Minung vialte nih kan herh hmasa bikmi hi chawva asi lo i rian zong asi loh. Nupi le va neih hmasa le fanu le fapa ngeih hmasa zong arak si lo i fimthiamnak ngeih hmasa zong arak si tthiam lo. Minung tampi nih cun mah hi kawl hmasa ding timi zong tampi a um ko lai nain Bawipa Jesuh Khrih nih nan kawl hmasa hrimhrim lai a kan timi cu hihi asi. Pathian cu na thinlung dihlak in na kawl ahcun na hmuh ko lai tihi asi. Jesuh Khrih nih cun Hrinthannak in Pathian Pennak chungah luh hi abiapi cem ah a chiah, Cun Pathia nih zeidah tuah hna seh ti an duhmi hna zong hi nan hmuh hlan tiang kawl uh tihi a kan fialchihmi asi. Minung vialte nih rak kawl hmasa dingmi hi Pathian asi nain kan kawl hmasa ciomi hi Pathian arak si hrimhrim lo ti cu kan fiang cio ko lai dah. Kan hgakchiat in a tu tiang hi ka zoh lengmang i kan rak kawl hmasa bikmi hi Pathian asi hrimhrim loh. Pathian dawtnak a thei ciami hmanh nih hin zeidah Bawipa nih tuah hna seh ti a kan duh timi cu kan kawl hrimhrim lo timi zong hi ka hmuh tthan. Cucaah cun nihin Thawngtha ka ttialmi nih hin na nun ah bia rak chim sehlaw hrinthan cangmi na si ahcun zeidah Bawipa nih tuah seh ti an duhmi kha na hmuh hlan tiang kawl dingin kan sawm. Ahrinthan rih lomi na si ahcun Bawipa Jesuh Khrih zumhnak in hrinthannak le an khamhtupa na ton tiang zumhnak he thla rak cam ve tiah kan sawm....
- Hrintthannak in Pathian Pennak chungah luh ding. Hrinthan kan si cu Pathian pennak chung luhnak caah asi.. Na hrinthan lawngah Pathian pennak chungah na lut kho lai..
- Pathian nih zeidah tuah hna seh ti a kan duhmi hngalh i zuam. Mah hi na hngalh hlan chung paoh cu baumi na ngei rih tinak asi.. Company chung luh i zeirian dah ka ttuan lai ti hngalhlo bantuk asi.. Hrinthannak ka hmu cang ai timi tampi hi Pennak chung kan luh le luhlo ai hngalh lomi tampi kan um rih! Cun zeidah Bawipa nih tuah hna seh ti a kan duh ti a theimi cu kan tlawm chinchin! Nangteh Pennak chung ah na um in na rian na hngal ve cang maw?
- Pathian Pennak chung na um hnu ah le Pathian nih zeidah tuah seh ti an duhmi na hngalh hnu ah duhsah in thil dang vialte zong hi pek tthiamtthiam na si te lai.
- Biapi asimi cu Pathian Pennak chungah ka um cang maw? ti i hngalh ding. Pathian pennak chung na luh rih lo ahcun na hrintthan rih lo tinak asi hnga? Mi vialte hi Pathian Pennak chungah luh dih ding in khamh kan si. Zumtu vialte kan luh hmasanak cu hrintthannak in Pathian Pennak chungah hin asi. Jesuh nih a chimmi cu na hrinthan lo ahcun Pathian Pennak chungah na lut kho lai lo ati.
- Biapi asimi cu Pathian nih kan nun chung vialte zeidah tuah seh ti a duhmi kha hngalh i zuam ding. Mah hi hngalh khawhnak dingah hin can sau zong a rau kho men, nangmah nih zeitlukin dah hngalh na duhmi nih a neih ve lai? Mah hi na hngalh hlan chung paoh cu Pathian duhnak taktak na hngal kho hrim lai lo.. Pathian duhnak na hngalh khawh rih lo ahcun Pathian duhnak zulh le fialmi rian limnak lam cu a um hrim lo. Zumtu paoh hi Pathian nih kanmah tawk cio in rian a kan fial cio dih tihi hngalhter tthan kan duh.
- Minung kan si caah herhmi kan ngei dih cio nain Bawipa duhnak a kawlmi kan caah cun kan caah a tthabik in khua a kan khanpiak zungzal ve ko tihi biatak asi.
- Jesuh Khrih zumhnak in Hrinthan, ti le Thlarau in hrintthannak in Pathian Pennak chungah luh, Pathian Pennak chungah kan umnak in Pathian nih fialmi rian hngalh, Pathian fialmi rian hngalhnak in kan nun chung vialte Amah duhnak zulh le fialmi rianlim, Amah duhnak le fialmi rianlim duhnak chung kan nun tikah kan herhmi vialte pek dingah kamh kan si. Amen..
Bawipa zangfahnak thawngin Hrintthannak ka hmuh hnu ah ka ruah tukmi le thla ka cam lengmang mi cu Bawipa zei hi dah ka nun chung vialte tuah seh ti na ka duhmi hi asi tihi asi. Cucu Pathian nih a ka tinhpiakmi (Plans) ka ti lengmang cu asi. Cuticun kum (2) leng thla ka cam lengmang nain ka hngal kho ngaingai loh. Voikhat cu ti le rawl ei loin nithum chung Bawipa hmai cu ka kawl tthan i a ka chawnh hrimhrim lai timi zumhnak he nichiar, zanchiar te ka hngak. Nithum a dih tikah Bawipa he chawnhnak le biaruahnak, hawikomhnak kan ngeih lo caah ka tha a chia ngaingai. Thlacam kan dih zanhnih hnu zinglei 4:15Am ah Bawipa Pathian cu ka mangah vancung khin khuadawm in a rak ttum khi ka hmuh i ka nun chung vialte zeidah ka tuah lai timi (Pathian tinhpiakmi) cu a ka chimh dih in ka hngen taktak ah ka kelei hnakhawh hin ka mang i a chimmi bia (A ka tinhpiakmi) cu a ka chimh tthan. Amen! Bawipa nih sunparnak co zungzal ko seh..Mah tehte nih hin hmailei na nun chung vialte zeidah Pathian nih an tinhpiakmi asi timi na hngalh venak dingah an bawmhtu asi nakhnga le zumhnak he rawlulh thlacamnak in na hmailei tinhpiakmi rian na hngalh khawh ve nakhnga lam an hmuhsaktu siseh ti ka duh. Atang Cathiang hi Bawipa zangfahnak thawngin ka cungah a tling cuahmah bantukin Nangmah cung zongah tling ve seh ti ka duh. Cathiang hi rel ding men le theih ding ca men ah pek si loin kan chunglei ah Pathian Thlarau tthawnnak he tlinter dingin pekmi kan si caah nangmah le na innchungkhar cio ca zongah a tak in tling ve hram ko seh. A tak in mah Cathiang hi naa nunpi i na kawl ko ahcun Bawipa nih an tinhpiakmi cu an chimh ve hrimhrim ko lai tiah Jesuh Min in Bawipa ka bochan ko. Ka Pathian nih Fapa Jesuh Khrih thawngin sunparnak le upatnak, lianngannak zong co chin zungzal sehlaw Jesuh thawngin a fale kanmah thawng cio in kan Pathian cu mikip nih thangtthat cio cang ko hna seh. Amen!
—-
MATTHAI 6:33
Cucaah zei dang vialte nakin Pathian Pennak le zeidah tuah hna seh ti a kan duh timi kha biapi deuh in ruat u law thil dang vialte hna zong hi an pek ṭhiamṭhiam ko hna lai.