Zumtu paoh nih cun a kan sertu hi Pathian asi tiah kan zumh dih cio. Minung lawng hmanh si loin hmuh khawhmi si hna seh hmuh khawhlomi si hna seh Pathian sermi an si dih ko tihi kan zumh ciomi asi i ataktak in a kan sertu hna hi Pathian kan Pa,Fapa Jesuh Khrih le Bawmtu Thiang Thlarau hna an si. Atu i ka ttialmi hna hi catlak cung ttialmi in le Thawngtha chimtu nih chimnak tiang lawngin na kawl ahcun tampi naa harh ko hna lai. Biatak cu Pathian, Jesuh Khrih le Thiang Thlarau he nai ton ve hnu lawngah a tu i ka ttialmi hi atak in na zumh khawh ve hna lai. Chimchih ka duhmi cu zumhnak kan ti lengmang mi hi kan zumhmi he ton ding le biaruahttinak ngeih ding in le hawikomhnak tiang ngeihtti dingin kan zumh arak si deuh. Nihin zumtu tampi cu kan zumh kan ti ko nain kan zumhmi pa he ai tongmi bel minung tlawmte lawng kan si. Na zumhmi Pathian Fapa, Jesuh Khrih he nai ton ve rih lo ahcun a tu ka ttialmi hi minung tampi caah cun a har ngaingai ko lai. Zei bantukin na hmuh ko le na zumh ko hmanh ah zumhnak in Jesuh Khrih he naa ton i Thiang Thlarau he hawikomhnak na ngeih ve tik ahcun fiang rein na hngalh ve te ko lai.
Phaisa tampi ngeih na duh ahcun phaisa tampi ngeihnak kong na theih lengmang tiang lawng le na theihmi na fiannak tiang lawngin rumnak na phanh si loin na theihmi le na fianmi kha atak in naa nunpi i na tuah tikah duhsah in rumnak cu na phan te hnga. Nihin zumtu ai timi tampi cu Thawngtha hi tampi kan ngai ko nain kan theihmi Pathian bia hi kan theihnak tiang lawngah kan tang, Theihnak tiang hnak in a hung sang deuhmi cu fiannak tiang a phanmi hna hi an si. Sihmanhsehlaw theihnak in fiannak tiang zong nih hin Nunnak tiang a phanhpi hrimhrim lo. Nunnak tiang taktak aphanmi cu na theihmi kha fian ve i fian ve mi kha a tak in zumhnak in nunnpinak hin arak si deuh. Nunpinak in na tuah ruangah na zumh le Pathian nih an cohlan si loin na zumh ruang tu ah nunpinak takak na ngeih le Pathian nih na zumhnak in na nunpimi kha an cohlan piak arak si deuh. Mi nih chimnak tiang lawngin kan Pathian hi na zumh i na zumhnak in Amah he tonnak le hawikomhnak na ngeih ballo ahcun nunnak taktak aphanmi chungah naa tel bal lai lo. Nunnak taktak aphanmi zumhnak cu mi nih chimmi cungah dirti loin mah nih tonmi cungah kan dir ve cang. Atak in Fapa Jesuh Khrih zumhnak in Thiang Thlarau toih na si tikah hmuhsak chin lengmang na si dingmi cu Pathian kan Pa, Fapa Jesuh Khrih le Thiang Thlarau kong hna hi an si. Mi nih chimmi theihnak tiang lawngin si ti loin zumhnak in Pathian kan Pa he tonnak tiang phan ve dingin ahmai rak kawl ve ko law Fapa Jesuh he tonnak tling na ngeih tiang zumhnak in Amah he ton ding in rak kawl ko. Biatak cu Jesuh Khrih kan zumhnak hin pei Thiang Thlarau toih dingin biakamh kan si kha...Mah Thawngtha ka ttialmi zong hi theihnak tiang le fiannak tiang lawngin si loin Pathian kan Pa, Khamhtu Fapa Jesuh Khrih, Bawmtu Thiang Thlarau he tonnak tling ka ngeih hnu ah Cathiang le atak in ka tonnmi hna chirhchan in ka ttialmi asi. Biatak in sawm kan duhmi hna cu an ti tinak in Pathian kong le Khamhnak hi chim loin kan zumhnak in a tak in kan hmuhmi le ngeihmi ruang tu ah Pathian kong le Khamhnak hi chim cio ko hna usih.
Mah Thawngtha areltu hna hal kan duhmi cu hihi asi: Pathian a ngeimi maw na si? Pathian kong a thei ve rih mi dah na si? Pathian hi Jesuh Khrih kan zumhnak thawngin tling tein kan hngalh khawhnak ah bawmtu taktak cu Thiang Thlarau hi asi. Jesuh Khrih na zumhnak in Thiang Thlarau na ngeih ve rih lo ahcun Pathian hngalhnak tling le Jesuh Khrih hngalhnak tling cu na phan bal lai lo i an kong theitu men na si zungzal ko lai. An kong theihnak tiang nih cun nunnak a phan lo i Anmah na chung i an um ca tu ah zungzal nunnak na ngeih arak si. Chim ka duhbikmi cu Pathian na chungah aum na hngal cang maw? Jesuh Khrih na chungah aum na hngal cang maw? Thiang Thlarau teh na chungah a um na hngal ve taktak cang maw? Jesuh Khrih na zumhnak in atu i ka chim lengmang mi hna Pathian kan Pa, Fapa Jesuh Khrih le Thiang Thlarau hna hi na ngeih bak hna ding khi an si. Na ngeih rih hna lo ahcun theihnak tiangah na tang rih ca tu ah asi. Pathian he nai ton tikah, Fapa Jesuh Khrih he nai ton tikah le Thiang Thlarau he a tak in nan i ton ve tik lawnglawng ah atu i ka ttialmi vialte hna hi na caah sullam an ngei ve te lai.
- Pathian nih minung KAN ser cang hna lai ati tikah hin Sertu cu Pa, Fapa Jesuh Khrih le Bawmtu Thiang Thlarau an si tinak a si. Bawmtu Thiang Thlarau ka ti tikah hin bawmtu menmen ah maw ruat lai ci, Pathian tling sinak a ngei vemi hrimhrim asi ti zong hi nawlhchih ka duh.
- Pathian nih Minung cu KANMAH MUI an KENG lai ati mi hi na ruat bal maw? Zei cem hi dah ANMAH MUI kan KENG nak cu asi hnga?
- Pathian nih Minung cu KANMAH he kan i LO lai ati mi hita na ruat bal maw? Zei cem hi dah ANMAH he kan i LO nak cu asi hnga?
- Pathian nih Saram vialte cu minung nih an UK dih hna lai a ti..
- Pathian nih mipa cu TLAK in a ser I Minu bel cu mipa HNAKRUH in aser.
—-
- Vawlei serhlan in BIA (Jesuh cu a rak um diam cang) le PATHIAN (Pathian) cu an rak um tti.
- Pathian he a rak um ttimi BIA cu Minung (JESUH) ah a cang i kan lakah khua arung sa.
- Jesuh cu VEL lawng si loin BIATAK he a khat. Minung nih Jesuh Khrih cu a ka khamhtu le ka Bawipa a si tiah kan zumh tikah VEL lawng kan co si loin BIATAK zong ka co chih. Amen.
- Jesuh Khrih zumhnak in Thiang Thlarau toih kan si...
——
- Pathian nih mipa a ser tikah a hnar chungah NUNNAK PETU THAW (Thlarau) a chuahhnawh i a nung! Minung kan nun rihmi cu kan chungah THLARAU a um rih caah asi i minung an thi kan timi hna zong khi THLARAU nih a kaltak cang hna caah asi.
- NUNNAK PETU THAW hi minung nih kan dawpmi THLI men hi si loin Pathian nih Amah he LO in sermi THLARAU tu hi asi... Nunnak petu cu Pathian Thlarau asi.
- Nuhmeinu fapa a thimi cu Elijah nih thla a cam piak i a thlacamnak aw cu Pathian nih a theihpiak tikah ngakchiapa NUNNAK (Thlarau) cu a chungah a rung lut i a nung tthan. Ngakchiapa chungah nunnak a lut tthanmi hi THAW (dawpmi thli) si loin THAW (Thlarau) tu asi.
- Minung nih thli kan dawp ruangah kan nun si loin kan chungah nunnak thaw(THLARAU) a um ca tuah thli kan dawp tu hi a rak si. Thli hi minung nunnak caah ti le rawl bantukin bawmtu pakhat men asi ve.
- Jesuh nih Jairu fanu a thimi cu tho tuah ka fanu a ti tikah hngakchia nu NUNNAK (THLARAU) cu a hung kir tthan i hngakchianu cu a nung tthan.
- Jesuh cu thihnak in a thawh hnu ah a zultu sinah bia a chim dih in ATHAW a chuahhnawh hna i THIANG THLARAU co ko uh tiah a ti hna.. A cahtak hna bantukin Pentecos ni ah Thiang Thlarau cu an rak co taktak i nihin kannih zumtu tampi sin zongah Thiang Thlarau cu toih kan si. Amen.
- Nunnak Petu taktak cu Pathian Thlarau asi. Pathian Thlarau, Jesuh Thlarau, Thiang Thlarau hna hi kan chungah an um tikah Sertu an sinak a lang i ser hnawhchan kan sinak atlinnak le Anmah mui kan kennak, kan lawhnak bik zong cu ANMAH kan chung i an umnak hin asi. Amen...(John 6:63)
—-
GENESIS 1:26
Cun Pathian nih cun, "Atu cu minung kan ser cang hna lai; kanmah mui an keng lai i kanmah he kan i lo lai. Nga si hna seh, va si hna seh, inn zuat saṭil si hna seh, ramlak i a ummi saram a hme he a ngan he si hna seh, an uk dih hna lai," tiah a ti.
GENESIS 1:27
Cuticun Pathian nih minung cu amah mui lo in a ser, minung cu Pathian mui in a ser hna. Mipa le minu kha a ser hna.
JOHAN 1:2
A hramthawk tein Bia cu Pathian he cun an um ṭi.
JOHAN 1:14
Bia cu minung ah a cang i kan lakah khua a rung sa. A sunparnak cu kan hun hmuh i vel le biatak in a khat. Cu sunparnak cu Pa nih a Fapa ngeihchunte lawnglawng a pekmi sunparnak phun kha a si.
GENESIS 2:7
Cun Bawipa Pathian nih vawlei khan tlak tlawmpal a lak i mipa ah a ser; nunnak petu thaw kha a hnar chungah a chuahhnawh i mipa cu a hung nung.
1 SIANGPAHRANG 17:22
Cun Bawipa nih Elijah aw kha a theihpiak i ngakchia cu a chungah khan a nunnak cu a lut ṭhan i a nung ṭhan.
LUKA 8:54
Sihmanhsehlaw Jesuh nih a kut khan a vun tlaih i, "Tho tuah, ka fanu," tiah a vun auh.
LUKA 8:55
A nunnak cu a hung kir ṭhan i hmakhatte ah a tho; cun Jesuh nih ei awk pe u, tiah a ti hna.
JOHAN 20:22
Cu bia cu a chim dih in a thaw a chuahhnawh hna i, "Thiang Thlarau kha hmu ko u.