Bawipa zangfahnak thawngin nihin ka sining le ka dirhmun ka phanh khawhmi hi asi. Atu i ka umnak khua le hmunhma zong hi Bawipa thawng lawng tein ka um khawhmi le phak khawhmi asi ko tihi biatak tein tehte ka khan. Nai hrawng khua ka ruahmi ah le ka thinlung ah fak ngaiin rian a ttuanmi cu hihi asi: Kan miphun hi harsat ruangah Mizoram, Malaysia, Kuam, Ramthumnak tiin kakip ah tthek in pawcawmnak ah kan vai cio hna. Bawipa caah si loin kan pawcawnnak caah hmunkip ah kan vak hna. Hi kan vakvai lio i tuanbia kan ttial ciomi ka zoh tikah ka lung a fakmi le ka ngaih achiami tampi a um. Ka lung afakmi lakah kanmah duhmi le thimmi ruangah si loin kan tonmi hna ruangah hin ka lung afakmi cu asi. Bawipa tu nih kan theihpi ko seh. Cu lakah Bawipa kan lawmhtermi zong tampi a um lai i Bawipa kan ngaihchiattermi zong tampi a um lai tihi ka hmuh khawhmi asi. Biatak cu kan ttial ciami tuanbia hi minung nih cun kan thih hlanlo zeitik hmanh ah kan hnawt kho ti lai lo nain Pathian kan Pa nih cun Bawipa Jesuh Khrih thawngin a kan hnawtpiak dih cikcek. Bawipa Jesuh le Pa Pathian thangtthat si zungzal ko hna seh. Keimah thinlung umning tein ka van ttial ko lai i na nunnak ah hmunhma a lak ahcun fakpi in sualphuannak le sual ngaihchihnak he nangmah nih na tuahmi le pahmi ruangah Pathian sinah nawlnak le ngaihthiamnak hal in thla rak cam ve ti ka duh. Paw cawmnak ruangah nu le va tampi alang tlang in kan um dih hna, kan theih ballomi le hmuh ballomi tampi he cawhnur in khua kan sa hna. Bawipa nih minung hi taksa in ser kan si tikah taksa duhnak tampi nih kan nun hrawh a timh lengmang mi chungah nu le va, unau, hawikom, dawtmi tampi kan i tthen hna. Cu kan i tthen kar ahcun Bawipa Jesuh nih zumh awktlak nun a kan cawmpiakmi kaltak in taksa duhnak tampi nih a kan hlen i Bawipa hmaiah sualnak kan tuahmi ruangah chiatserhnak chungah fakpi kan tang.
Hiti ka ti tikah hin nangmah nih zeidah na tuah na hngalh ko lai caah thukpi in ka chim ti lai lo. Sihmanhsehlaw ahlei in nu le va asi cangmi nih na tuahmi ruangah Bawipa hmai ah kun hna usihlaw kan sual phuang in ngaithiam hal hna usih tiah kan nawl hna. Hiti ka ttial tikah kan miphun vialte hi chim duhmi si loin sualnak chungah a pilmi kan caah chimduhmi asi. Biatak cu Bawipa sinah ngaihthiam hal in na sual na phuanlo i na mertak lo ahcun na rak tuah cangmi sualnak ruangah le na tuah liomi sualnak ruangah chiatserhnak le dantatnak nih vainam bantukin an bawh zungzal ko hi rak i cinken. Chim ka duhbikmi cu Bawipa sinah na rak tuah cangmi sualnak ruangah le na tuah liomi sualnak ruangah hin ngaihthiamnak tling na hmuhnak hnga nawlnak tuah law ti kan duh. Kan rian bak asi ve mi cu kan tuahmi sualnak hi Bawipa ka sual ko tiin chim i ngaihthiam hal hi asi ve. Sual ngaihchih kan ti lengmang mi hi sualnak kan rak tuahmi phuan tiang lawng si loin kan tuah lengmang mi sualnak mertak tu hi sual ngaihchih cu asi deuh. Ngaihthiamnak tling ahmumi nih cun a tuah tawnmi sualnak kha a kaltak i sualphuan hi Bawipa fianning in ralttha tein a ngamh lai. Na tuah lengmang sualnak na tuah lengmang mi hi Bawipa nih an ngaihthiamnak tling na hmuh ve rih lo le na chungah a phan ve rih lo caah a tu na tuahmi na tuah peng rih hi asi deuh.
cubantuk tthiamtthiam in ka sualnak vialte ngaihthiam dih cikcek ka si hi sual ka phuan dih ruangah le sual kan ngaihchih in ka mertak dih ruangah si loin le mi dang cungah ka tuahmi sualnak vialte ngaihthiam ka hal dih hna ruang zongah si loin Jesuh Khrih nih vailam cungah ka sualnak leiba vialte champiak, khenhchih thihnak in a thihnak thawngin le Fapa Jesuh nih kanmah aiah Pa sin ngaithiam halnak cu cohlan in Pathian he remter kan si cang ti langhternak thawhtthannak thawngin a ka limpiakmi ka zumh ruang lawnglawng ah hin ngaihthiam ka rak si. Ngaihthiam ka si cang ruang tu ah hin Pathian he remter ka rak si. Ngaihthiamnak in Pathian he remter ka si tikah Pathian Fapa bantuk taktak in Jesuh he unau kan si i Pathian fa cannak ro taktak cu kan hmu. Halleluijah. Amen.
Sihmanhsehlaw sualnak ka tuahmi ka phuan dih ve le sualnak ka tuahmi vialte kaa ngaihchih dih i sualnak ka mertak dih ve le midang cungah ka tuahmi sualnak ngaihthiam ka hal ve hna cu ngaihthiam dih ka si cang ti langhternak tu khi a rak si diam. Mah ti ka ttial tikah sualnak kan tuahmi hi Bawipa sinah ngaihthiam kan hal lai lo timi khi chim duhmi si loin ngaihthiam kan hal hlan hrimhrim in Jesuh Khrih thawngin vailam cungah ngaihthiam dih cikcek kan si cang timi hi nawlhchih ka duh caah asi. Biatak cu kan tuahmi sualnak le palhnak ruangah Bawipa sinah kun in ngaihthiam kan hal cu ngaihthiam cang kan sinak kan i hngalh ruangah le zangfahnak nganpi a ngeimi Pathian asinak kan hngalh ruang tu ah arak si. Ngaihthiam cang kan si ti kan i hgalh cang caah asi ka ti tikah hin Pathian dawtnak hngalh loin sualphuannak tling timi siseh sual ngaihchihnak tling timi siseh sualnak mertaknak tling timi siseh kan tuahmi ruangah Pathian ngaihthiam halnak tling timi siseh a um kho lomi asi. Sual phuannak in mertaknak le sual ngaihchihnak in Pathian sinah ngaihthiam kan halnak zong hi Pathian dawtnak kan chungah a umnak thawngin Thiang Thlarau nih rian arak ttuan cang caah asi.
Midang ka ngaihthiam hna ruangah Pathian nih a kan ngaihthiam ve si loin ngaihthiam cang ka si ruang tu ah midang ka ngaihthiam ve hrimhrim ding hi Bawipa Jesuh nih a ka cawnpiakmi ka si. Midang na ngaihtiam ve rih hna lo ahcun ngaihthiamnak tling na hmuh ve rih lo caah asi ko lai. Sualnak leiba vialte champiak ka sinak kong ka chim ruangah ka sual leiba champiak ka rak si, si loin ka sualnak leiba vialte cu Jesuh Khrih nih a ka champiak dih cang ruang tu ah chimfial ka rak si a rak si diam. Biatak cu Pathian a ral a rak simi kanmah hi Pathian hrimhrim nih a hawi ah a kan ser i cucu Khrih thawngin Pathian hrimhrim nih a tuahmi asi bantukin midang zong zumhnak in a hawi ah ser dih a duh hnanak le an sulanak ngaihthiam dih an sinak kong hi chim dingah le phuan dingah fial kan rak si ve. Pathian nih hawi ah ser an duh ve cu na sualnak an ngeihthiam cangnak alanghnak asi i na sualnak kha nangmah sual phawtnak caah hmang ti lo dingin Jesuh Khrih nih a pum raithawinak in an hnawhpiak dih cang. Amen..
Ngaihthiam dih cikcek na si cu nangmah tuahmi, sual phuanmi le mertak mi ruangah si loin Jesuh Khrih na zumhnak ruang tu ah ngaihthiam hmasa na rak si. Ngaihthiamnak tling na hmuh hnu i sualnak chung i na pil tthan sual asi ahcun Bawipa sinah ngaihthiamanak cu fakpi in na hal tthan cu a hau ve lai ta. Sualnak kan tuahmi ruangah ngaihthiamnak zongah hin Khamh hlan ngaihthiamnak le khamh hnu ngaihthiamnak tiin an um. Sual phuan le sual ngaihchih fial lengmang kan si cu sual ngaihthiamnak kan hmuhnak ding ca hnak in ngaihthiam cang kan sinak langhtertu tehte kan khannak caah a rak si deuh. Khamh cangmi, ngaihthiamnak tling hmuh cang mi na si ahcun sualphuan, sualngaihchih le sual mertak in ngaihthiam halnak nih a zulh lengmang ve. Khamh rih lomi nih khamhnak a hmuh tikah a rak tuah ciami vialte cu ngaihthiam dih cikcek asi ko bu ah Bawipa nih zeitluk thuk in dah a dawt ai hngalh ve nak dingah sual phuannak in sual mertaknak, sual ngaihchihnak in sual ngaihthiam halnak tiang Thiang Thlarau nih a bawmh ve tthiamtthiam. Biatak cu sualnak mertak khawhnak kan ngeih zong hi ngaihthiamnak tling kan hmuh cang ca tu ah arak si ko.
Zumtu vialte nih hin sualnak vialte ngaihthiam dih cang ka si i ka leiba vialte Jesuh Khrih nih vailam cungah khenhpiak ka si cang tihi kan zumh dih cio i ahman taktakmi Thawngtha Bawipa Jesuh nih a kan dawtnak taktak cu asi hrimhrim ko. Mah belte cu leiba hi zeizat remruam dah champiak ka si timi a hngalmi bel tlawmte lawng kan si. Zeizat remruam dah leiba champiak na si na hngalh hlang chung paoh cu na Leiba an Champiaktu Pa cungah lawmh taktak le zumhawktlak nun sinak cu na phan kho bal lai lo. Ka ttialmi hi van ka ruahpi law zeizat remruam hi dah sualnak na tuahmi leiba na ngeihmi hi asi? Tahchunhnak ah Nang nih Phaisa leiba (ting100) na ngei hnga i ka hawinu nih phaisa leiba (ting 10) a neih ve hnga, nan cham kho veve lo tikah keimah nih kan champiak hna hnga. Nan pahnih in ahodah ka cungah ai lawm deuh hnga tiah cun nangmah hi a let tampi in aa lawmmi, zeitik hmanh ah a ka philh ti lo dingmi cu na si hnga.
Cu ve bantukin pumpak cio i kan tuahmi kan sualnak leiba hi pakhat hnu pakhat in van rel law Pathian hmaiah sualphuan dingmi, sual mertak dingmi le sual ngaihchih in ngaihthiam hal dingmi tampi na ngeih lai i zeizat remruam dah leiba champiak na si kha na hngalh khawh lai. Bawipa nih na sualnak leiba an champiak lomi pakhat hmanh a um lo i zeizat taktak hi dah champiak ka si ti na hngalh tik lawnglawng ah Bawipa Jesuh Khrih caah zumhtlak sinak nun cu na phanh te lai. A tu i hica a ttial lengmangmi na unau pa keimah zong hi thihtlak asimi sualnak tampi ka tuah, Baibal ka rel fate kai hmuh lengmang mi cu a thi ding bak pei ka rak si hi timi hi asi, Nain atu ka nun ve rih mi cu Bawipa Jesuh nih ka sualnak vialte a rak ka ngaihthiam dih cikcek cang caah kan nun ve rihmi hi asi tihi tehte kan khan. Ka sualnak vialte hi tluk a tammi leiba vialte a ka champiaktu Bawipa Jesuh cungah zumhawktlak nun cu ka nunnak dihlak in kaa thim zungzal cang. Nangteh nangmah le nangmah van i ruat law sualnak leiba tampi champiak na si ve kha fakpi naa hngalh ve ko ahcun na nun chung vialte Bawipa Jesuh caah zumh awktlak tein na nung zungzal ve cang ko lai. Amen. Zeitluk remruam hi dah na sualnak leiba champiak na si? Tlawm te maw champiak na si? Tampi dah champiak na si? Biatak cu tampi champiak na si kha na hngalh taktak tik lawngah an champiaktu Pa cungah na lawmhnak a ngan te lai. Bawipa tthatnak hi rel tuah hmanh, zeizat remruam hi dah sualnak na tuah i ngaihthiam cang na si?
Biatak cu na sualnak vialte ngaihthiam na simi hi man tlawmte i na ruah chung poah cu an champiaktu Pa cungah lawmh chim na thiam naisai bal lai lo. Sinain Leiba tampi champiak na si naa hngalh ko ahcun an champiaktu Pa cungah lawmhzia chim cu na thiam tuk lai i a caah zumh awktlak tein na nun zungzal cang lai. Nihin na sining van i zoh law Bawipa caah zumh awktlak tein na nun khawh rih lomi hi Sualnak tampi champiak na si naa hngalh lo caah si kho men. Athi dingmi bak dawh nunnak pek in ngaihthiam ka si cu... Ka Pa, Pathian le Bawipa Jesuh cungah kaa lawm zungzal i mah vialte hngalh khawhnak a ka petu le bawmtu Thiang Thlarau cungah zongah ka nun chung vialte, asin ka phanh tiang ka a lawm zungzal ko lai. Amen.. Bawipa nih ka sualnak vialte a kalpi dih cang, a kan ngaihthiam dih cang ti lawng si ti loin zeizat remruam ko hi dah ngaihthiam le sualnak leiba hi champiak ka si ti hi hngalh rak izuam... Na tuah ciami sualnak hi naa hngalh tthan tik lawnglawng ah Bawipa nih zeizat remruam dah leiba an champiak hi na hngalh khawh lai. Bawipa nih zeitluk in an dawt na hngalh khawhnak ding ahcun zeitluk a sualmi dah na si naa hngalhnak lawnglawng hin asi lai. Minung tampi cu kan tuanbia philh hi kan i fawih tuk, Bawipa nih kan tuanbia a kan hnawtpiak nain kan tuanbia kan philh zungzal ahcun zeitluk ngaihthiammi dah kan si hi kan i philh lengmang ve. Mi nun hmumi si loin mah nun hmumi si cio usihlaw sualnak leiba zeizat remruam dah champiak ka si timi naa hngalhnak ah Bawipa nih thluachuah kan pek piak zungzal ko seh. Bawipa kan Pathian nih Fapa Jesuh thawngin sunparnak co zungzal ko sehlaw a dawtmi a fale kanmah cio thawng zong in mi vialte nih kan Pathian cu thangtthat chin ko hna seh... Amen. Amen. Amen..
~~~~~
2 KORIN 5:18
Hi thil vialte a tuahtu cu Pathian a si i Pathian nih cun Khrih thawngin kannih a ral a simi cu a hawi ah a kan thlen i midang zong a hawi i ser ve awk rian cu a kan pek.
2 KORIN 5:19
Cucaah kannih kan biapi cu, Pathian nih mi vialte kha Khrih thawngin hawi ah a ser hna, ti hi a si. Pathian nih an sualnak kha anmah sual phawtnak ding caah cazin chungah a khumhpiak hna lo i kannih cu a hawi i a ser hnanak bia chim kha a kan fial.
KOLOSE 2:14
Kan leiba ṭialnak ca cu a chung i a ummi upadi vialte hna he khan a hrawh dih cang i vailamtahnak cung i a khenhchihnak thawng khan kanmah dawntu si ti lo dingin a hlonh.
1 PETER 2:24
Khrih nih a pum hrimhrim in kan sualnak cu vailam tahnak ah khan a kalpi i cucaah kannih cu sualnak ah khan kan thi cang i dinnak ah kan nung cang. A hma in nan dam cang.