Biatak (Johan 14:6)

Biatak timi cu biachimmi biataknak le tuahnak i fakpi alangmi khi biatak asi ve ko nain chunglei ah hmuhkhawhlomi biatak kha lenglei kan tuahnak in a hunglangmi tu khi asi deuh. Tuahnak in a hunglangmi ka ti tikah tuahnak paoh khi biatak an si ka ti duhnak siloin na chunglei ah aummi biatak kha tuahnak in na langhter tikah na chunglei ah aummi biatak he aikhat in na tuahmi khi biatak ka timi cu asi. Biatak le dawtnak hi hmuhkhawhlomi chunglei ah aithupmi veve an si i an kalning le an sining ailo ngai. Dawtnak le biatak hi lenglei tuahnak cungah aihngatmi siloin dawtnak he chungleiin aithawkmi an si i lenglei langhtermi tuahnak tiangah dawtnak taktak le biatak in chunglei umning in rianlimtu khi an si. Biachim i biataknak le tuahnak i biataknak vialte hi biatak i theitlai tu an si deuh. Sihmanhsehlaw Kaa in biatak achimmi tampi kan um nain nun in ai biataklomi tampi kan um ve. Baibal nih biatak ati lengmang mi tu cu kaa le tuahnak hlan ah nunnak ah biatak ngeihtu hi biatak atimi cu asi. 

Biatak na ngeih taktak ahcun na kaa in na chimmi ah le na tuahnak ahcun na chunglei ah an umning in an hung lang hrimhrim ko lai. Nunnak ah biatak ngeih timi cu Jesuh Khrih ngeih hi Biatak ngeih ka timi cu asi i Bawipa Jesuh na ngeih ko ahcun biatak lawng ngeih siloin Thlarau zong na ngeihchih tinak asi. Cucaah pei Bawipa Jesuh nih Pathian cu Thlarau asi i a biatu hna nih cun Thlarau le biatak in an biak awk asi atinak kha asi cu… Pathian hi minungkip nih biakkhawhmi siloin Bawipa Jesuh Khrih kan zumh thawngin Thiang Thlarau ngeimi lawng nih Thlarau le biatak in kan biakkhawhmi asi. Bawipa Jesuh Khrih na ngeih taktak ahcun Thlarau le Biatak na ngeih tinak asi i cu na ngeih cangmi biatak cu chung le leng aikhat in an nuntertu biatak asi, Biatak na ngeih le biatak in ka nung na ti ruangah Jesuh Khrih na ngeih tinak siloin Bawipa Jesuh na ngeih ruang tu ah biatak na ngeih le biatak in na nun an si deuh. 

Bawipa Jesuh Khrih ka ngeihkhawhnak cu Bawipa Jesuh ka zumh le ka cohlan, Khamhtu lawng siloin Bawipa(Uktu) ka ser tikah thihnak in Khamh ka si i Pathian Fa, Zungzal Nunnak ngeimi le Bawipa Jesuh Khrih ngeimi ka hung si. Amen. Bawipa Jesuh Khrih ngeimi le Nunnak ngeimi ka si fehternak ah Thlarau in Hrinṭhanmi ka si, Thlarau in hrinṭhanmi ka si cu Bawipa Jesuh nih a Thlarau in zungzal a ka umpinak ding caah le Pathian Fa ka si cang ruangah asi. Zungzal Nunnak ka ngeih cang, Biatak ka ngeih cang lawng siloin Bawipa Jesuh nih a Thlarau in zungzal umpimi ka si. Amen. Bawipa Jesuh Khrih ka zumh ruangah Bawipa Jesuh ka ngeih bantukin Bawipa Jesuh ka ngeih ruangah Biatak ka ngeih arak si ve. Chung le leng aikhat in a zungzal kan nunkhawhnak dingah cun Bawipa Jesuh kan ngeih ruangah biatak kan ngeihmi lawng siloin Bawipa Jesuh nih a zungzal in a Thlarau in a kan umpinak thawng in le Amah he nifate thlacam hawikomhnak kan ngeihmi thawngin kan nung kho ve. Amen..

Biatak cu Bawipa Jesuh Khrih lawng hi Pa Pathian sin phanhnak Lam, Nunnak le Biatak asi ko bantukin na nunnak ah Bawipa Jesuh na ngeih ahcun chunglei le lengei he aikhatmi biatak na ngei lai I upatmi le thangṭhatmi ah naa tel zungzal ve ko lai. Biatak timi cu kan tha zong thirhviar i kan chimmi khi biatak si loin kan chungah aummi biatak tu kha ka tha zong dihviar in a kan chimtertu khi biatak asi. Biatak cu mit in hmuhkhawhmi asilo, minung kan thinlung chungah aummi asi nain chunglei ah kan ngeihmi biatak cu kan chung le kan lenglei he aikhat in a kan nuntertu le langhtertu asi. Biatak angeimi na si ahcun azungzal in hmunhma na ngei ko lai. Biatak hi aherhlomi minung le miphun kan um loh. Minung vialte asual he aṭhami he biatak hi kan herh dih i kan duh dih. Zeitik hmanh ah teitu taktak le hmunhma angei zungzalmi cu biatak lawnglawng hi asi. Biatak cu zeitik hmanh ah asung ballo i chikhat minung biakhiahnak ah sung hmanh sehlaw Pathian thinlung chungah le minung vialte thinlung ahcun biatak nih atei ṭhan zungzal ko lai. Biatak cu lenglei le chunglei aikhatmi khi biatak cu asi. Biatak na ngeih le ngeihlo tahvung cu na chunglei ummi le lenglei na tuahmi aikhat maw? timi hi asi. 

Mah vialte hnu ah minung kan chungah kan ngeihmi chung le leng aikhat in kan tuahmi le nunmi biatak hnakin biatak deuh asimi le zungzal hmunmi Biatak cu Bawipa Jesuh lawnglawng asi. Ka chimcia bantukin chung le leng aikhat in an nuntertu hi na ngeihmi biatak asi ko lai nain cu chung le leng aikhat in an nunter khotu biatak, an ngeihter khotu cu Bawipa Jesuh Khrih lawnglawng asi hi na philhlo dingah ka duhmi asi. Nawlhṭhan ka duhmi cu chung le leng aikhat in biatak na ngeih ruangah le biatak in na nun ruangah Bawipa Jesuh na ngeih siloin Bawipa Jesuh na zumh ruangah biatak na ngeih le biatak in na nunkhawh arak si. Nun in langhter khawhmi biatak kan ngeih hlanah kanmah nunnak ah ngeih hmasa arak herhcemmi cu zungzal a hmunmi le a Nungmi Bawipa Jesuh Khrih, Biatak hi asi. Bawipa Jesuh, Biatak na ngeih le ka ngeih lawngah minung dang vialte nih an duhmi le an herhmi in an kawlmi chung le leng aikhatmi biatak cu kan ngeihkhawh in kan hrawmhkhawh hna lai. Zungzal Nunnak asi i Nunnak a kan petu le Biatak asimi Amah Thlarau le Biatak a kan peknak thawngin Pa Pathian cu Thlarau le biatak in kan biakkhawhnak, chung le leng aikhat in biatak nunkhawhnak a kan petu Bawipa Jesuh cu A Min thangṭhat chin si zungzal ko seh. Amen. Amen. Amen.. Bawipa Pathian ka Pa ka tinak cu thi le sa in ka hrinmi ka fale nih ka pa tiah an ka auh bantukin Bawipa Jesuh ka tuahpiakmi le limpiakmi ka zumh thawngin Pathian Amah Thlarau in hrinmi ka si caah ka pa tiah ka auhkhawhnak asi. Amen…