Kutkaa bitnak thim timi cu

Saya Van Ram Uk nih kan Khrihfabu ah Thawngtha a kan chimmi cu ka lung atling tuk. Atak in nunpi khawhnak Bawipa nih lam a ka hruai lai. Thawngtha nan theihmi hi atak in nunpi dingah rak ngai ve cang. Tuni ah zei lam dah naa thim ve cang lai timi biahalnak he ka rak in leng. Thim dingmi hna cu:

  1. Lamkauhnak maw naa thim rih ko lai? lambitnak dah naa thim ve cang lai? Lambitnak hi Bawipa nih thimter an duhmi asi.
  2. These cungah innsami maw na si peng rih ko lai? Lung cungah inn sami dah na si ve cang lai? Bawipa nih lung cungah inn sami siseh ti an duh.
  3. Phaisa maw naa thim peng rih lai? Pathian dah naa thim ve cang lai? Pathian nih cun Amah ka thim seh ti an duh...

Acung i ka ttialmi hi na lungthin in van i dap law na zulh lengmang mi le na thinlung nih a duh lengmangmi chungin lungthlen na duhmi a um maw? Lung timi cu thinlung hi asi i thlennak timi cu na zulh tawnmi lambi le lamkau chungin zulhduhnak ngeih tilo thinlung thlennak khi chim duhmi asi. Na lungthin nih thlen duhnak a ngeih tikah biakhiahnak na ngeih ahau i cu biakhiahnak na ngeih khawhnak dingah thim dingmi na ngeih ahau. Thim dingmi cu lambi le lamkau hna hi an si. Kei cu lambitnak kaa thim.. Nangteh zei lam dah naa thim ve cang lai? Lambitnak kaa thim tikah Bawipa duhnak kaa thim tihi rak philh hlah..

Pathian duhnak kaa thim lai na ti ahcun naa thim ding cu Amah nawlngaih zungzal ding hi asi i Pathian nih i thim seh ti an duhmi hngalhter kan duhmi cu lambi naa thimmi, lungcung innsak naa thimmi le nangmah duhnak si loin Pathian duhnak naa thimmi hna hi an si. Pathian nawlngaih kan ti lengmang mi cu Pathian duhnak i thim hi asi zungzal ko. Biatak cu Pathian nih a kan duhpiakmi hi a fawinak lei lam hi thim lengmang khi si loin aharnak lam lei hi i thim hna seh ti a kan duhpiak zungzal. Aharnak lam ah hin fimnak aum, thluachuah aum, ngandamnak aum, Bawipa he naihte in umjal ttinak lam asi. Zei ruangah ti ahcun kanmah tein kan tuah khawh lo caah Thiang Thlarau bawmhhal a kan thiamter i Thiang Thlarau bawmhnak thawngin adongh tiang tuah khawhnak le teinak tling tiang kan hmun. Kutka bitnak i thim cu nangmah duhnak zulh si ti loin Pathian duhnak zulh tuhi kutka bitnak thim timi cu asi. Nangteh zeilam dah naa thim cang lai?
—-
MATTHAI 7:13
"Kutka bi chungah cun lut tuah u, zeitintiah Hell ah a kalmi lam cu a kau i a fawi i mi tampi nih an zulh.
MATTHAI 7:14
Nunnak a phanmi lam cu a har i a kutka cu a bi i a hmumi cu tlawmte lawng an si.
MATTHAI 7:24
"Cucaah hi ka bia a thei i a zulmi cu lung cungah a inn a sami mifimpa bantuk a si.
MATTHAI 7:25
Ruah a sur, ti a lian, thlitu nih fak piin a hranh. Sihmanhsehlaw lung cung i sakmi a si caah khan a pur lo.
MATTHAI 6:24
"Ahohmanh bawi pahnih sal nan si kho lai lo; pakhat kha nan dawt deuh lai i pakhat kha nan huat deuh lai; pakhat sinah khan cun zumhawktlak tein nan um lai i pakhat tu kha cu zei ah nan rel lai lo. Pathian le tangka cu an rian nan ṭuan kep kho lai lo.