Miphun dang holh hi kan uar tuk awk asi maw?

Laimi phun vialte nih hin kan miphun hi kan dawt cio in kan holh zong hi kan duh cem cio ko lai dah. Mah miphun le holh duhding le dawt ding zong hi Bawipa nih a kan duhpiak ciomi asi lai zong ka zumh. Miphun dang huat ding ti duhnak si loin mah holh le miphun lawng hmanh ttan si loin kanmah le kanmah minung hrimhrim hi ai daw ding le aitthi, aila ding hrim kan si. Cucu Pathian nih a kan duhpiakmi asi lai zong ka zumh ko. Nain nihin Kan fale le mino cheukhat hna nih miphun dang holh an duhtukmi le an uar tukmi nih hin khua tampi a ka ruatter tawn. Kan umnak hmun cio an holh hi a thiam khomi le a cawng khomi nih cun tlenglak in kan cawn ve awk le kan thiam ve hrimhrim awk asi. Amah belte mah miphun le nunzia atthami kaltak riangmang i miphun dang holh le nunzia lawnglawng duh le cawn hin cun minung ah kan i chuah ve hrimhrim lai lo. Biatak cu miphun dang nunzia le holh duhtuknak nih hin vaivuanhnak tu a kan phanhpi te lai. Mahti ka chim tikah hin nan umnak khua cio le nan fale hna an i chawnh tik i an hmanmi holh le nan mino hna bia an i ruah tikah an hmanmi holh hi zei holh dah asi tiah ttha tein va ngai ve te law a thiam he thiam lo he kan hman lengmang mi cu kanmah holh an si ti bak lo hih. Cucu tlauhram kan i thoknak an si kho ko dah kaw...

Miphun dang kan rem hna lo le an holh kan huat si loin kanmah holh te le nunzia tthami hi cu kan fale nih an thiam awk le nunpi hrimhrim awk an si. Asi khawh ahcun mah le miphun te tthit ding le vaat ding zong hi kan i cawnpiak ahcun a ttha tuk hnga ta. A caan tampi ah ka lung a fak ngaingai. Ka fale hi mah ruangah voi tampi ka sik tawn hna... Kan miphun nu le pa nih fakpi in ruatti hna usih law kan mino khua ruat kho deuh nih cun kanmah holh te hi hmang in i chawn cang hna usihlaw a ttha tuk hnga dah. A hleiin tu lio kan i bochanmi mino tampi ka tonmi hna bia an i ruah ah hin kanmah holh hnak in ramdang holh in bia an i ruah hi tam deuh ka hmuh hna. Cu nih cun zei ruangah dah miphun dang holh hi mah tlukin a chim kan huam hnga ti hi ka ruat tawn. Kawl ram kan um ah Kawl holh hi kan rak uar tuk, Mizoram a kal kho pawl an rak tlung tikah Mizo holh kan rak i uang tuk ve, Malaysia kan um lio ah Malaysia holh thiammi nih Malaysia hooh lawng tein bia kan chim, USA le adang dang kan phan hna i Mirang holh cu theih cawk lo asi cang. Biatak cu hihi kan si awk cu asi lo nain.....

Miphun dang holh ka huatnak ruang ah si loin kanmah holh hi Pathian nih pekmi a si hi kan philh awk asi lo, kanmah miphun caah cun kan miphun holh a tthabik, laimi na si ko ahcun laimi caah Bawipa nih an hman ko lai. Kan umnak ram holh hi kan thiam ve awk an si i an ca zong kan thiam ve awk an si ko nain kan miphun holh le ca hi kan thlau awk asi hnga maw? Na fimnak le thiamnak hna zong hi laimi caah a tthabik an si te ko lai. Minung phun dang nih cun Laimi nih kan in hman tluk cun an in hmang hna bal lai lo. Laimi caah cun lai holh hi a tthabik ko tihi nawlchih ka duh ko ee.. Laimi caah cun ram dangmi hi Bawipa nih a hmang tuk lai lo, kanmah laimi te hi a kan hmang ko lai. Mah chung ah hin thawngtha chimtu ca lawngah si loin fimnak le thiamnak, rumnak kan ngeihmi vialte zong hi ka chim duhmi asi. Kanmah laimi caah hin ramdang holh cu kan hman tuk awk asi hnga maw? Upa lungfim le mino upa deuh nih cun kan ruah caan asi cang... Atu ning te kan kal ko ahcun kan fale hmailei zoh ah lung a mit ko hih. Fimthiamnak sang ngeihmi nih hin mi a cawisang ngaimi a lo nain a dong lei zoh tikah Pathian ai tello ahcun ttih anung ko. Kan fale hi ram tthatnak an um caah fimthiamnak in sangpi a phanmi le reng sang tampi nan um te ko lai nain Pathian he asi lo ahcun cucu na caah tlaihchan tuk awk an si lo kha na van hngalh te ko lai. Minung vialte hi kan hramthoknak lawng si loin zeitindah kan dongh te lai tihi abiapi deuh. Ahramthok atthat ahcun a dongh lei zong attha ti phung aum nain Pathian ai tellonak paoh ahcun ahram thok attha tuk nain donghnak lei atha ballo. Cucu kan miphun nih kan duh awk asi lo i zeithil kan tuah hlante ah Bawipa ruahnak hal hna usihlaw Bawipa nih kan hruai ko seh....

Nehemiah a lung a fahter tukmi cu a miphun hna nih ramdang nu an tthit le ramdang pa an vat hi asi. Cu hna nih fa an van hrim tikah Judah holh thiam tilo in miphun dang holh lawng an thiam tikah a celh in a rak celh lo. Kannih miphun cu ramdang a vami le a lami kan tlawm rih nain nu le pa hi laimi bak kan si nain kan fale cu ramdang holh lawng a thiam ding phun in kan um cang. Mah ti ka ttial tikah hin taksa ttanh in kan miphun le holh ka ttanh hi asi loh. Pathian nih miphun pakhat ah a kan ser tikah hin sullam ngeite in tinhmi ngeiin ser kan si zungzal caah asi. Laimi na si ko ahcun Laimi caah Bawipa nih an hman ko lai tihi ka nawl rih ko lai. Cucaah cun a tu tein kan fale hna le kan mino hna nih kan miphun holh te hi kan hman ve awk asi timi kan i sehchih lo ahcun tu hnu kum 10 ahcun Lai holh service le Ramdang holh Service ti bantukin pumhnak kan ngeih a hau te lai. Cu nih cun dawtnak le remnak si loin tthennak tampi tu a chuahpi te lai ti hi rak i cinken ve te law.. Kan miphun caah cun Lai holh, Lai nun te hi a ttha cem ko tihi rak philh hrimhrim hlah muh... Miphun dang le kan holh a thiamlomi sinah cun anmah holh tein kan chawnh hna awk hrim asi bantukin kanmah le kanmah kan i chawnh ahcun kanmah holh le nunzia tu he asi ve awk asi hnga lo maw?

Solomon a tlautertu hi ramdang mi nupi hna an si. Johashaphet le tefa hna a vaivuanhtertu cu Judahmi tthi loin Ahab innchungkhar Pathian bia loin baal a biami an tthit hna caah asi. Jehoshaphet Fapa Jehoram cu siangpahrang i afeh tikah Amahnak in attha deuhmi a unau hna pa 6 athattertu cu Ahab fanu, Jehoram Nupi hi asi. Nupi le va kan kawl tik zong ah hin Pathian a bia bakmi kan kawl awk le kan vat hna in kan tthit hna awk asi. Nupi le Va hi Pathian sin hal buin le Pathian pekmi te kan tthit awk le kan kawl awk asi. Solomon rumnak le fimnak cu khuaruahhar ngaingai asi ti cu kan theih cio ko. Nikhat i rawl an chumhmi hi changvut rel 90, caw 30, tu 100, mah hlei ah saram an i tel rih hna. Mah tlukin Pathian nih fimnak le rumnak a pek hleiah Miphun dang nupi tthitlo ding le nupi pakhat lawng ngeih ding timi nawl ngeilo in nupi 700 le nupichun 300 a ngei hna caah a dongh lei i Solomon tlaunak hrampi ah an cang. Solomon hi tlukin a fimmi le a rummi hmanh nih ramdang mi le ramdang pathian cu a tei kho hrim lo. Pathian bia hi a hram thok tein a bia kan ngaih lo ahcun a dongh lei zongah ngeih a fawi lai ka zum lo, Cucaah cun a tu tein Pathian nawl ngai hna usih law Pathian duhnak hi i thim ko hna usih.. Laimi caah cun laipa le lainu an tthabik ko lai, laimi caah cun lai lolh le lai nun phun an tthabik ko lai. Pathian kan cung cio i ai lawmh ahcun kan miphun cungah Pathian ai lawm ko lai. Kan miphun a aiawhtu hi nangmah le keimah kan si hi rak philh hlah. Pathian dawtnak tling a comi le laimi na si ko ahcun zei ruangah dah laimi chung hin ka chuah ve hnga ti hi rak ka ruahpi ve muh. Bawipa nih thluachuah in pechin ko seh...
—-
NEHEMIAH 13:23
Khi caan ah khan Judah mi Ashdod khuami nu hna le Ammon mi nu hna le Moab mi nu hna a ṭhimi ka hmuh fawn hna;

NEHEMIAH 13:24
an fale hnarcheu nih Ashdod holh khan an holh i Judah holh khan an holh kho lo, miphun dang hna holh lawng khan an holh kho.

NEHEMIAH 13:25
Cun ka sik hna i chiat ka serh hna i a cheu cu ka velh hna i an sam kha ka tiao hna; cun Pathian min chalh in chiat ka serter hna i, "An fapa hna cu nan fanu hna kha nan pe hna lai lo i an fanu hna zong nan fapa hna caah siseh, nanmah caah siseh, nan la hna lai lo.

NEHEMIAH 13:26
Cu bantuk nu hna ruangah cun a si lo maw Israel siangpahrang Solomon nih a sual kha? Miphun tampi hna lakah amah bantuk siangpahrang ahohmanh an um lo i amah cu Pathian nih a dawt i Israel mi vialte cungah cun siangpahrang ah a ser; sihmanhsehlaw amah hmanh cu ramdang minu hna nih an sualter ko.