Nihin Khrihfa ai timi kan miphun tampi nih kan uar ngaimi le kan chim ngaimi cu a lamkip in tthang usih ti hi asi. Mah Baibal hi khamhnak aco rihlomi caah si loin Khamhnak ahmu cangmi hna kan caah asi. Khamhnak na co ve rihlo asi ahcun Khamhnak tling na co taktak nak hnga, Khamhnak tling an pe khotu Bawipa Jesuh hi na zumhnak an cohlang ve tiang na lungthin taktak in rak zum ko. Lungthin taktak azummi caah cun Khamhnak tling kan pek cang ti kan i hngalhnak dingah Thiang Thlarau toih kan si. Amen. Dawtnak lungthin tuin thil pahnih a kan fialmi cu hihi asi: 1) BIATAK asimi JESUH KHRIH kong hi kan chim deuh awk asi timi le. 2) kan LU asi mi KHRIH LEIAH hin ALAMKIP in kan TTHAN awk asi timi hi asi ko. Amen! Paul nih Efesa khua mi hna sinah alamkip in rak tthang ulaw ati hnawhchan mi cu zeidang, zeidang ah si loin Jesuh Khrih lei tu ah, Jesuh Khrih he hawikomhnak le Jesuh Khrih he i hngalhnak tu ah tthang uh tihi asi. Paul nih a kan fialmi cu zeidang si loin Jesuh Khrih nih Thiang Thlarau a kan toihmi thawngin
- BIATAK asimi Jesuh Khrih Thawngtha chimnak ah thang uh..
- Zeidang ah si loin kan Lu asimi Jesuh Khrih hngalhnak leiah alam kip in tthang uh..
- Thlacamnak in Jesuh Khrih he hawikomhnak ah tthang uh
- Thiang Thlarau umpinak he Baibal relnak le relmi nunpinak in Jesuh Khrih hngalhnak ah tthang uh
- Thangtthat tlak Pathian le Jesuh Khrih cu Thiang Thlarau thawngin thangthatnak he upat, ttihzah pekthiamnak he tthang uh
- Thiang Thlarau hruainak thawngin Pa Pathian le Jesuh Khrih nawl zulh duhnak le annawl ngaihnak he tthang uh
- Jesuh Khrih nih a kan dawt bantukin pakhat le pakhat lungthin tak in dawtnak he tthang uh. Amen!
- Abik in chimchih ka duhmi cu zumhnak in Jesuh Khrih, Amah he tonnak le umttinak, hawikomhnak he ka chungah aum ti hngalhnak in tthang uh. Jesuh Khrih hi Amah he naa ton ballo ahcun Amah hngalhnak cun na tthang bal lai lo. Jesuh Khrih he tonnak nih hngalhnak achuahpi i hngalhnak nih hawikomhnak a chuahpi ve, hawikomhnak nih Khrih leiah tthannak achuahpi ve. Amen. Jesuh Khrih hngalhnak tling an petu cu Amah he tonnak, biaruahnak le hawikomhnak ngaihnak lawng hin asi lai. Cawnnak le chimnak, relnak le theihnak tiang lawngin cun hngalhnak tling an phanhpi hrimhrim lai lo. Jesuh Khrih, Amah he naa ton tik lawnglawng ah Jesuh Khrih na hngalh ning le na hmuh ning a tling lai i na nun ai dang te lai. Mi nih chimmi Jesuh Khrih kong ah na tan peng ve rih ahcun nangmah ning te na si zungzal ko lai.
Khrih leiah alam kip tthan na duh taktak ko ahcun lamdang pakhat hmanh a um lo, Jesuh Khrih hrimhrim na ngeih ahau. Biakinn na phak lo ahcun zeitindah Thawngtha na theih khawh lai? Thawngtha na theihlo ahcun zeitindah na zumh khawh lai? Jesuh Khrih na zumhlo ahcun zeitindah khamhnak na co khawh lai? Jesuh Khrih ka zumh ko na ti hmanh ah na zumhnak an cohlan lo ahcun zeitik hmanh ah khamhnak na co bal lai lo. Khamhnak na co lo ahcun zeitindah Jesuh Khrih na ngeih khawh lai? Jesuh Khrih na ngeih lo ahcun zeitindah na ton khawh lai? na ton lo cun zeitindah na hngalh khawh lai? na hngalh taktak lo cun zeitindah Khrih leiah cun na tthang khawh lai? Jesuh cu na zumh i na ngeih hnu lawngah na ton lai i na ton taktak hnu lawngah BIATAK asi na hngalh te lai. Amah he tonnak lo cun hngalhnak a tling lo bantukin BIATAK nih kan luatter an ti lo cun luatnak tling a um ve lo tihi chimchih ka duh. Jesuh Khrih na chungah naa ngaih ve hlan chung paoh cu a tu i na tuah lengmang mi hna zong hi santlaihnak zeihmanh an ngeilo i pakpalawng lawngte an si ko. Nihin zumtu cu Jesuh Khrih hnak in a riantuan kan duh deuh. Jesuh Khrih ngaih ttunglo i Jesuh Khrih rian ka ttuan lai ti cu santlaihnak zeihmanh a ngei loh. Biatak cu tuahnak in khamh si loin zumhnak tu in khamh kan si. Ka chim duhtukmi cu ka zumh na ti hmanh ah na zumhmi Pa, Jesuh Khrih na ngeih hlan chung cu na tuahmi thil tthalo kha na tuah peng rih ko lai. ka zumh tinak tiang lawngah hin khamnak a tling lo i Khamhnak a tlinnak cu zumhnak dihlak in kan zumhmi Jesuh Khrih nih Thiang Thlarau a kan toihmi kan ngeihnak hin atling. Jesuh Khrih ngeih ttung lo i Khrihfabu chung hna rianttuan hi sullam ngeilo asi. Jesuh Khrih kan ngaih hnu tu ah a rian tuan cio hna usih tiah kan sawm hna.
Jesuh Khrih na ngeih naa theihlo ahcun na khuaruah rak har hlah, na ngeih rih lo caah asi ko. Jesuh Khrih he kan i tong ka thei lo na ti ahcun fiang tein chim kan duhmi cu nan i ton ve rih lo caah asi ko. Jesuh Khrih na ngeih lo le nan i ton ballo ahcun Khrih lei ah a lamkip tthannak lam a um hrimhrim lo (tthan cu chimlo khamhnak a hmumi chungah naa tel rih lo). Khamhnak hi zumhnak lo in lamdang a um lo nain fakpi in chim ka duhmi cu zumhnak in khamh kan si nakhnga kan zumhnak hi Cohlantu (Pathian, Thiang Thlarau le Jesuh Khrih) nih a kan cohlan lawnglawng ah khamhnak tling kan hmu tihi asi. Zei ruangah ti ahcun zumhnak kan ti lengmang mi hi kaa in a zummi an um i thinlung dihlak in a zummi kan um ve caah asi. Thinlung takin Jesuh Khrih a zum taktak mi cu Thiang Thlarau toih kan si. Amen. Thiang Thlarau toih na si rih lo ahcun Khamhnak tling ka hmu rih lo ti rak i hngal ko. Nihin zumtu tampi cu Jesuh Khrih ngai baklo in le Amah he ton baklo in Khrih leiah a lamkip in tthan kan i tim, rian tampi tuan kan itim. Alamkip na timi ah khan Jesuh Khrih he ai pehtlailomi asi ahcun na tthang ve sawk ko lai nain Jesuh Khrih lei ah tthan na duh taktak ko ahcun Amah he tonnak le hawikomhnak, na chungah Jesuh Khrih a um cang ti hngalhnak lo cun na tthang hrimhrim bal lai lo.
Nihin ah nangteh zeidah a lamkip in tthan nai timhmi cu asi ve? Pa Pathian, Jesuh Khrih le Thiang Thlarau he thlacamnak in hawikomhnak ngeihchin lengmangnak le Thiang Thlarau bawmhnak in Baibal relnak le relmi nunpinak, Thiang Thlarau hruainak in rawlulh thlacamnak, Nunnak dihlak in thangthatnak he Khrih leiah a lamkip in na tthan chin lengmang tik ahcun vawlei cungah na herh bikmi hi zeidang zeidang si loin Khrih thawngin Pathian duhnak tuah le nawl zulh lawng hmanh si ti loin Amah he umtti lengmang hi asi cang lai. Amen! Atak tak le ngaingai ti ahcun Jesuh Khrih chungah hin Pathian duhnak tuah khawhnak le nawl zulh duhnak vialte cu a tling ko. Amen! Cucaah Jesuh Khrih he zumhnak in kan i pehnak thawngin thlacamnak he hawikomhnak ah thuk chin lengmang in tthang ko hna usih. Amen! Jesuh Khrih thawngin Pathian duhnak tuah le nawl zulhnak nih a van zulh hnga dingmi thluachuahnak cu nihin ah nangmah si khawh ning in naa zuam lengmangmi hnak ngan deuh in thluachuah an pe khotu asi kha na hngalh te lai. Amen! Bawipa nih sunparnak co ko seh... Alam kip tthang fial kan si mi hi zeidang si loin dawtnak lungthin tak in Jesuh Khrih kong, Biatak thawngtha tuhi kan chim awk le Jesuh Khrih he chunglei in kan i hngalhnak lei ah kan tthan awk asi ti hi asi. Amen! Taksa le thilri tthanak ah chim duhmi si loin Thlarau lei tthannak, Jesuh Khrih ngaihnak in Amah he hawikomhnak in tthannak tuhi a chim duhmi asi ti hi Bawipa nih in fianter ko seh...
—-
EFESA 4:15
kannih cu dawtnak lungthin in biatak kha kan chim deuh awk a si i kan lu a simi Khrih leiah khan a lam kip in kan ṭhan awk a si.