Nihin zumtu he zumlotu he kan doh lengmang mi hna hi minung an si tawn. Ahleiin zumtu taktak nih cun kan doh dingmi hna hi minung an si awk asi hrimhrim lo. Kan doh awk hi zawtnak, sifahnak, thintoinak, damlonak, tlamtlinlonak, harsatnak, buainak, siknak hna hi si loin mah hna a chuahtertu satan, khuachiapa tu hi kan doh dingmi cu asi. Biatak cu buainak le remlonak, tthatlonak vialte minung karlak ah a umtertu hi minung kanmah hi si loin mit in kan hmuh khawhlomi satan, khuachia, thlarau chia rianttuannak hna tu an si. Minung pakhat le pakhat kan i remlo tikah kan ruah lengmang mi cu mah nu le mah pa hi mitthalo an si, remlonak a kawlmi, buainak a kawlmi, sik aduhmi le tthatlonak achuahtertu an si kan ti tawn. Ataktak le ngaingai ti ahcun anmah tu kha si loin an chungah remlonak le tthatlonak a chuahtertu satanpa, khuachiapa, thlarau chia rianttuannak ruang tu ah a rak si diam. Minung vialte hi sual um lo ahcun kan ttha dih ko. Sual cu Pathian sin arami si loin satanpa sinin arami an si. Adam le Eve ruangah sual cu minung chungah khua a rung sa i cu nak cun minung vialte kan thinlung hi sual duhnak le palh duhnak, tthatlo duhnak vialte in a khat. Biatak cu minung hi a sualmi si loin kan chungah sual duhnak aumtertu satanpa, thlarauchia ruang tu ah kan sual a rak si deuh.
Nihin ah hin satanpa, khuachiapa le thlarauchia hna hi mit in hmuhkhawh awk in um hna sehlaw Pathian fale vialte nih hin kan thazang dihlak chuah in le kan thil ti khawhnak vialte chuah cio in fakpi in kan doh hna hnga. Hriamnak tthattha in kan doh hna hnga i meithal tthattha in kan kah hna hnga. Sihmanhsehlaw kan ralpa cu mit in hmuhkhawhmi chungah aum caan a phanh rih lo caah Adam thokin a tu tiang hrimhrim hi minung cungah tthatlonak in rian a ttuan zungal ko. Minung le minung karah remlonak a chuahter lengmang tu hi minung si loin minung chungah rian attuantu thlarau chia rianttuannak asi ti kan hngalh ahcun ai huami vialte hi remnak kan hmu hnga i kan doh dingmi kan minung hawi si ti loin kan ralpa santapa, khuachiapa le thlarauchia tu an si cang hnga. Innchungkhar chung cio zongah buainak le remlonak, duhnak zulh i thiamlonak, itheihthiam khawhlonak vialte achuahtertu hi nangmah nih buainak a chuahtertu na si na timi nu/pa kha si loin a chungah buainak le remlonak chuahter dingah achiatu satanpa, khuachiapa ruang tu ah an rak si. Minung hi kanmah lawng ti ahcun atthami le remnak, dawtnak aduhmi kan si dih ko nain kan ralpa ai telnak paoh ahcun ai dawmi hna lak hmanh ah buainak chuah khawh chungin chuahpi aitim zungzalmi ral kan ngei tihi kan philh awk attha lo.
Nihin Thawngtha ka ttialmi hi ttha tein na rel i na thinlung dihlak in na zumh i naa nunpi bak ahcun nan innchungkhar ah remnak tampi a um cang lai, nan Khrihfabu chungah remnak a leng cang lai. Cucu thluachuah kan ti lengmang mi cu asi i innchungkhar le Khrihfabu ah remnak le dawtnak a um cang ahcun khua awng pemhnak le tlamtlingnak nih a van zulh cuahmah lai. Na nupi, na va, na fale karlak ah buainak le siknak a um tikah na thinlung in fakpi in rak ruat cang law ti ka duhmi cu buainak a chuahtertu nasi tiah na ruahmi minung cungah palhnak chia ti loin buainak a chuahtertu taktak satanpa, khuachiapa cungah palhnak vialte kha rak chia dih law nan innchungkhar vialte ithek dih hna seh ti an duh tu hna cu khuachiapa tu hi asi tiah rak i cinken ve cang. Minung kan si caah kan isik caan, remlo caan, buai caan, dawtlo caan tiin tampi a um ko lai, cucu minung kan si caah a phung asi ko tiin minung kan phungah relmi si ti loin mah vialte a chuahtertu santanpa, khuachiapa ruang tu ah asi ti hngalhnak he zumhnak in tei khawh rak i zuam cang. Biatak cu kan dohmi hi kan i palh lengmang ruangah kan innchungkhar a damlo i kan Khrihfabu in kan miphun tiang adam ti lo. Kan doh dingmi hi kan minung hawi si ti loin kan ral taktak asimi santanpa, mit in hmuhkhawh asi rih ttunglomi minung chungah khua asami thlarauchia, minung le minung karlak ah biatuahnak in ral a umter zungzal tu khuachiapa, satan le thlarauchia tu hi kan ral taktak le kan doh zungzal dingmi cu asi. Amen!
Santanpa, khuachiapa le thlarauchia hna hi kan ral taktak le kan doh taktak hna dingmi cu an si ti kan fiang tikah teinak hmuhnak hram cu kan i thok ve. Minung le minung cu I doh len hmanh sihlaw ai teimi kan um lai nain kan teimi cu khuachiapa, thlarauchia, satanpa kha si ti loin kan minung hawi tu kan tei hna a rak si deuh. Minung hawi kan i teinak nih hin Pathian duhnak taktak a kheng kholo i Pathian nih tei hna seh ti a kan duhmi cu Jesuh Khrih kan zumhnak thawngin khuachiapa tu hi tei hna seh ti a kan duhmi asi. Teinak kan hmuhnak cu kanmah tthat ruangah le tuah khawhmi le sum khawhmi ruangah si loin Pathian Thlarau tthawnnak tuin asi. Amen! Biatak cu kan dohmi hi minung si loin thlarauchia, santanpa le khuachia hna an si ti kan hngalh peng paoh ahcun teinak cu kanmah ta asi zungzal ko lai. Aruang cu Jesuh Khrih thisen tthawnnak kan zumhnak thawngin teitu taktak kan si ve cang. Amen! Zeiruang ah dah khuachiapa riantuannak le santanpa, thlarauchia riantuannak kan tei khawh lo ti ahcun kan dohmi hna le kan doh dingmi hna kan i palh lengmang caah asi. Zawtnak vialte hi zei zawtnak dah asi ti hngalh ahcun damh a fawi te ko. Cubantukin buainak le remlonak, siknak. hnahnawhnak, sifahnak, damlonak, tthatlonak tampi kan cung a phanh tikah minung ruangah asi timi thinlung put in si ti loin kan ralpa sinin arami an si ti hngalhnak he ttihnak zeihmanh um loin ralttha ngaiin zumhnak he kan doh ahcun teitu lakah teitu kan si zungzal ko lai. Amen! Na cungah a phanmi thinhannak le buainak daihnak dingah le remnak phanh khawhnak ding ahcun na thinhunmi minung cungah lehnak um loin dai tein umnak nih hin teinak hmuhnak ah atthabikmi hriamnam phunkhat asi. Dai tein lehlo umkhawhnak cu khuachia rianttuannak asi ti na hngalh lawnglawng ah dai tein na um kho lai. Khuachia rianttuannak ti si loin minung ruangah asi na ti ahcun zeitik hmanh ah na dai kho bal lai lo..
Adonghnak ah chim ka duhmi cu zumtu vialte hi dawtnak le remnak in a khat dingmi kan si nain atu kan chan hi zoh tikah dawtnak le remnak si loin remlonak le huatnak in kan khat. Hihi minung kan chiat ruangah le tthatlo ruangah si loin a kan hlen lengmangtu khuachiapa riantuannak hrimhrim an si tihi hngalhter kan duh hna. Zohmanh Pastor le Pastor karlak ah remnak umloin keimah tinak in kan khat, Evangilist le Evangilist kar zongah mah thangthat duhnak le keimah ka hngalh cem tinak in kan khat, Khrihfabu hruaitu vialte karlak ah remlonak lawngte in kan khat, kan kaa cun thlum ngaiin le biadawh ngaiin kan i chawn cio nain chunglei in cun zuamcawhnak in kan khat dih. Pathian rian kan ttuan kan ti dih cio nain kanmah duhning cio in Pathian rianttuan kan i tim, Pathian duhnak tlinter le nawl zulh cu chim loin kanmah duhnak tlinter tu hi kan izuam cemmi asi. Khrihfabu hruainak ah Khrihfabu a ngeitu Pa ruahnak hal loin kanmah ruahnak in Khrihfabu kan hruai cuahmah, kanmah khuakhannak hi attha cem ah kan ruah nain Bawipa thinlung cu kan nganh diam. Sihmanhsehlaw mah vialte a chuahtertu hi minung kanmah sihin loin kanmah minung pum le ruahnak hlan in rian attuantu khuachiapa hlennak tu arak si diam ai. Innchungkhar zongah keimah tinak in akhat, nupi nih va le ttihzah le hmaizah a um ti lo, va le zong nih nupi le dawt le hmaizah aum ti lo, fale zong nih nu le pa nawl ngeih le upatnak pek a tlawm chin lengmang. Mah vialte a hram cu na vapa tthatlo ruangah le na nupi , na fanu le fapa sual ruangah si hin loin khuachiapa hlennak chungah kan rak um caah asi diam ai. Biatak chim kan duhmi cu kan duhlomi thil kan innchungkhar cungah, kan Khrihfabu cungah, kan miphun cungah kan hmuh tikah minung le minung dohnak le buainak in phisin si ti loin zumhnak in thlacamnak he khuachiapa tu hi rak doh ve ko tiah kan sawm. Kan doh dingmi hna hi kan nawl a ngeilomi le an kan huatu minung si hrim loin mah huatnak an thinlung chungah achiatu khuachiapa tu hi kan doh dingmi cu asi. Amen! Nihin thawkin na dohmi hi minung si ti loin khuachiapa ah rak thleng ve cang law tiah kan sawm. Na doh mi hna hi minung hawi si ti loin an chungah remlonak phun tampi he rian atuan zungzal tu khuachiapa, satanpa, thlarauchia hna riantuannak tu hi an si. Amen. Bawipa nih sunparnak vialte Fapa Jesuh Khrih thawngin le Fapa Jesuh Khrih kan zumhnak thawngin Amah Fale ah cohlanmi kan dihlak cung zongin Pa Pathian nih sunparnak hmu zungzal ve ko seh. Amen...
—-
EFESA 6:12
Zeicahtiah kan dohmi hna cu minung kha si loin, vancung khua i a ummi thlarau sual ṭhawnnak hna le uktu hna le nawl ngeitu hna le hi a muimi chan lianhngannak hna hi an si.
FILIPI 1:28
Nan ral kha ṭih hna hlah u; ralṭha ngaiin um zungzal u law cu nih cun annih an sungh i nannih teitu nan si lai kha a langhter lai — teinak petu cu Pathian a si.
ZEKHARIAH 3:2
Bawipa nih Satan cu a thawh i, "Satan, nangmah cu Bawipa nih kan sik, Jerusalem khua a thimtu Bawipa nih kan sik. Hi mipa hi mei chungin chuahmi mei thingthu a si lo maw?" tiah a ti.
ZEKHARIAH 4:6
Vancungmi nih cun Zerubbabel kha hi bia Bawipa sinin a rami hi va chimh awk a ka fial: Na tei ko lai, sihmanhsehlaw ralkap ṭhawnnak in a si lai lo, nangmah ṭhawnnak zongin a si lai lo, ka thlarau tu in a si lai.
BIATHLAM 12:11
Kan unau hna nih amah cu Tuufa thi thawngin le an chimmi bia biatak a simi thawngin an tei cang; an nunnak pek kha an rak sian i thih zong an rak ngamh.
KOLOSE 2:8
Khrih chungin si loin, van le vawlei uktu thlarau hna sinin le minung nih pakhat le pakhat an i cawnpiak chin lengmangmi chungin a chuakmi minung fimnak, santlaihnak zeihmanh a ngei lomi fimnak, hlennak menmen a simi cu hmang in, ahohmanh nih sal ah in ser hna hlah seh.
BIATHLAM 12:7
Cun van ah khin raldohnak a um. Mikhael le a vancungmi hna nih khan limkeng cu an doh i limkeng nih cun a vancungmi hna he a rak doh ve hna.
BIATHLAM 12:8
Sihmanhsehlaw limkeng cu a sung i amah le a vancungmi hna cu van ah umnak nawl an ngei ti lo.
BIATHLAM 12:9
Limkeng nganpi cu lengah an hlonh. Cu limkeng cu rulpi tar, Khuachia, asiloah, Satan timi, vawleicung mi vialte a hleng dihtu hna kha a si. Amah cu a vancungmi vialte hna he vawlei ah an thlak hna.
BIATHLAM 12:12
Cucaah cun nannih van hna le khika i a ummi vialte hna, i lawm tuah u. Sihmanhsehlaw vawlei le rili caah cun ṭihnung a va si hringhran dah! Zeicahtiah Khuachia cu nan sinah a rung ṭum cang i cu pinah caan tawite lawnglawng ka ngei ti kha a hngalh fawn caah a thin a linh in a lin ko," tiah a ti.
BIATHLAM 12:13
Limkeng nih vawlei cungah thlak ka si cang ti kha a hngalh tikah, fapa a hringtu nu kha a dawi colh.
BIATHLAM 12:17
Limkeng cu minu cungah khan a thin a hung ngaingai i minu tefa a tang rihmi vialte hna doh awkah khan aa thawh; cu hna cu Pathian nawlbia a ngai i Jesuh nih a phuanmi biatak, zumh awk tlak tein aa tlaihmi kha an si.