanh nih Fapa kha ahodah a si, ti awk an hngal lo, Fapa le an sinah Fapa nih Pa a phuan duhmi hna dah ti lo nih cun Pa kha ahodah a si ti awk ahohmanh nih an hngal lo," tiah a ti.

MATTHAI 11:27

Ka Pa nih zeizong vialte kha ka kut chungah a ka pek dih. Pa dah ti lo nih cun ahohmanh nih Fapa kha an ka hngal lo i Fapa le an sinah a phuanmi hna dah ti lo nih cun ahohmanh nih Pa kha an hngal lo.

MATTHAI 16:15

Cun a thawh hna i, "Nannih tah, aho a si nan ka ti dah?" tiah a hal hna.