Bawipa Jesuh Khrih zumhnak thawngin Pathian fa taktak ah a cangmi unau na sinah biahal ding pakhat te kan ngeihmi aum. Mah bia hi a tang i Baibal ka rel fate keimah le keimah ka hal lengmang mi asi: Nai te taktak lawngah Thiang Thlarau bawmhnak thawngin ka nunnak ah fiannak ngaingai ka ngeihmi aum. Kan halmi hi nangmah le nangmah na leh hnu ah keimah nih kaa fianmi le kaa nunpi mi hi rak rel ve law na thinlung ah hmunhma alak ahcun rak i nunpi ve tiah kan sawm. Biatak cu nifa tein na vailam put in Bawipa Jesuh Khrih zulh ve ding hi zumtu na si bak in ai awt cangmi na rak si awk asi. Hal kan duhmi cu hihi asi: Jesuh Khrih nih zulh na ka duh ahcun na vailam kha put in na ka zulh lai ati mi hi asi. NA VAILAM PUT FIAL NA SIMI CU ZEIDAH ASI TIMI HI HAL KAN DUHMI CU ASI? NA VAILAM CU ZEIDAH ASI? WHAT IS YOUR CROSS?
Jesuh Khrih a zummi hna hi zumtu taktak cu kan si. Zumtu lawnglawng si loin zultu si ve ding hi Bawipa Jesuh Khrih nih a duhmi le a kan cawnpiakmi asi. Jesuh Khrih nih thihnak in a thawh hnu ah lamkaltu hna sinah a chimmi cu vancung le vawlei cung i a ummi nawl ngeihnak vialte cu pek ka si cang.Cucaah khuazakip ah va kal u law miphun vialte kha ka zultu ah va ser hna u tihi asi. Miphun vialte hi ka zumtu ah va ser hna uh ti lawng si loin ka zumtu sinak in ka zultu sinak tiang tihi asi. Zultu tiah a chim duhmi hi Saya nan si lai, cawnpiaktu nan si lai, Thawngtha chimtu nan si lai, mi cungah nan um lai timi khi chim duhmi si loin Bawipa Jesuh nih arak nunning te kha cawn in Amah hnu zulhtu, Amah tuah bantukin vawlei cung minung vialte cungah atuahmi si khi ka zultu ah van ser hna uh atimi cu asi. Nang le kei teh zeitindah Jesuh Khrih zultu si kan i timh ve ning hi asi? Jesuh Khrih nih a kan cahtakmi cu Aho hmanh nih zulh nan ka duh ahcun mah tihin nan van ka zulh lai tiah bia a kan cahtak:
- Zulh na ka duh ahcun Nangmah le nangmah naa philh lai.
- Zulh na ka duh ahcun Mah zawn aa ruat lomi na si lai.
- Zulh na ka duh ahcun Mah zawnruahnak kha na ngol lai.
- Zulh na ka duh ahcun nanu le napa hna hnak in Keimah na ka dawt deuh lai.
- Zulh na ka duh ahcun na nupi le nava hnak in Keimah na ka dawt deuh lai.
- Zulh na ka duh ahcun na fapa le na fanu hna hngak in Keimah na ka dawt deuh lai.
- Zulh na ka duh ahcun na unau hna hnak in Keimah na ka dawt deuh lai.
- Zulh na ka duh ahcun nifa tein na vailam put in Keimah kha nan ka zulh lai tiah Bawipa Jesuh nih ati. Zeicem hi dah Jesuh Khrih nih nifa tein mah vailam put in zulh a kan fialmi hi asi hnga?
Jesuh Khrih nih Lamkaltu i ai thimmi si hna seh anmah nih an chimmi Thawngtha a zum laimi kan dihlak caah le a kalnak kipah azultu mi hna sinah a chim lengmang mi cu zulh nan ka duh taktak ahcun zeizong vialte kaltak in le nanmah le nanmah aa philhmi nan si lawnglawng ah ka zultu taktak cu na si kho lai tihi asi lengmang. Nangmah le Keimah zong Jesuh Khrih zultu taktak kan si nak ding ahcun kan i thimbikmi le kan duhbikmi hi Bawipa Jesuh Khrih dawt hi asi peng awk asi. Acung i kan hal bantukin na vailam put fial na simi hi zeicemdah asi na hngal ve maw? Kan kaa in cun mah vailam put in Bawipa Jesuh kan zulh a hau tihi kan chim cio nain zeidah put fial ka simi ka vailam cu asi ne timi hngalh bel hi minung tampi caah cun ahar men lai dah. Nangmah le nangmah van i ruat law zeidah na vailam cu asi? Zeidah nifa tein mah vailam put fial na simi cu asi? Na vailam put fial na simi hi nangmah lawnglawng nih fiang tein na hngalh khawhmi asi.
Jesuh Khrih zong nih put dingmi vailam a ngeih taktak ve i a put taktak mi cu thing in tuahmi vailam hnak in Pathian duhnak zulh le fial taktak mi rian lim hi asi deuh. Jesuh Khrih nih a put taktak mi vailam cu vawlei arat hlan i Pa Pathian le Thiang Thlarau he hnatlakttinak an rak ngeihttimi, minung vialte caah nunnak pekin vailam cungah thihnak ithim i Amah thihnak thawngin Amah a zummi vialte cu Pa Pathian sinah kirpi tthan hi asi. Amen. Jesuh Khrih hi vawlei mi vialte caah thi hlah sehlaw Pathian duhnak le tinhmi pakhat hmanh tlam atling kho hnga lo. Biatak cu zeihmanh ser arak si hlan in mah vialte hi timh cia dih asi i Jesuh Khrih thawngin sermi le Khamhmi kan si dih nakhnga caah asi. Amen. Chim ka duh taktak mi cu Jesuh Khrih vawlei i arat hlan te hin vailam put ding a ngeihmi hi theih cia te asi. Cubang cun nangmah le keimah ca zong ah Jesuh Khrih nih a kan cahtak bantukin mah vailam te put ding hi rian khinh kan si cio. Kei zong Thiang Thlarau bawmhnak thawngin nifa tein ka vailam put ding fialmi ka simi cu hihi asi:
- Ka vailam put dingah timhcia te (ready) ka si. I am ready to carry my cross.
- Ka vailam cu Aka Thlahtu Pa (Jesuh Khrih) Duhnak zulh le fialmi rianlim hi asi.
- Ka vailam cu Ka Pathian duhnak tuah le fialmi rianlim hi asi.
- Ka vailam cu Thiang Thlarau duhnak zulh le fialmi rianlim hi asi.
- Ka vailam cu NITA TEIN NA KA FIALMI RIANLIM hi asi ka Bawipa.
- Na vailam cu Bawipa duhnak zulh le fialmi rianlim hi asi awk te asi.. Bawipa fialmi rian nai hngalh rih lo hmanh ah nifa tein Bawipa duhnak zulh hi nai thim ko ahcun Bawipa lawmhtertu na si ve ko lai. Kan Pathian nih minung a kawl lengmang mi cu Amah nawl angaimi hna hi kan si.
- Na vailam cu Bawipa nih an fialmi rian hi asi awk asi... Bawipa nih an fialmi rian naa hngalh cang maw? Hngalh khawhnak Thiang Thlarau nih in bawm ve ko seh..Nangmah le keimah ruangah Bawipa Jesuh Khrih le Pa Pathian nih Thiang Thlarau bawmhnak thawngin sunparnak co zungzal ko hna seh... Amen...
------
MATTHAI 10:37
"Ahohmanh a nu siseh, a pa siseh, keimah nakin a daw deuhmi cu ka mi si awk aa tlak lo; ahohmanh a fapa siseh, a fanu siseh, keimah nakin a daw deuhmi cu ka mi si awk aa tlak lo.
MATTHAI 10:38
Ahohmanh a vailam tahnak kha aa put i ka hnu in a ka zul lomi cu ka mi si awk aa tlak lo.
MATTHAI 16:24
Cun Jesuh nih a zultu cu a thawh hna i, "Ahohmanh nih zulh nan ka duh ahcun, nanmah le nanmah nan i philh i nan vailamtahnak nan i put i nan ka zulh a herh.
MARKA 8:34
Cun Jesuh nih mizapi le a zultu hna kha a auh hna i, "Zulh a ka duhmi paoh cu mah zawn aa ruat lomi nan si lai. Cun nan vailamtahnak kha nan i put lai i nan ka zulh lai.
LUKA 9:23
Cun annih cu an dihlak in a thawh hna i: "Ahohmanh nih zulh nan ka duh ahcun mah zawnruahnak kha nan ngol lai i ni fa tein nan vailam kha nan i put lai i nan ka zulh lai.
LUKA 14:26
"Ahohmanh ka sinah a rami cu a pa siseh, a nu siseh, a nupi siseh, a fale si hna seh, a unau si hna seh, a farle si hna seh, amah le amah siseh, aa huat lo ahcun a ka zultu a si kho lo.LUKA 14:27
A vailam tahnak kha aa put i a ka zul lomi cu a ka zultu a si kho lo.