Kan biakmi kan Pathian nih in umpi cio ko hna seh. Nunnak thawngtha ka rak in hrawmh than hna. Reltu nan dihlak cungah Bawipa sin in arami daihnak hmu cio ko uh!
1 JOHAN 3:21
Cucaah cun ka fale hna, kan lung nih sual a kan phawt lo ahcun, Pathian cu lungphanglo tein kan fuh ngam i
1 JOHAN 3:22
amah nawl kha kan ngaih ca le a duhmi kha kan tuah caah kan halmi paoh kha kan hmuh.
Khrih he kan i pehtlaihnak thawng in Thiang Thlarau pek kan si i cu Thiang Thlarau nih cun a zungzal in an umpi i theih kan herhmi hna le thilttha tuah khawhnak dingah a kan bawmh zungzal. Amen! Cu lawng hmanh si loin nitin tein zei thil kan tuah lai poah ah achia le atha thleidan khawhnak a kan pek i cu nih cun Pa duhning in kan nun khawhnak dingah lam a kan hmuhsak zungzal. Amen! Nihin ah zumtu aitimi nang le kei hi teh kan lung nih mawh cu a kan phurh in sual a kan phaw ve maw? tihi ruat tti hna usih. Tahchunhnak ah Thiltthalo kan zawn aphak tik poah ah le taksa nih aduhmi zawnzam kan phak caan poah ah chunglei in thlohtu le Pathian duhmi asi loh tiah catu kan ngei cio, cu a kan cak ko nain kan tuah chih tikah kan chung ummi Thiang Thlarau kha a ngeih a chia tawn. Cu Thlarau cu kan chungah hin Pa duh ning in kan thangtthat khawhnak dingah rian atuan zungzal ve ti hi kan theih awk asi. Cucaah kan chung i Khrih Thlarau duhning in nun izuam cang hna usihlaw kan taksa duhnak le biathalo vialte chim zong hi hrial cikcek cang hna usih tiah kan sawm hna. Nangmah le nangmah hi bia i hal law tuni ka biachim le ka cawlcangh, ka nunzia hi Pathian duhning in maw kan nun, Pathian duhlo ning in dah kan nun ti hi van i ruat tthan hmanh, phuhrungnak na ngei ve maw? na ngeih asiah cun na lung nih mawh an phurh lo ding in nun izuam cang.
Nangmah le nangmah hmanh phuhrunnak na ngeih ko rih ahcun Pathian ca chinchin ahcun chimhau lo khi asi. Chimduhmi cu minung hi Pathian hmaiah kan tling kho dih lai tinak cu asi lo nain Khrih nih a kan tlanh le cangka hin Pathian mithmuh ah mitling taktak kan si. Amen! Cu mitling taktak kan si cangnak cu duhsah duhsah in kan chambauter chin lai maw? chambauter hlah ee, Nutling, Patling kan si tiang le Rocotu puitling kan si tiang in hmai ah kan kal chinchin lai ta. Amen! Cucaah cun kan nih cu Pathian thlaici kan chungah aum caah hin phuhrungnak le palhnak hi kan chungah aum ti awk bak asi hrimhrim lo. Aruang cu Pathian le khuachia cu hmunkhat ah an um kho lo ti cu kan hgalh cio mi asi ko. Siah cun kan nih cu Pathian fale kan si caah kan chungah phuhrungnak le kan lung nih sual phawtnak aum lo caah Pathian cu lungphang lo tein kan fuh ngam i Amah nawl kanngaih ca le aduhmi kha kan tuah caah kan halmi poah cu pek kan si. Amen! Pathian duhnak cu zeidah asi tiah cun kan lungthin hi thiang tein chiah hi asi ko. Kan lungthin athiang ahcun thiltthalo le sualnak chungah cun kan tla kho hrimhrim lai lo ti cu afiang. Amen! Bawipa min thangthat si ko seh.
1 JOHAN 3:24
Pathian nawl a ngaimi paoh cu Pathian chungah an um i an chungah Pathian kha a um. Cun Pathian kan chungah a um ti kan hngalhnak cu hihi a si: Thlarau a kan pekmi thawngin kannih nih kan hngalh.
Kan nih cu Pathian nawl angaimi kan si i Pathian kan chungah aum bang in kan nih zong Khrih kan zumhnak thawng in Pathian chungah kan um kho ve. Amen! Zei tindah Pathian cu kan chungah aum ti kan hngalhnak cu kan chungah Thlarau a kan pekmi thawngin kan hgalh. Amen! Cu Thlarau nih cun kan lungthin ah lawmhnak le daihnak he rian atuan i lamding kan zulh khawhnak dingah le theittha kan tlai khawhnak dingah a kan bawmh zungzal. Amen! Cun thilttha lo tuah kan i timh hmanh ah kan lungthin in catu ah ahun cang i kanmah le kanmah sumkhawhnak le tuahduh lonak tiang a kan pek. Amen! Ahleiin Harsatnak le lungre theihnak, damlonak, buaibainak kan ton caan zongah kan lung donghnak hngalo chunglei in rian atuan i inkhawhnak le teikhawhnak a kan pek zungzal. Amen! Kan nih cu Pathian fale kan si cang caah kan lung nih sual phawt loin Pathian hmai tuah phuhrungnak ngei loin a kan chuahpi. Amen! Bawipa lawnglawng hi kan teinak le kan nunnak asi ko. Amen! Bawipa nih thluachuahnak kan pek piak ko seh!