Pathian nih Israel mi hna he biakamnak thar ka tuah lai a timi cu Jesuh Khrih hi asi i vawlei serhlan in mi vialte Khamhtu dingah Pathian nih a rak timhciami asi . Jesuh Khrih kan zumhnak thawngin kan thinlung chungah Thiang Thlarau cu khua a rung sa i cucu Thiang Thlarau pek kan si kan timi cu asi. Amen! Cucu catlap cungah ttialmi si loin Thiang Thlarau in na thinlung chungah ttialmi le khenhmi asi timi cu asi. Amen... A hlan ahcun phunglam hna hi lengah ttialmi an si i cu ttialmi fial ningin an rak nung i khua an rak sa, an tuah taktak tikah sualnak in an rak luat! A tu ahcun ttialmi nawlbia tuahnak in luatnak lam a um ti loin Fapa Jesuh Khrih zumhnak thawng lawngin luatnak le nunnak kan hmuh khawh. Amen! Jesuh Khrih thawngin Pathian he remnak kan hmuh hnu ah kan tuahmi vialte hna hi catlap cungah ai ttialmi ning in kan tuahmi si ti loin kan chunglei ah a nungmi Thiang Thlarau hruainak tuin zeizong vialte hi kan tuah cang! Kan chunglei Thiang Thlarau hruainak le fialnak in zeizong vialte hi kan tuah hrimhrim hna awk asi: Cucu kanmah cu kanmah ta kan si tilonak tehte alanghnak asi i a kan ngeitu le a thisen in a kan cawtu Jesuh ta kan sinak kan langhternak cu asi. Nihin Jesuh Khrih vel thawngin liampiak cikcekmi zeizong vialte kan zumhnak thawngin le kan zeizong vialte Uktu Bawi ah kan cohlannak thawngin Khamhmi kannih chan ahcun chunglei ah tialmi le chiahmi Thiang Thlarau hruainak in kan nun cang caah Bawipa cu kan Pathian asi i kannih cu a mi le a fa taktak cu kan si. Amen! Pathian fa kan si nak cu kan mah tuahmi ruangah si loin Pathian vel le laksawng a simi Jesuh Khrih thawngin asi. Amen!
Thiang Thlarau chan asi cang i nan chungah ka um lai i ka phunlam cu nan thinlung chungah tial asi lai caah a ho hmanh Bawipa kha hngal tuah tiah cawnpiak nan hau ti lai loh tiah ti kan si nain kannih zumtu ai timi vialte hna hi ziah ahram thok in cawnpiak kan hauh lengmang hnga i kanmah ning te kan si peng hnga? Fak deuh kan ruah caan cu asi cang ko rua tiah ka ruah? Pathian phunglam le duhnak taktak a hngalh dih khotu kamhmi Thiang Thlarau hlah maw kan chungah chiah ri lo le kan thinglung chungah phunglam cu ttial rih lo asi hnga ti hi ka ruat tawn! A sullam taktak cu hi hi asi: Zumtu mi hna i kan phi cu chunglei ah chiahmi Khrih Thlarau na ngei ve cang maw ti hi asi. Pathian a nung taktak ti na hngalh khawhnak cu hna theihnak sawh sawh in siloin chunglei Thiang Thlarau cawlcanghnak le na chungah a umnak hin asi lai. Amen! Thiang Thlarau na ngeih khawhnak dingah cun Pathian fapa nih an tuahpiakmi na zumhnak lawnglawng in asi lai i na zumh ve ko nain Thiang Thlarau ka ngei lo na ti asiah cun na zumh dih taktak lo caah asi lai. Ka zumh na tikah na thinlung, na ruahnak, na thazang le na thlarau, na pum dihlak tiangin Jesuh sinah na pek le na zumh a hau ve! Ka sual ruangah a thi, ka caah ningzah vialte a ing dih, ka tuar dingmi harnak vialte a ka tuarpiak dih i thihnak in nithum hnu ah Pathian nih a thawhter caah sual tthawnnak nih ahmanmi nawlbia le thihnak nih ka cungah nawlngeihnak a ngei ti lo i nunnak ah thawhter ka si ve cang ti hi na zumh taktak awk asi. Amen! Na zumh taktak tikah nangmah ta si ti loin Jesuh Khrih ta na si cang caah nangmah le nangmah uk ti lai lo i Jesuh Khrih nih an uk cang lai. Amen!
Jesuh nih an tuahpiak cangmi hi van zoh hmanh: Na ṭhat lonak kha kan ngaihthiam lai i na sualnak kha ka hngal camcin ti lai lo,' tiah Bawipa nih a ti. Amen! Na zumh taktak ahcun Thiang Thlarau pekchap na si lai. Amen! Jesuh Khrih he i ton le Amah hmuh hi a duh in duh cang ko hna usih. Amen! Bawipa nih nan thinlung innka in onpiak cio ko hna seh tiah Jesuh Khrih Min thla ka cam. Zei hmanh ngolta kan ti lo hi mu, zum taktak ahcun na chungah Thiang Thlarau pek na si lai i Amah nih cun na nun chung vialte lam an hruai ko lai. Nangmah fimnak le tthawnnak le sum khawhnak a herh hrimhrim lai lo. Jesuh Khrih cu kan teinak Pathian asi. Amen! Ni hin ah cawnpiak na hoah lengmang rih ko mi hi na ruah caan asi cang hnga lo maw.... Bawipa kha hngal tuah tiin cawnpiak an herh ti lai lo ti pei asi ne hi... Nihin zumtu a thar in pei cawnpiak kan hoah lengmang ko hi.... Cawnpiak hau lengmang mi si ti loin na chungah a nungmi Thiang Thlarau tu nih in cawnpiak ve ko cang seh..... Amen.... Baibal rel, Thlacam, Rawlulh, i pum, Bawipa thangthat tuah ti a haumi na si rih ko ahcun Khamhnak cu na hmu naisai rih lo i theihnak tiang lawngah na um ko rih. Hrinthannak in Khamhnak na hnuh lo ahcun zeitindah Pathian Pennak chung ahcun na luh khawh lai, Pathian Pennak chungah na luh lo ahcun zeitindah vancung khua ka phan lai na ti khawh?
Pathian nih bia a kan kamh zungzalmi hi zeidang zeidang si loin Fapa Jesuh Khrih bak dawh asi cu. Cu ve bangin Jesuh Khrih nih a kan kamh vemi cu Thiang Thlarau hi asi ve. Pathian nih kamhmi Fapa Jesuh thawngin Pathian he remnak kan hmuhnak hnga le kan umtti zungzal khawhnak dingah kan thinlung chungah Jesuh Khrih nih Athisen in le Thiang Thlarau tthawnnak in Amahta kan sinak cu a ttial cangmi kan si. Minung ka thinlung chung lawngah si loin Pathian sin le Pathian thinlung chung hrimhrim zongah Jesuh Khrih nih Amah thisen in bia a va chim i Amah thisen in biakamnak a kan serpiak ve. Amen! Cucaah cun pei Jesuh nih hrai a lak i hihi ka thi asi, Hihi biakam fehternak thisen asi a tinak kha asi cu: Pathian he biakam fehternak cu Jesuh Khrih thisen hi asi. Amen! Jesuh Khrih hi bia le ca in ngei lai ci, na thinlung chung hrimhrim tu ah Jesuh Khrih nih Thiang Thlarau in an umpinak le na chung aumnak langhter ko seh. Amen. Biaktak cu Pathian hrimhrim nih Amah he hmunkhat kan um tti khawhnak hnga le kan chungah a um khawhnak hnga Fapa Jesuh Khrih in kan thinlung chungah Amah umnak biakinn a sakmi Pathian inn kan si tihi theihnak tiang si loin nunnak in pemhnak he si cang ko seh.. Nunnak pemh timi sullam cu theihnak vialte le hngalhnak vialte a lawnh dih hnu ah kanmah te nih kan nunnak nih tonmi thil hna khi pemhnak kan timi cu asi. Bawipa Pathian nih Fapa Jesuh Khrih thawngin le a fale kanmah thawng cioin sunparnak hmu ko seh...
—-
JEREMIAH 31:33
Sihmanhsehlaw cu caan cu a phak tikah, Israel mi hna he biakamnak ka ser laimi cu mah hihi a si: Ka phunglam cu an chungah ka chiah lai i an lungthin cungah ka ṭial lai. Keimah cu an Pathian ka si lai i annih cu ka mi an si lai," tiah Bawipa nih a ti.
JEREMIAH 31:34
Cun annih nih pakhat le pakhat kha, 'Bawipa kha hngal tuah,' tiin i cawnpiak kha an herh ti lai lo, zeicahtiah a hme bik in a ngan bik tiang, an dihlak in an ka hngalh lai. An ṭhat lonak kha ka ngaihthiam hna lai i an sualnak kha ka hngal camcin ti lai lo,' tiah Bawipa nih a ti.
EZEKIEL 36:26
Lungthin thar kan pek hna lai i thlarau thar nan chungah ka khumh lai. Nan pum chungin lung bantukin a hakmi nan lung kha ka lak lai i titsa bantukin a nemmi lung kha kan pek hna lai.
EZEKIEL 36:27
Ka thlarau cu nan chungah ka khumh lai i ka nawlbia he aa tlak in kan umter hna lai i ka phunglam zulh in nan nung lai.
2 KORIN 3:2
Kan ca kenmi cu nanmah kha pei nan si cu, kan lungthin cungah mi vialte hngalh awk le rel awkin ṭialmi cu.
2 KORIN 3:3
Hi ca a ṭialtu cu Khrih kha a si i kannih hi a phortu ah a kan hmanmi kan si. Cu ca cu lung cungah cahang in ṭial si loin minung lungthin cungah a nungmi Pathian Thlarau nih a ṭialmi a si.
2 KORIN 3:6
biakam thar rian a kan ṭuanter khotu cu, cu Pathian cu a si. Cu biakam thar chung i a ummi cu ṭialmi nawlbia kha si loin Thlarau tu a si. Ṭialmi nawlbia nih cun thihnak kha a chuahpi, sihmanhsehlaw Thlarau nih cun nunnak kha a chuahpi.
2 KORIN 6:16
Zeitindah Pathian biakinn cu lawkihmi siasal he an i tlak khawh lai? Zeicahtiah kanmah cu pei a nungmi Pathian biakinn cu kan si cu. Pathian hrimhrim nih, "Ka mi hna sinah ka umnak inn cu ka sak lai i an sinah ka um lai; Keimah cu an Pathian ka si lai i annih cu ka mi an si lai," a ti bantuk khan a si taktak.