Pathian bia hi ai chaang tete in kan zoh tikah hin sullam an ngei tuk. Bawipa ttih cu fimnak hramthoknak le fimnak hram asi i hngalhnak ngeih kan timi zong hi tthatlonak hrial hi asi. Ka van duh tukmi cu Bawipa ttihzah cu sual huat hi asi! Amen! Zei tindah Bawipa hi kan ttihzah lai i upat kan pek lai ti hi minung tampi nih kan ruah cio theo lai dah. Thiang Thlarau kan chungah a um lo cun zeitindah sual cu kan huat khaw lai? Jesuh Khrih kan zumh lo cun zeitindah Thing Thlarau cu kan chungah a um khawh lai? Kei nih cun Fapa zumhnak in Thiang Thlarau ka co lai i Thiang Thlarau ka chungah umnak nih sual ral ka si a langhter lai. Sual ral ka sinak nih Pathian ka ttihzahnak a langhter lai. Bawipa nih sunparnak co ko seh.... Maw Bawipa ka nunnak dihlak in ka duhbikmi le ka herh bikmi cu Nangmah lawnglawng na si hi na hngalh ko caah kaa lawm ko.
Fimnak le hngalhnak kan ngeih khawhnak hnga Bawipa kan ttih le tthatlonak kan hrial a hau. Bawipa kan ttihzahnak kan langhternak cu sual kan huatnak hin asi awk asi. Sual kan huatnak nih a langhtermi cu kan chungah Thiang Thlarau a um tinak asi. Kan chungah Thiang Thlarau aum ti mi tehte nih Jesuh Khrih zumtu kan sinak a langhter. Jesuh Khrih kan zumhnak thawngin Jesuh he unau sinak hrawmh kan si i unau tak kan sinak nih Amah bang rocotu kan si lainak a langhter. Amen!
Zeizong vialte a hramthok in a dongh tiang hi Jesuh Khrih a si ko. Jesuh Khrih na ngeih ahcun zeizong vialte ngeitu taktak cu na si. Zeizong vialte cungah nawl ngeitu le a chungah a ummi cu Jesuh Khrih lawnglawng asi. Jesuh Khrih na ngei cang maw? Jesuh Khrih na ngeih ahcun Amah zumhnak nih Pathian ttihzah an thiamter lai i fimnak le hngalhnak an pek hleiah sual huatnak in Bawipa ttihzami cazin ah na tel ve lai. Amen! Bawipa ka chung na umnak hi nikhat hnu nikhat in nganter chin law na aw hngalh thiamnak ka chapchin lengmang. Amen! Pathian fa taktak na sinak cu sual huatnak in Pathian ttihzahmi cazin ah naa tel ve lai lo maw????
PHUNGTHLUKBIA 8:13
Bawipa ṭihzah cu sualnak huat khi a si. Porhlawtnak, ruamkainak le sualnak lam le biadik lo kha ka huat hna.