Pathian tinhmi ka lim tiang, a dongh tiang hrimhrim ka tli lai

Zumhnak in ka unau taktak asimi, nangmah sin hrimhrim ah thazang peknak le forhnak ca ka van ttial. Ka ttialmi hi tawite asi ko caah a dongh tiang na rel lawng si loin a hodah ka si ti hngalh bu tein na rak relnak lai kan nawl ko. Vawlei asi caah kan hmai i a ummi thil tampi nih na lung in pialter hlah seh, tuah na duhmi tampi an um ko hmanh ah na chungah a nungmi Thiang Thlarau chimnak le fialnak tuin zeizong vialte hi tuah si ko seh.. Nihin tiang hrimhrim hi zeicem dah na tuah le zei na tuah ah dah na di a riam bik. Rawlulh thla na cam lio bantukin Cathiang nih an thawt rih maw? Thlacamnak nih teh an thawt rih ko maw? Bawipa he hawikomhnak na ngeih rih peng maw? Nihin kan sining taktak in ka van ttial hmanh lai muh: Minung tampi cu Pathian duhnak zulh le tinhmi tlinter hnak in minung duhnak tlinter le minung duhnak zulh hi an i thim deuh cuahmah. Cu chungah ka unau taktak asimi nangmah zong naa tel ve lai ti ka phan ko. Nangmah le nangmah van i zoh tthan law nichiar te hi zeidah na tuah cem? Na pawcawmnak rian maw? Nan Khrihfabu rian dah? Na taksa duhnak dah na zulh ve cang? 

Kannih cu Pathian tinhning in kawhmi kan si caah Pathian Thlarau hruainak in a nung dingmi kan si. Baipi taktak asimi cu kanmah ruangah le kan tuahmi ruangah si loin kan chungah a nungmi Pathian hrimhrim ruangah Pathian tinhmi zulh khawhnak le tuah duhnak tiang kan ngeih khawhnak hnga Pathian Thlarau cu kan chungah rian a ttuan zungzal ko. Thiang Thlarau he hawikomhnak tling na ngeih rih ko ahcun nichiar te hi na caah ruahchannak tthabik ni asi zungzal lai i zanchiar te hi Amah he hawi komhnak tthabik zan asi rih ko lai i zingchiar te hi Thiang Thlarau he hawikomhnak na ngeih zing asi zungzal ko lai. Na chungah a ummi Thiang Thlarau ai lawmh ko ahcun ttamhalnak nun chungah an luhpi zungzal ko lai i Thiang Thlarau nih cun rawlttam caan ah rawl an hal lai i tihal caan ah ti an hal ko lai.. Pathian tinhning kawhmi kan dihlak caah a biapi cemmi cu Pa Pathian, Bawipa Jesuh le Thiang Thlarau hna he hawikomhnak ngeih lengmang hi asi.. Cu hawikomhnak kan ngeih khawhnak ah bawmtu tthabik a hram hna cu thlacamnak in Thiang Thlarau he hawikomhnak ngeih le Thiang Thlarau umpinak he Cathiang rel hi asi. Cu lawng hmanh si loin Thlarau fialnak in rawl ulh thlacamnak ngeih ve lengmang hi an si. Thiang Thlarau he hawikomhnak tling kan ngeih hnu lawngah Pathian tinhmi tling taktak cu kan hngalh khawh lai i Pathian tinhmi tling kan hngalh khawh lawngah Pathian tinhmi zulh duhnak le tuah duhnak in tuah khawhnak tiang Pathian nih kan chungah rian a ttuan tthan lai. Amen! Biatak cu kan tuah lengmang mi kan tuah ruangah Bawipa kan lawmhter si loin Thiang Thlarau umpinak in Pathian nih na tuah lai timi kan tuah ruang tu ah Bawipa kan lawmhter a rak si deuh.

Khrih Ralkap si khawhnak hi ralkap si duhnak tiang lawng si loin phun tampi zulh dawi hnu tu ah ralkap taktak sinak phak khawh asi. Khrih Ralkap si khawhnak cu:

  1. Khrih Ralkap kan si khawhnak dingah apply (kan sioh a hau), Khrih kan zumh le kan cohlan a hau. 
  2. Khrih Ralkap ttuan ding in kan zumhnak cu cohlan kan si hnu ah Training kan kai a hau, Training hi zei tik hmanh ah a awlmi asi ballo i atak in kan ton te dingmi zong hi Training kan kaimi hnak in a har deuhmi an tampi te lai. Training kai lawng si loin Training kan awn a hau ve. 
  3. Training kan awn taktak tikah Khrih Ralkap sinak tling kan hmu. Minung tampi hi Khrih Ralkap sinak tling kan phanh hlan ah Training ah a dongmi tampi an um. Training tiang aizami, Training ah a sungmi tampi an um. Bawipa nih zumtu vialte kawh dih kan si ko nain Thimmi cu tlawmte lawng kan si. Thimmi ah nai tel ve nak hnga Timhtuahnak na ngeihmi ah Bawipa ttihzah le bochan rak philh hlah. 
  4.  Khrih Ralkap ka si cang ti lawng si loin kan reng a kainak hnga kan Bawipa, lung kan ton a hau. Kan Bawipa lung kan ton khawhnak ding ahcun a duhnak tuah le a kan fialmi rian kan lim a hau. A duhnak kan zulh khawhnak dingah le fialmi rian kan lim khawhnak ding ahcun a nawl kan ngeih a hau.. A nawl kan ngaih khawhnak dingah cun a duhnak le fialmi rian kan hngalh ve a hau..

Cubantukin kannih zumtu asimi le Khrih nih a Ralkap si dingah thim in cohlang cangmi hna nih cun Khrih Ralkap kan si cang timi lawng si ti loin kan Bawipa lungton hi kan izuam awk asi. Kan Bawipa lung kan ton khawhnak dingah cun a nawl kan zulh a hau, Ralkap rian he ai pehtlailomi rian paoh hnu kan chit i kan i sawhkalhlo a hau. Kan Bawipa duhnak zulhnak le fialmi rian kan limnak lawng hin kan Bawipa cu a lung kan ton khawh lai i kan Bawipa lungtonnak lawng hin kan reng cu kan kai kho ve lai. Kan Bawipa lungton khawhnak ding ah hin a biapa cemmi cu Amah he naihniam tein ka um zungzal a hau. Amah he naihniam in kan um lo ahcun zeitindah a duhnak cu kan hngalh khawh lai i fial a kan duhmi rian cu kan hngalh khawh lai. Fial a kan duhmi rian le a duhnak kan hngalh khawh lo ahcun zeitindah kan Bawipa lung cu kan ton khawh lai? Kan Bawipa he naihniam tein um khawhnak ah bawmtu ttha cem cu nichair tein Thiang Thlarau hruainak in Cathiang rel le Thlacamnak in Amah he hawikomhnak ngeih hi asi. Amen. Amah he hawikomhnak kan ngeih deuhdeuh tikah kan i naihniam deuhdeuh lai i naihniam deuhdeuh nak kan ngeihmi nih cun hawikomttha taktak ah a kan phanhpi lai. Hawikomttha kan sinak nih cun biathli, biathup tampi ruahnak tiang a kan phanhpi ve lai; Khrih biathli le biathup tiang chimh kan si hnu lawngah hin Pathian duhnak taktak le fialmi rian taktak cu kan hngalh khawh lai i biathli kan hngalh tiang lawng si ti loin a kan fialmi a rian kan lim khawh tiang hrimhrim Pathian cu kan chungah rian a ttuan zungzal i Amah nih cun a kan bawmh lai. Amen.. 

Pathian tinhmi le fialmi rian kan lim khawh cionak ding ahcun Thiang Thlarau hruainak in timhtuahnak kan ngeih cio a hau.. Tumhtuahnak ka ti tikah hin minung kanmah lei zuamnak in Baibal rel lengmang le Thlacam lengmang, rawlulh lengmangnak in tuahnak khi ka chim duhmi si loin Thiang Thlarau hruainak hrimhrim in kan tuahmi tu khi ka chim duhmi asi. Biatak cu kanmah tuahkhawhmi van ti awk hi pakhat hmanh kan ngei lo i kan chungah rian atuan zungzalmi Pathian Thlarau tu arak si diam ai. Timhtuahnak ah a herhbikmi hna:

  • Nichiar tein Thiang Thlarau hruainak in Baibal Rel lengmang ding 
  • Ni chiar tein Thlarau hruainak in thlacam zungzal ding. Thlacam tikah kanmah lawng si ti loin Thiang Thlarau he hawikomhnak kan ngeih tiang kan cam ding asi.
  • Nichiar te Thlacamnak in Thiang Thlarau he hawikomhnak ngeih zungzal ding le Bawipa nih a kan umpi taktak kan hngalh ve tiang kan cawn ding asi.
  • Tlik zuamnak i timhtuahnak ah na daithlan ahcun tlik zuamnak phung a zullo ah rel na si sual lai. Tlikzuamnak i phung a zullomi nih laksawng an hmu ballo ti asi. Laksawng a hmu ding tein tlik zuamnak caah timhtuahnak na ngeihnak le na tliknak ah hin a dongh tiang hrimhrim tli ding in kan sawm ve. Tlikzuamnak caah timhtuahnak kan ngeihnak ah le tlikzuamnak hmun kan tlik cionak ah hin Thiang Thlarau hruainak tu hi fakpi in zulh khawh izuam cio ko hna usih. Thiang Thlarau hruainak na zulh ko ahcun adongh tiang hrimhrim na tli kho lai i Bawipa tinhpiakmi le fialmi rian zong na lim hrimhrim ko lai. Thiang Thlarau hruainak fakpi na hngalh khawhmak dingah an bawmtu asi lai tiah ka zumhmi cu na taksa rawlttam le tihal na hngalh khawhmi khi na rawl a rak ttam taktak le na ti arak hal taktak ca tu ah asi, Cu bangin na chungah Thiang Thlarau a um ko ahcun a caan a phak tikah an fialmi rian na hngalh hlan tiang chunglei in ttamhalnak le tuah duhnak he an chimh ve hrimhrim ko lai. Na ekchuah le na zunchuah na theih khi nangmah duh ruangah si loin chunglei in anmah tein an chuahcan a phak ve ca tu ah theihloawk tthalo in na theih asi, Thiang Thlarau rianttuannak zong cu kanmah duh ruangah si loin Amah nih a herh a ti ning tein Amah caan ah hngalhlo awk tthalo in rian a ttuan lai i an fial ve te ko lai..

—-

2 TIMOTE 2:3

Khrih Jesuh ralkap zumh awk tlak bantukin sifah innak ah khan ing ve ko.

2 TIMOTE 2:4

Ralkap a ṭuan liomi nih cun a cung bawi lungton kha a duh caah ralkap a si lomi hna rian ah khan aa sawhkalh len lo.

2 TIMOTE 2:5

Tlik zuamnak ah a tlimipa nih tlik zuamnak phung kha a zulh lo ahcun laksawng kha a hmu kho lo.