Pathian na chungah rian a ttuan na thei ve maw?

Pathian Bia hi kan rel deuhdeuh i ka duh deuhdeuh, kan ruah deuhdeuh ah hin a tthawng chinchin i a thaw chin lengmang. Minung kan si caah tlamtlin lonak tampi a ngeimi le chambaunak tampi a ngei ciomi kan si. Cu chambaunak le tlamtlin lonak kan ngeihmi hna ruangah hin Pathian nih kan nun chung vialte nan ttuan lai tiah rian a kan pekmi hi kan lim kho sual lai lo ti cu kan phang cio lai dah. Ahleiin Pathian nih Amah rianttuan dingah a kawhmi hna kan caah hin asi khun. Atang i Baibal hi kan theih lengmangmi asi ko lai nain ka nunnak ah tthawnak he thazang tampi a ka pek caah thazang na rak lak venak hnga mah ca hi ka van ttial. Biatak cu kanmah nih kan izuam tuk ruang le kan tuah khawh lengmang ruangah Pathian duhnak le tinhmi kan tuah khawh si bak loin Pathian hrimhrim hi tuah duhnak le zulh duhnak in tuah khawhnak le zulh khawhnak tiang kan ngeih nakhnga kan chungah rian attuan zungzal tu arak asi.

Pathian kan Pa zangfahnak thawng lawnglawng in nihin ka sining hi ka si i keimah nih kaa zuam tuk ruangah le ka tuah khawh tuk ruangah si loin Pathian hrimhrim nih tuah duhnak in tuah khawhnak tiang, zulh duhnak in zulh khawhnak tiang hrimhrim hi a ka pek caah asi. Amen! Nihin ka sining hi ka si, kati tikah ahodah ka si timi khi chim duhmi si loin Bawipa zangfahnak thawngin a tu ka sining ah ka diriamhmi le kaa lunghmuihmi te khi ka chim duhmi asi ko. Zumtu taktak cu zeidah kan tuahkhawh timi ruangah si loin Pathian nih si ko uh a kan timi te cung i kan sining taktak cungah hin kan lung ai lawm ko i kan di a riam ko. Biatak cu a tu na sining te i na di a riamh khawh lo le na lawmh khawh lo ahcun Pathian nih an tinhpiakmi chungah na nun lo ca tu ah asi ko lai. Zumtu vialte cu kanmah sining te ah le Pathian nih si ko uh a kan timi cungah aa lungsibak dingin sertharmi kan si. Amen.. Minung le Pathian kan i pehnak in hawikomhnak kan ngeihnak ah a biapi taktak mi cu nichiar te Thlarau hruainak in Cathiang rel lengmang le Thlacamnak in Amah he hawikomhnak ngeihtti lengmang hi asi. Mah hna zulhnak le tuahnak tello in cun Pathian he hawikomhnak kan hmuh khawhnak ding cu a har ngaingai hnga. Hihi ka chim lengmangmi lakah a hmemi te a lo nain Thlarau nun tthannak ah abiapi cemmi an si, mah hna zulh dawinak in Pathian he hawikomhnak tling na ngeih hnu tu ah Pathian tinhmi taktak cu na hngalh khawh ve te lai..

• Pathian nih TINHPIAKMI a kan ngeih cio i kan nun chung tuah dingah Vision pek in rian fial cio kan si. Cu Pathian nih TINHMI cu ka zulh khawh nakhnga ka chungah rian a ttuan zungzalmi cu ka Pathian hrimhrim hi asi..
• Pathian TINHPIAKMI cu tuah duhnak le tuah khawhnak thinlung ka ngeih nakhnga ka chungah rian a ttuan zungzal tu cu ka Pathian hi asi..
• Chim ka duh taktak mi cu Pathian TINHMI cu zulh duhnak in zulh khawhnak le tuah duhnak in tuah khawhnak thinlung tiang ka ngeih khawh nakhnga, Pathian nih ka chungah rian a ttuan zungzal ko ahcun zeidah ka ttih lai? Keimah le keimah maw? Ahodah ka ttih hnga? Anungmi Pathian hrimhrim pei ka chungah tlam atling tiang rian a ttuantu cu asi lai cu. Amen. Anungmi Pathian, zeizong vialte asertu Pathian, Keimah le Nangmah a kan sertu Pathian hrimhrim pei kan chungah a um cu. Halleluijah. Amen! Kanmah tuahmi le ttuanmi ruangah si loin le a duhnak zulh kan thiam ruang zongah si loin Pathian hrimhrim nih tuah duhnak in tuah khawhnak, zulh duhnak in zulh khawhnak tiang kan thinlung chungah rian a ttuan zungzal arak si. Amen! Biatak cu kanmah lawng nih si hrimhrim loin Pathian hrimhrim he a caan a phak tikah Pathian nih a kan TINHPIAKMI rian cu kan zulh khawh lai i kan tuah khawh lai. Pathian nih a kan TINHPIAKMI cu tuah duhnak thinlung le zulh duhnak thinlung lawng kan ngeihnak ding caah si ti loin kan chung hrimhrim ah aummi Pathian he kan zulhtti lai le kan tuahtti lai caah kan nun chung vialte i Bawipa nih a kan pekmi le fialmi rian cu kan lim khawh hrimhrim lai. Pathian TINHMI le FIALMI rian cu kanmah ruangah si ti loin kan chungah aummi Pathian, kan chungah rian a ttuan zungzalmi Pathian ruang tu ah kan lim lai. Amen!

Zeizong vialte kan tuah khawhnak dingah le kan zulh khawhnak ding ahcun Pathian hrimhrim kan chungah rian a ttuan zungzal ko ka ti tikah kanmah nih zeihmanh kan tuah a hau ti loh timi khi ka chim duhmi si loin tuah duhnak le zulh duhnak hi kan thinlung chungah Pathian nih rian a ttuan hrimhrim caah zumtu vialte nih kan tuahmi le kan zulhmi hna hi an si timi hi ka chim duhmi asi deuh. Chimduhmi cu nangmah le keimah nih zeidah kan zulh awk le tuah awk asi timi kan hngalh tuk ruangah le kan tuah tuk ruangah Pathian lung kan lawmhter si loin Thiang Thlarau hrimhrim nih zeidah tuah awk le zulh awk asi timi lam a kan hmuhsak ko timi khi ka chim duhmi asi i hmuhsak ka ti tikah khin mit in hmuhkhawhmi khi ka chim duhmi si loin chunglei ttamhalnak in hngalhmi khi ka chim duhmi asi deuh. Thiang Thlarau nih chunglei ttamhalnak a kan chiahpiakmi kan zulhmi le kan tuahmi tu hin Pathian kan lawmhter a rak deuh. Cucu Nawlngeih Nun kan timi cu asi.  Biatak cu na chungah Thiang Thlarau aum ko ahcun nichiar te hi chawnlo le fialmi pakhat hmanh ngei lo cun an um hrimhrim lai lo. Minung vialte nih pawpi kan ngeih dih cio i kanmah nih rawl ei caan a za cang timi rikhiah kan thiam tuk ruangah si loin kan chungah a ummi pawpi chungah rawl a um ti lo tikah ttamhalnak he rawl ka pe cang uh tiah a kan hal ko, biatak cu pawpi nih holh a thiam lo cu kan theih dih cio ko nain pawpi nih zeidah a duh le zeidah a kan hal le zeidah kan pek awk asi ti cu kan hngalh dih cio ko. Cubangcun na chungah Thiang Thlarau a um ko ahcun na chunglei herh ning in nichiar tein zeidah an halmi asi i na zulh piak awk le na tuahpiak awk asi ti cu an chimh ko lai, an chimh ko lai ka ti tikah Aw in an chimh lo hmanh ah na pawtam i rawl na ei piak bantukin Thiang Thlarau hruainak in zeidah na zulhpiak awk le na tuahpiak awk asi zong cu na hngalh ve hrimhrim ko lai.

Nangmah le Nangmah rak i zoh tthan law na chungah fialtu pakhat tal na ngei ve maw? Thiang Thlarau na chungah a um taktak maw? Pathian kan Pa hrimhrim teh na chungah nichiar tein rian a ttuan peng maw? Bawipa Jesuh Khrih he teh naa tong bal in bia naa ruah bal maw? Hawikomhnak teh nan ngei bal maw? Pathian na chungah rian a tuah teh na hngal maw? Mah kan halmi hna hi na ngeih ballo le na ton ballo si ahcun na hrintthan rih lo caah asi. Thiang Thlarau na chungah hmunhma a lak rih lo caah asi. Thiang Thlarau na chungah a um lo ahcun zeitik hmanh ah Pathian cu na chungah a um kho in rian a ttuan kho bal lai lo. Nangmah le Nangmah ahodah na si hi fakpi in hngalh rak izuam? Nangmah le Nangmah ahodah na si? na chungah a hodah a um? timi na hngalhlo ahcun Pathian tinhmi cu na phan kho bal lai lo. Pathian na chungah a um timi na hngalhnak le na chung a um ve nak dingah bawntu ttha si hram ko seh. Amen! Bawipa kan Pathian nih Fapa Jesuh Khrih thawngin afa ah a cohlanmi kanmah cio thawngin thangthatnak hmu zungzal ko seh...
——
FILIPI 2:13
Pathian tinhmi kha nan zulh khawh nakhnga le cu tuah duhnak lungthin nan ngeih nakhnga, Pathian cu nan chungah rian a ṭuan zungzal ko.