Hmunzakip ah aummi ka miphun sinah a tu lio i ka nunnak ah a um tukmi le kan sining taktak asimi kong Thawngtha ka rak ttial. Reltu vialte nan cungah mah le mah kan i dawt bantukin midang dawtnak, kan miphun dawtnak, atlaumi dawtnak tiang Bawipa nih nan thinlung cungah chia hram ko seh. Dawtnak taktak hi minung nih kan ngeihmi nih a phakmi si loin Thiang Thlarau sin lawnglawng in kan hmuh khawhmi asi i Thiang Thlarau bawmhnak lawngin kan hman khawh tthiamtthiammi asi. Khua ka ruah lengmang mi cu kan miphun dihlak nih Pathian kan duhning le Pathian kan biak ning hi asi. Kan Khrihfabu pumhnak cio ah Thiang Thlarau riantuannak a hul cuahmahmi le kan i pumhnak hmunkip ah tthutnak an lawng cuahmah mi kong hi asi. Aruang tampi lakah kan i hunhmi rawl nih thawtnak, alnak a ngeih lo ruangah le Thiang Thlarau rianttuannak a um lo bik caah asi lai tiah ka zumh. USA kan phanhka ahcun mawtor zong kan rak ngai lo nain pumh hi khuasik ah siseh nilinh ah siseh Train le Bus cit in zeitik hmanh ah kan tlawlh ballo nain atu ahcun Mawtor tthattha kan ngeih cang hna nain Biakinn kal le Pathian thangtthatnak kal cu hnu kan chit cuahmah. Biakinn kan kal lengmang ruangah zungzal nunnak kan hmuh si loin zungzal nunnak kan ngeih cang ruang tu ah biakinn kal in Pathian kan thangtthat le kan biak asi deuh. Pathian kan biakmi hi a nung lo ruangah le thiltikhawh tthawnnak a ngeihlo ruangah asi hnga maw tiah in hal ning law a ka let hmasa cemtu cu nangmah na si hnga nain upat pektlak le biaktlak Pathian tu cu upatnak le thangtthatnak cu na pe ve fawn ttung lo.
Biatak cu kan Pathian hi a hlan zong aum i atu hrimhrim zongah hin kan sinah a um zungzal mi le zeitik hmanhah aithleng ballomi Pathian asi. Pathian nih hnu a kan chittak ve tik ahcun kan celh ve te lai lo. Bawipa zangfahnak thawngin kan ngeihmi fanu le fapa hna kong hi ka ruah ah ka lung amit i ka khing arit taktak. Biatak tein ruat ve law hmailei ah zeidah kan lawh te hnga ti hi ruat law celh awk attha lomi asi. Atu hrimhrim ah hin ka fale kum no tete nih ramdang nun kan cawng cuahmah, cu hmanh ah ttih a nungbik mi cu nungak le tlangval i duhnak kong hi asi. Mah chungah hin nangmah le keimah fale hrimhrim zong hi an i tel ve te lai. Biatak cu Pathian nih dah a kan hruai lo le Thiang Thlarau nih dah a kan zangfah ko lo ahcun kanmah thilti khawhnak le hruai thiamnak hin cun kan i chuah kho lai ka zum hrimhrim lo. Ka Pa kan ngaithiam law kan zangfah tthan ko. Tha tein ruah ahcun thinphan lo awk attha lo. Biatak cu Pathian kan cung i ai lawmh lo ahcun kan fimnak le kan thil tikhawhnak hna, Khrihfabu kip kan i hruainak hna hi cu an tlau dih te ko hna lai.
Khrihfabu kip i hruainak zongah hin Pathian ruahnak hal hnu ah Pathian nih a kan chimhmi, a tuahmi si loin kanmah nih attha timi lawngte kan tuahmi zong hi Thiang Thlarau nih a lawmh bak lomi asi lai cu ka zumh ko hih. Kan Pathian hi kanmah nih ruahnak tthatha kan ngeihmi le plan tthattha kan ngeihmi cungah lung a kan tlingpitu Pathian asi lo i Amah plan le timhtuahnak cung tu ah rian a ttuan zungzal mi asi ti cu Genesis in Biathlam tiang ah hmuh khawhmi asi ko nain nihin Khrihfabu nih Pathian rian kan zuanhnawh ning cu kanmah ruahnak lawngte le plan tthattha an si ko hna hi. Ka nawlh rih lai: Kan Pathian hi kanmah minung khuakhanmi ah aitelmi asi bal lo i Amah khuakhanmi tu zulh hi a kan fialmi asi i cucu Jesuh nih nan ka dawt ahcun ka nawl zulh uh atinak kha asi.. Maw Bawipa Nangmah an dawmi hna tampi nih thla kan camnak hi philh hlah muh... Kan biakinn cio i tthutnak a lawng cuahmah mi kong ah hin fakpi in na lung a fah ve lo le a nungmi Pathian sinah bawmh na hal ve lo asi ahcun tuhnu kumhra ahcun kan biakinn cu a king chin lengmang te ko lai. Mah hi zumtu taktak nangmah le keimah nih fakpi in thlacamnak le Thiang Thalrau hruainak in rian kan tuanlo ahcun a phi kan chuah kho bal lai lo. Kan miphun dihlak in biatak chungah kan kir tthannak dingah hin cun minung nih kan tuah khawhmi cungah ai hngatmi si loin Thiang Thlarau riantuannak tu ah ai hngat chanmi arak si deuh.
Bawipa Nangmah kan dawt baknak hi cu ka tuah lengmang mi hna le Baibal ka rel lengmang mi le thla ka cam lengmang mi ruangah hin si loin Nangmah loin ka um khawh lomi, ka thlarau nih tihal in an halmi le rawlttam in an ttammi nih hin kan dawtnak taktak cu an langhter ko. Nangmah loin a um kholomi na fapa nih hin na duhnak zul loin ka um ngam in ka nung kho ngai hnga maw? Maw Bawipa ka nunnak dihlak taktak in kan dawt taktak si.. Kaa in a chuakmi sawhsawh men in si loin Nangmah loin ka um khawh ve bak lomi hna nih hin ka nunnak ah Nangmah kan duh ve taktak nak le kan dawt taktak ve nak cu tehte an khan zungzal ko hna. Maw ka Pathian Nangmah Fa hrimhrim ka si nak a fiangter tukmi cu Nangmah kong ruahlo in ka um khawh lomi, atu le atu ka thlarau nih tihal le rawlttam in an ttammi hna nih hin an fianter zungzal ko. Ka Pa zeibantuk Vision le hmuhnak na ka pek timi lawng hi si hrim loin ka nunnak ah Nangmah loin ka nun khawh hrimhrim ti lo mi hna tu nih Pathian Fa ka si an langhter. Nangmah he kan rak i ton hlan ahcun Bawipa, Nangmah loin le Nangmah hngal loin ka rak nung ko, ka rak nung kho ko ruah tiah ka ruah nain ka rak hngalh khawhlomi chungin na rak ka umpi zungzal tthiamtthiam ko tihi ka van i fiang chin. Atu cu Nangmah kan ton taktak cang hnu chin ahcun Nangmah loin ahodah a nung kho hnga i ralttha tein hmai a kal ngammi an um hnga. Biatak cu Ka Pa, Nangmah lo cun ka mit a mui i ka hmai lamh dingmi ka ttih ko. Maw Bawipa kan hmailei na chiahciami chungah nung ko ning law Nangmah nih na rak ka tinhpiak ciami chungah hin na sin ka phanh tiang nung zungzal ko ning. Ka Pa ka aw na ka theihpiak zungzal mi nih hin lawmhnak le ruahchannak, raltthatnak taktak an ka pek zungzal, Nangmah loin ka um khawh lomi nih hin dawh Nangmah Fa taktak ka si hi tehte an khan lengmang cuh... Bawipa kan ngai in kan hlam zungzal, Ka Pa na bia ka ngaih ko na timi aw theih tthan hi ka caah nunnak le damnak in teinak an si.
Ka Pa na ka tinhpiakmi le na timhciami ka hmailei caan hi ni le thla aliammi nih liampi hrimhrim hlah seh. Ka nun chungah ka minung hawi caah sullam angeimi, athlummi, a almi, a ceumi si ko ning ti cu ka duhtuk ta. Nangmah caah san ka tlaihnak a um ve ahcun na duhnak bangin ka hruaiin ka hmang ko. Ka Pa Israel mi hna cu Khuadawm le Mei in na hruai bak hna bangin keimah na Fapa zong na Thiang Thlarau in chun he zan he ka hruai ko. Mi nih an ti timi in cun si hlah seh, Nangmah nih na timi tuin si ko seh... Ka Pa ka miphun hnulei ah a tawlh cuahmahmi caah hin santlaihnak ka ngei ve hnga maw? Ka miphun kong ka ruah ah ka khing arit ko, ka tuah khawhmi a um lo hmanh ah ka thi le ka sa ngaingai an si hna. Bawipa zeitik hmanh ah tlau dingin ramdang ah naa kan phanhpi hrimmi asi lo. Ka Pa ka miphun chanhchuahnak ah ka tuah khawhmi aum ve hnga maw? Na thawngtha hi hnutawlhmi ca le atlau lengmang mi caah arak si deuh. Ka Bawipa Jesuh cu atlaumi tuu pakhat a kawl lengmangmi Tuukhalttha asi. Ka Bawipa, ka nunnak dihlak le ka thlarau nih hin na hnu, zul zungzal hram ko seh. Keimah thazang le fimnak, ruahnak hna in si loin ka chungah a ummi Nangmah Thlarau hruainak tuin si ko seh.. Ka Pa ka nunnak dihlak nih a duhmi hi lenglei hmuhnak le hmuhmi cungah si loin ka chunglei ah Nangmah tthawnnak le cawlcanghnak hngalhnak tuin ka hruai hram ko muh. Ka Pa, an ti timi hi cu ka ba cikcek cang.. Nangmah nih na timi cung tu ah hin nung zungzal ning law in zul ko ning muh. Ka nun chung vialte hi Ka Pa Nangmah hruainak in si ko seh. Moses nih Maw Bawipa, Nangmah nih naa kan kalpi ding lo ahcun karkhat hmanh kan kalter hlah a ti bangin na sinah ka thlacammi le ka thinlung cu thleng ballo in na ka kalpi lo ahcun timi hi Nangmah cungah ka zumhnak ai bunh zungzal ko....
Ka Pa fakpi in inhgal ning law thuk chinchin in inhgal ning ti cu ka duh taktak ta.. Nikhat hnu nikhat hi Nangmah kan hngalhnak hi tthang zungzal ning law Nangmah he kan i hawikomhnak hi tthang zungzal seh ti cu ka saduh thahmi lakah a nganbik asi zungzal ko. Ka Pa, a ka sertu ka Pathian, Nangmah hi tling tein kan hngalh lo ahcun vawlei na ka serchan hi a zeicem hi dah an hei si hna hnga? Biatak cu Nangmah he umtti dingah pei na rak ka ser cu tiah... Nangmah he hawikomhnak ngeitti dingah le na duhnak zulh dingah pei nan rak ka ser cu, Ka Pa, ka nunnak dihlak in kan duh i kan dawt zungzal ko, Kan duhnak le kan dawtnak hi vawlei nih a chim khawh leng tiang khi an si.... Ka Pa ka ti ahal i ka dang a car? Ka rawl a ttam cuahman? Biatak cu Ka Pa, Nangmah lawnglawng tihal diriam tertu le dangcar tikah na Thlarau in tihal riamtertu na si zungzal ko. Rawl lak ah rawl thawbik cu Nangmah hrimhrim hi na si. Nangmah cu Nunnak rawl thawbik le Nunnak changreu na si... Keimah cu na fa taktak, ka min in Nangmah nih kawhmi ka si Ka Pa....
Paul le Moses nih an miphun caah an ngeihmi siaherhnak le lungfahnak in Bawipa hmaiah kun in nawlnak an rak tuah. Nihin zumtu taktak asimi nangmah le keimah zong nih Pa Pathian sinah hnu a tawlh cuahmahmi kan miphun caah le biakinn kip i tthutnak a lawng cuahmahmi caah hin nawlnak tuah cio hna usih. Bawipa kan cung i ailawmh ahcun ngaihthiamnak he kan miphun cu a kan hngalh tthan lai i Amah leiah a kan hoihter tthan lai. Biatak cu Pathian nih dah Amah leiah a kan hoihter tthan lo ahcun kanmah te cun kan hoih kho bal ti lai lo. Pathian kan biaknak i biakinn kipah thawtnak a tlau cuahmah i Thiang Thlarau riantuannak a hul cuahmah cang. Asullam cu Pathian kan cungah ai lawmhlonak alanghnak an si. Pathian fanu le fapa hna na umnak Khrihfabu caah Bawipa duhning le tinhning in aceumi le a almi rak si ko. Ceunak le alnak cu anmah le hmunhma cio te ah hman an haoh lai caah Thiang Thlarau hruaining in a herhnak caan le hmunhma ah a ceumi le a almi si khawhnak Bawipa nih a kan pekmi cu kan cungah tlingter hram ko seh.. Nihin i Pathian nih hngalhmi na si ve cu miphun caah thlacam ve ding le atlaumi kawltu dingah thimmi na rak si ve caah asi. Bawipa nih sunparnak co zungzal sehlaw kan miphun le pumpak cio in Fapa Jesuh Khrih kan zumhnak thawngin Pa Pathian nih kan hngal cio hram ko seh..
——
EXODUS 32:31
Moses cu Bawipa sinah khan a hung kal ṭhan i, "Hi mi hna nih hin a ṭhalo hringhranmi sualnak an tuah ko cang! An caah sui pathian an i ser.
EXODUS 32:32
Asinain an sualnak cu ngaithiam ko sawh hna. Cun na ngaihthiam khawh hna lo a si le nangmah nih na ṭialmi cauk chung khan keimah ka min tu kha hlo ko," a ti.
EXODUS 32:33
Bawipa nih Moses cu a thawh i, "Ka cauk chungin a min ka hloh ding cu ka cung i a sualmi kha a si ko lai.
ROM 9:2
Ka miphun, ka thi le ka sa a simi hna caah ka ngaih a chia hringhran ko i ka lung chung fahnak cu a dong lo.
ROM 9:3
Anmah ca i a ṭha ding a si ahcun keimah hi Pathian chiatserhnak in i Khrih he i ṭhen hmanh kha ka duh deuh.
ROM 9:31
sihmanhsehlaw thimmi miphun, Pathian he remnak ding caah phung a kawlmi hna nih khan cucu an hmu lo.
ROM 9:32
Zeicahdah an hmuh lo? Zumhnak kha i bochan loin tuahnak tu kha an i bochan caah a si. Cucaah "rilhnak lung" ah khan a ril i
ROM 10:1
Ka u le ka nau hna, ka phun hawi mi hi khamh si hna seh ti cu ka lungthin dihlak in ka duh hringhran ko. An caah Pathian sinah thla ka cam lengmang.
ROM 10:2
Pathian a ṭanh ngaingaimi an si cu tehte ka khan khawh, sihmanhsehlaw cu an ṭanhning cu palh ṭanh a rak si.
ROM 10:3
Pathian nih zei lam in dah minung cu Amah he a remter hna ti kha an hngal lo i anmah tu nih khan cu lam cu an i ser; cucaah Pathian nih minung cu Amah he a remter hnanak lam kha an cohlang duh lo.