Ka lungthin hi zei thil in dah ka khahter lai?

Hmunzakip ai tthenmi zumtu vialte hna Bawipa nih Amah duhnak zulh nan duhnak kha in hngalh piak hna sehlaw nan duhnak kha tlinter ko seh. Nan duhnak kha tlinter ko seh ka timi cu nanmah taksa duhnak, thinlung duhnak le thlarau duhnak khi chim duhmi si loin Pathian duhnak zulh nan duhmi, duhnak tu kha tlinter ko seh ti khi ka chim duhmi asi. Amen. Zumlotu si loin zumtu nih hin zeitindah Pathian duh ning in kan thinlung kan khahter cio lai tihi ruahlo awk a tthalomi asi. Minung tampi cu kan thinlung put hi zumlotu he kan i tluk lengmang. Nan ka ti rih dingmi cu minung cu a tlingmi hohmanh kan um lo tiah nan ka ti rih hnga. Biatak cu kanmah minung kan tlinlo ruang ahcun pei a tlingmi kan si khawhnak hnga zeizong vialte ah Atingmi Pa, Jesuh Khrih cu Pathian nih pek kan si cang cu. Amen. Atlingmi Pa, Jesuh Khrih a zummi paoh cu Amah tlinnak le teinak, tthawnnak tiangin hrawmh kan si cang. Amen. Tlinnak ka ti tikah hin minung tahnak fung in tlinnak na kawl ahcun zeitik hmanh ah atling in na hmu bal lai lo nain Pathian mithmuh le tahfung ahcun Jesuh Khrih thawngin a tlingmi na si cang. Amen. Biapi asimi cu minung nih zei an in ti hnak in Pathian nih ka mit ah atlingmi na si a kan ti hi a biapi cemmi cu asi. 

Nihin i hal kan duh hnawhchan bikmi cu na thinlung hi zeiin dah na khahter ve timi hi hal kan duhmi cu asi. Biatak cu na lungthin hi Phaisa duhnak in na khahter ko ahcun phaisa kawlnak lawnglawng a ruat ko lai. Nu le Pa sual duhnak in na khahter ahcun mah lawng te cu a ruat ko lai. Nungak le tlangval duhnak in na khahter ko ahcun na thinlung nih mah lawng te cu a ruat ko lai. Vawlei taksa duhnak phunkip cungah na thinlung hi na chiah ahcun mah ahcun na thinlung cu a um zungzal ko lai. Video zohnak le news relnak men ah na thinlung na chiah ahcun mah chung lawng te ah a um ko lai. Sihmanhsehlaw minung vialte nih kan thinlung hi pakhatnak ah Jesuh Khrih kan zumhnak thawngin Pathian duhnak le dawtnak in kan khahter ve awk asi. Pathian duhnak le dawtnak ka ti tikah hin a zumlomi caah si loin azummi caah asi deuh ti zong hi fiang tein ttialchih ka duh. Pathian na duhkhawh lo i na dawt khawh lo ahcun na khuaruah rak har hlah, Jesuh Khrih ka zumh ko na timi cungah khan na zumhnak tiang lawng na tan caah asi. Zumhnak tiangah tangmi si ti loin Jesuh Khrih a zum taktak mi cu Jesuh Khrih nih kan zumhmi zumhnak in Thiang Thlarau a kan toih, Thiang Thlarau toih cangmi caah cun Pathian hi a duh in kan duh ve i a dawt in dawt ve le anawl zulh duhnak in zulhthiamnak leiah a kan kalpi ve tihi keimah nih ka teh cuahmah mi tehte asi ve. Amen. Bawipa nih sunparnak co ko seh..

Pathian dawtnak ka tep ve cang, ka hrinthan ve cang na ti taktak ve ko asi ahcun atang i ka rak langhtermi hna he hin thlalang bangin na nun van i bih ve law na tlinhmi le na baumi an um maw? Thlalang kan i zoh tikah kan mui achiatnak le kan tlamtlin lonak, kan i dawhnak kan i hmuh tawn bantukin na thinlung hi zei in dah na khahter ve tihi van i zoh ve hnik. Biatak cu zumtu ka si ve ko, Jesuh Khrih hnuzultu ka si ve ko na ti asi ahcun na thinlung hi nangmah duhning in khahter siti loin an khamhtu Pa Jesuh Khrih duhning tu in na khahter ve awk asi. Paul nih Filipi khuami hna sinah ca a kuatmi hna cu Jeush Khrih thawngin Pathian azumtu le angeitu taktak na si ve cang caah nan thinlung hi mah hna hin van khahter hna uh tiah thazang peknak ca a rak kuat hna. Cu ve bantukin mah Thawngtha arelmi vialte nangmah sinah ka thinlung taktak in zumtu le zultu taktak na si cang ruangah nan thinlung hi atang i ka langhter cangmi bantukin khahter ve hna uh tiah forhfialnak ka van ttial chih ve. Jesuh Khrih zumhnak in Amah azummi le azultu kan si cang ruang tu ah ralttha tein mah thinlung put hi na ngeih hrimhrim hna awk asi tiah ca kan kuat. Mah thinlung put hi na ngeihlo ahcun tthan ding tlukin na tthang lai lo i hmaizah upattlak sinak nih an zamtak ko lai, Sihmanhsehlaw mah thinlung put hi naa nunpi hna ahcun minung mithmuh ah siseh a sunglawi tukmi kan Pathian mithmuh ah siseh duh a nungmi na si zungzal ko lai. Amen.. Ka Pa kan Pathian cu Jesuh Khrih kan zumhnak in kan ngeih ciomi Thiang Thlarau thawngin sunparnak pek si zungzal ko seh. Amen...

Jesuh Khrih cu Pathian fapa asi tiah kan thinlung taktak in kan zumh, kan cohlannak thawngin Pathian nih Amah fanu le fapa ah cohlang cangmi hna kan thinlung put cu Pathian duhnak le dawtnak, a nawl zulh duhnak hna hi an si. Pathian duhnak le dawtnak, anawl zulh duhnak ah a thinlung a chiahmi hna cu mah thinlungput hi kan thinlung chungah thlalang kan i bih tikah hmuh khawh an si. Amen. Nangteh Jesuh Khrih zumhnak in Pathian fanu, fapa cangmi na si ko ahcun zeibantuk thinlung put dah na ken vemi asi? Na thinlung nih a duhmi le na kenmi hna nih hin ahodah (A ho fa dah?) na si ti kha fiang tein tehte a khan ve?

  • Ka LUNGTHIN hi A TTHAMI thil in ka khahter chin lai...
  • Ka LUNGTHIN hi THANGTTHAT awk a tlakmi thil in ka khahter chin lai...
  • Ka LUNGTHIN hi A TAKTAK a simi thil in ka khahter chin lai...
  • Ka LUNGTHIN hi A SUNG LAWIMI thil in ka khahter chin lai...
  • Ka LUNGTHIN hi A HMANMI thil in ka khahter chin lai ...
  • Ka LUNGTHIN hi AA DAWHMI thil in ka khahter chin lai ...
  • Ka LUNGTHIN hi UPAT AWK a tlakmi thil in ka khahter chin lai ....

———

FILIPI 4:8

A donghnak ah ka u le ka nau hna, nan lungthin kha a ṭha le thangṭhat awk a tlakmi thil in khahter hna u: a taktak a simi thil, a sunglawimi thil, a hmaanmi thil, aa dawhmi thil le upat awk a tlakmi thil in khahter hna u.