Naomi le Ruth tuanbia in ka nunnak ah biatak tein thazang ka laknak ka rak in hrawmh ve. Fakpiin ka ruahpi ve law na nunnak ah hmunhma rak ka chiahpiak ve ti kan duh. Naomi cu Moap ram ah kumhra a um hnu ah Judah ram ah kir dingin timhtuahnak angei. Athi cangmi a fapale, nupi pahnih cu ka ramah ka kir tthan cang lai i nan inn teah va kir cang u, keimah cungah le mithi hna cungah nan tuah bantukin Pathian nih nan cungah zangfahnak tuah ve ko seh tiah ati hna. Ruth nih achimmi bia nihi hin ka thinlung ah fak tukin bia achim. Ruth nih atimi cu "Nangmah he i ṭhen awk le nangmah zul lo i kir ṭhan awkah ka lem len hlah; zeicahtiah na kalnak ah ka kal ve lai i na riahnak ah ka riak ve lai; na miphun cu ka miphun an si ve lai i na Pathian cu ka Pathian a si ve lai; na thihnak ah ka thi ve lai i khika ah cun an ka vui ve ko lai. Pathian nih cu bantukin ka cungah tuah seh law, tam deuh zongin tuah ko seh, thihnak hmanh nih nangmah sinin ka ṭhen ai kun," tiah a ti.
Maw Bawipa Jesuh ka nunnak dihlak in kan dawt ve i Ruth nih Naomi a nunnak dihlak in a zulh bantukin Keimah zong nih Bawipa Jesuh, Nangmah zulh zungzal ve ding hi kan nunnak dihlak in kaa thimmi asi ve.... Ruth nih Naomi cungah ruahchanawk zeihmanh um lo bakmi a zulh ngam ko ahcun Nang le Kei chinchin nih cun Bawipa Jesuh hi lung awttawmnak umlo bakin asin kan phanh tiang kan zulh awk asi. Biatak cu Bawipa Jesuh nih a kan kamhmi hi kan nun chung ca he a sin kan phanh ding ca he a baumi pakhat hmanh umlo in thluachuah pek dingah bia a kan kamhtu asi. Amen! Thluachuah kan hmuh lai timi ruahchannak kan ngeih ruangah kan zumh, kan biak le kan zulh si loin zumhtlak, biaktlak le zulhtlak asi ruangah kan zumh, kan biak le kan zulh arak si deuh. Zumtu taktak nih kan i ruahchannak a nganbikmi hi vawlei thluachuah tampi hnak in Bawipa Jesuh, Amah he hawikomhnak tling kan ngeihmi le Thiang Thlarau le Pa, Pathian he hawikomhnak tling kan ngeih lengmangmi tuhi thluachuahnak taktak, thluachuahnak tlingah kan rel taktak mi cu asi. Nang caah ta zei hi dah thluachuahnak na timi taktak hi asi ve?
Ruth nih hin Naomi sin in ruahchannak zeihmanh a ngeih khawh dingmi le ahmuh dingmi zeihmanh a um lo timi hi fiang tein ahngalh ko. Ruth nih Naomi cungah dawtnak tlingte langhter ko dah ti lo cu Naomi nih Ruth cungah lehrulnak a cham khawh dingmi le atuahpiak khawh dingmi hi zeihmanh aum hrimhrim lo tihi an pahnih in hngalhkhawhmi asi. Ruth nih ruahchannak angeihmi lakah a nganbikmi cu Naomi he tthenlo, Naomi he kaltti, Naomi riahnak ah riah ve, Naomi miphun hi ka miphun ti ve le Naomi Pathian cu ka Pathian ti ve, Naomi thihnak i thih ve, Naomi vuinak ah vui ve hi ai ruahchannak nganbikmi cu asi. Naomi le Ruth karlak ah tthen ko tu zeihmanh an um lo, thihnak hmanh nih a kan tthen kho hrimhrim lai lo tihi Ruth a thinlung taktak cu asi. Ruth nih a duhbikmi cu Naomi asi i Kei zong nih ka duhbikmi cu Jesuh Khrih asi ve. Nang ca zong ah na duhbikmi cu Jesuh Khrih rak si ve seh ti ka duh. Ruth le Naomi nih hin Jesuh Khrih le kanmah zumtu taktak kan hmanthlak a langhter ngaingai tiin ka hmuh. Ruth nih Naomi lawnglawng a duh i azulh bang hin nihin zumtu in zultu vialte nih Jesuh Khrih lawnglawng hi 1. Na kalnak ah ka kal ve lai.. 2. Na riahnak ah ka riak ve lai.. 3. Na miphun cu ka miphun asi ve lai... 4. Na Pathian cu ka Pathian asi ve lai... 5. Na thihnak ah ka thi ve lai.. 6. An in vuinak ah an ka vui ve lai.. 7. Bawipa, Nangmah kan duhnak in kan zulhnak ah hin thihnak hmanh nih kan tthen ai kun tiin zumhnak he Amah duhnak in zul taktak ve sihlaw zeitlukin dah Bawipa Jesuh hi kan hei lawmhter ve hnga tihi ka thinlung ah fakpi in rian attuan ka timi cu asi.
Biatak cu Cathiang nih a kan cawnpiak duhmi hi Jesuh le Keimah, Nangmah hmanthlak hrimhrim hi asi ko. Ruth thinlung bantukin zumtu vialte nih Jesuh Khrih he hin thihnak hmanh nih a kan tthen kho lai lo timi thinlung put he zul usihlaw Thiang Thlarau tthawnnak taktak he vawlei ah zultu ttha kan si dih ko hna. Kannih cu Jesuh Khrih zumhnak in zumtu ah kan cang, zumtu kan si ruangah zumhnak kan ngeih si loin zumhnak kan ngeih ruang tu ah zumtu kan si a rak si deuh. Cubantuk tthiamtthiam in zultu na si ruangah zumtu ah nai can si loin zumhnak in zumtu na si cang ca tuah zultu dirhmun na phanh khawh arak si ve. Bawipa Jesuh nih zumhnak in zumtu dirhmun lawng phanh hi si loin zultu dirhmun tiang phanhter dih a kan duhmi asi. Zultu dirhmun taktak cu Ruth nih Naomi a zulh bantuk hi zultu taktak dirhmun cu asi. Ruth nih Naomi sin in hmuh dingmi ruahchannak zeihmanh a ngeilo nain na thihnak ah ka thi ve ko lai, Nangmah zulhnak in a kan tthen khotu zeihmanh an um hrimhrim lo ati bangin kan nih zumhnak in zumtu, zumtu sinak in zultu sinak tiang a phanmi vialte zong nih Jesuh Khrih zulhnak in a kan kirter khotu hi zeihmanh an um loh, thihnak hmanh nih Jesuh Khrih dawtnak he a kan tthen kho lai lo timi zumhnak he kan zumh i kan zulh ko ahcun Bawipa Jesuh nih mah ti hin nan van ka zulh lai a timi thinlung taktak cu kan khen ve hnga. Amen..
RUTH 1:16
Sihmanhsehlaw Ruth nih, "Nangmah he i ṭhen awk le nangmah zul lo i kir ṭhan awkah ka lem len hlah; zeicahtiah na kalnak ah ka kal ve lai i na riahnak ah ka riak ve lai; na miphun cu ka miphun an si ve lai i na Pathian cu ka Pathian a si ve lai;
RUTH 1:17
na thihnak ah ka thi ve lai i khika ah cun an ka vui ve ko lai. Pathian nih cu bantukin ka cungah tuah seh law, tam deuh zongin tuah ko seh, thihnak hmanh nih nangmah sinin ka ṭhen ai kun," tiah a ti.
Jesuh Khrih zumhnak in zumtu asi i zumtu sinak in zultu sinak tiang a phan ve cangmi Nangmah nih na Bawipa Jesuh Khrih zulh naa timh tikah hin zeibantuk thinlung taktak he dah zulh naa timh ve. Atang i ka van langhtermi zultu phunli hna ah hin zeibantuk zultu si dah naa timh ve..
1) Phungbia cawnpiaktu pakhat nih Jesuh cu a thawh i "Na kalnak paoh ah kan zul lai," tiah ati. Jesuh nih a lehmi cu "Cenghngia nih kua a ngeih i vate zong nih bu an ngeih" Sihmanhsehlaw Kei cu ihnak hmun hmanh ka ngei lo," tiah arak leh. Chimduhmi cu Keimah a ka zul duhmi paoh cu ihnak le tlunnak inn hmanh an ngei te lai lo caah nannih phungbia cawnpiaktu hna cu nanmah cawnpiakmi hmanh nanmah nih a zullomi nan si i mi nih upatnak pek le hmunhma ttha pek a duhmi nan si caah na ka zul kho lai lo tihi Jesuh nih achim duhmi asi. Nangteh Jesuh Khrih zulh nai timh tikah hmunhmattha ngeih duh le mi nih thangthat duh, chawva kawlnak men ah asi ahcun na nganh ve hrimhrim ko lai..
LUKA 9:57
Annih nih an kal lengmang lioah khan pakhatpa nih a thawh i, "Na kalnak paoh ah kan zulh lai," tiah a ti.
LUKA 9:58
Jesuh nih cun, "Cenghngia nih kua an ngei i vate nih bu an ngei, sihmanhsehlaw Mi Fapa cu riahnak hmun hmanh ka ngei lo," tiah a ti.
2) Jesuh nih adang pakhat zulh a duhmi cu a thawh i "Ka zul," tiah ati. Mipa nih cun athawh i "ka pa va vui ta ning," tiah a leh. Jesuh nih "Mithi nih an mithi kha va vui ko hna seh. Nang tu cu va kal law Pathian Pennak kong kha va chim ko," tiah a ti. Jesuh nih azultu hna sinah a chimhmi hna cu zulh nan ka duh ahcun Keimah hnak in nanu le napa na daw deuh hna lai lo i na vailam tah teh na put lai tihi asi. Cucaah mithi nih an mithi kha va vui ko hna seh atinak cu asi. Nangteh Pathian Pennak chim dingah zeicem nih hin dah an donh ve. Thihnak hmanh nih Pathian Pennak kong chim hi in donh hna hlah seh tihi Jesuh Khrih nih a kan cawnpiakmi asi.
LUKA 9:59
A dang pakhat tu cu a thawh i, "Ka zul," tiah a ti. Sihmanhsehlaw cu pa nih cun, "Bawipa, ka pa kha va vui ta ning," a ti.
LUKA 9:60
Jesuh nih cun a leh i, "Mithi nih an mithi kha va vui ko hna seh. Nang tu cu va kal law Pathian Pennak kong kha va chim ko," tiah a ti.
3) Jesuh cu a dang zultu pakhat nih a thawh ve i, "Bawipa kan zulh lai, sihmanhsehlaw ka chungle kha dam tein, va ti ta hna ning," tiah a ti. Mah bia hi Jesuh nih a theih tikah aa lawm kho hrimhrim lo i a lehmi cu "Ahohmanh leithuan aa ot i hnulei a zoh peng ṭungmi cu Pathian Pennak caah santlaihnak a ngei lo," tiah a ti. Chimduhmi cu mi zeihmanh Pathian Pennak Thawngtha chim ah ithawh ttung i a kaltak ciami asia a herh pengmi cu Pathian Pennak caah santlaihnak taktak an ngei kho lo tiah ati. Asullam cu a thinlung dihlak in a kal loh tinak asi. Biatak cu Pathian Pennak thawngtha chim ah ithawh ahcun lungthin dihlak, ruahnak dihlak, thazang dihlak, thlarau dihlak he kan chim awk asi. Jesuh Khrih zulhnak dontu hi vawlei ah zeihmanh a um awk hrimhrim asi loh tinak khi asi ko....
LUKA 9:61
A dang pakhat nih a thawh ve i, "Bawipa kan zulh lai, sihmanhsehlaw ka chungle kha dam tein, va ti ta hna ning," tiah a ti.
LUKA 9:62
Jesuh nih a leh i, "Ahohmanh leithuan aa ot i hnulei a zoh peng ṭungmi cu Pathian Pennak caah santlaihnak a ngei lo," tiah a ti.
4) Jesuh Khrih zumhnak in khamh kan si dih i Khamhnak ahmumi paoh cu zumtu kan si. Bawipa nih hin Amah azumtu sinak tiang lawng hi a kan duhpiakmi si loin zultu taktak si hi a kan duhpiakmi cu asi. Cucaah vawlei cung hmunzakip ah Thawngtha va chim ulaw a ka zummi paoh ka zultu ah va ser hna uh atinak kha asi. Cucaah Jesuh nih lamkaltu ah athimmi hna sinah achimmi cu "Ahohmanh nih zulh nan ka duh ahcun mah zawnruahnak kha nan ngol lai i ni fa tein nan vailam kha nan i put lai i nan ka zulh lai," tiah a rak ti hna. Jesuh Zultu taktak si na duh ve asi ahcun Nangmah le nangmah zawnruahnak cu na ngol lai i ni fa tein mah vailam put in na zulh lawnglawng ah zultu tling na si kho ve lai. Sihmanhsehlaw nihin zumtu vialte nih Jesuh Khrih zultu si kan itimh ning cu kanmah duhning in le hlawknak ding caah asi ko hih. Jesuh nih ka zultu taktak si nan duh ahcun mah zawnruahnak nan ngol lai i, Nangmah duhnak tlinter si loin Keimah duhnak zulh le tlinter nan van i zuam lai tihi asi.
LUKA 9:23
Cun annih cu an dihlak in a thawh hna i: "Ahohmanh nih zulh nan ka duh ahcun mah zawnruahnak kha nan ngol lai i ni fa tein nan vailam kha nan i put lai i nan ka zulh lai.
Adonghnak ah Khrih dawtnak le Bawipa Jesuh Khrih thawngin Pathian dawtnak he a kan tthen khotu ding hi cunglei vawlei ah siseh tanglei vawlei ah siseh zeihmanh an um hrimhrim lo tihi nawlchih ka duh ve. Amah belte fakpi in chim ka duhmi cu zeitindah Bawipa Jesuh Khrih hnu zultu si nai timh ve timi hi asi. Jesuh Khrih zumhnak in Amah zumtu kan si i zumtu in zultu kan si ve tikah hruaitu le Saya kan si lai timi hnakin Jesuh Khrih hnuzultu le a tuahciami zulh le zohchih in a nung dingmi kan si ti khi ka chim duh deuhmi asi. Jesuh Khrih cu Pathian Fapa, Pathian sinak tling angeimi asi nain sal sinak tu ai thim bantuk hin bawi sinak le micung kainak si loin sal sinak le tangdornak, mitang ttumnak tu thim in ka zultu van si uh tiah cawnpiak kan si. Sihmanhsehlaw nihin Zultu cu Saya si dih le hruaitu si dih kan i tim cang i sangpi ah kan i cawi cang hna, Bawipa nih a kan cawi caah si loin kanmah tein cungah kan i cawi asi deuh. Jesuh nih achimmi cu Kei cu Saya le Bawipa nan ka tihi a hmanmi asi ko nain nan lakah sal bantukin ka um i rianttuanpiaktu bantukin ka um tiah azultu hna sinah arak chim lengmang. Mah ruangah khan pei a zultu kha an ke arak ttawl hna i ka tuahmi hi van i cawn ve uh atinak kha asi cu... Nangteh Midang riantuan piaktu maw asi? Mi dang nih riantuan piakmi dah? Midang ke ttawlpiaktu maw na si? Midang nih ke tawlpiakmi dah na si? Midang nih ke ttawlpiakmi si na duh ko le midang nih riantuan piakmi si na duh ko ahcun Jesuh Khrih hnu zultu taktak cu na si bal lai lo i a ka zummi paoh ka Zultu ah van ser hna uh atimi chung ahcun nai tel ve hrim bal lai lo. Jesuh Khrih zulh kan timh ning thinlung hi thleng hna usihlaw ruahchannak dang ngei bak lo in Amah Jesuh Khrih lawng duhnak taktak he zultu ttha si ve cang hna usih. Jesuh Khrih zulhnak in ruahchannak dang ngeilo in Bawipa Jesuh lawng hi kan i ruahchannak nganbik si zungzal cang ko seh. Bawipa Jesuh lawng hi na duhbikmi asi ko ahcun Amah lawnglawng na ngah ve lai i Amah cu zeizong vialte asi kha an hngalhter ve te lai... Jesuh Khrih na ngeih taktak ahcun Amah ah abaumi zeihmanh aum hrimhrim lo tihi ka nawlh rih tuah lai... Bawipa nih sunparnak co zungzal ko seh...
ROM 8:35
Cucaah aho nih dah Khrih dawtnak he cun a kan ṭhen khawh lai? Harnak nih maw, temhinnak nih maw, hremnak nih maw, rawlṭamnak nih maw, pamnak nih maw thil ṭihnung nih maw, thihnak nih maw, zeital nih an kan ṭhen kho hnga maw?
ROM 8:37
Zeihmanh nih an kan ṭhen kho lai lo, hi thil vialte hna chung hin a kan dawtu thawngin kannih cu teitu hna nakin teitu kan si deuh.
ROM 8:38
Zeicahtiah a kan dawtnak he cun zeihmanh nih a kan ṭhen kho lo ti kha fiang tein ka hngalh: thihnak nih siseh, nunnak nih siseh, vancung i a ummi vanmi nih si hna seh, uktu le ṭhawnnak nih si hna seh, atu caan nih siseh, hmailei caan nih siseh,
ROM 8:39
cunglei vawlei nih siseh, tanglei vawlei nih hin siseh, an kan ṭhen kho lai lo — kan Bawipa Khrih Jesuh thawngin kan ta a simi Pathian dawtnak he a kan ṭhen khotu ding cu sermi thil dihlak ah hin zeihmanh a um lo.