Thlarau in ka unau taktak asimi sinah Pathian sunparnak le tthatnak hrawm ve dingah a kan kotu hi Amah Pathian hrimhrim asi ti hi hngalhter tthan kan duh ko. Zumtu vialte hi Pathian tthatnak le sunparnak hrawmh awkah kawh auh kan si tihi nawlhtthan ka duh. Amen. A sunglawi tukmi Pathian tthatnak le sunparnak hrawmh dingah kawh kan si timi hi van ruat ve law kan i phutnak zei hmanh a um lo tihi na van hngalh ve ko lai dah. Cucaah kan nunnak dihlak in Pathian kan thangthat ding le kan lawmh bak ding asi. Amen! Ka Pathian cu Amin thangtthat si ko seh. Amen! Ka Pathian sunparnak le tthatnak hrawm dingah auh kan si kan hngalhnak thawngin Pathian ttihzah in kan nun a herh zong hi na hngalhchih dingah nawlchih ka duh tthan. Biatak cu Pathian ttihzah in nun awkah kan herhmi thil vialte cu Pathian tthawnnak lila nih a kan pek ko ti zong hi hngalhter tthan kan duh chih. Cucaah cun Pathian ttihzahnak in kan nunnak dingah kan herhmi thil vialte cu pek kan si cang caah ralttha tein a kan pek cangmi thil hna cu na hmuh tiang kawl law Pathian ttihzahnak ah na tthannak hnga hmang hna.
Pathian ttihzah in kan nunnak dingah Pathian tthawnnak lila nih a kan pekmi, kan herhmi thil hna cu mah hna hi an si:
- Zumhnak ah khan tthatnak i chap
- Tthatnak ah khan hngalhnak i chap
- Hngalhnak ah khan mah le mah i uk khawhnak i chap
- Mah le mah i uk khawhnak ah khan inkhawhnak i chap
- Inkhawhnak ah khan Pathian ttihzahnak i chap
- Pathian ttihzahnak ah khan unau bantukin dawtnak i chap
- Unau bantukin dawtnak ah khan zawnruahnak i chap hna hi an si. Mah hna hi pek dih kan si i pek dih kan si ka ti tikah zapi ca in ka chimmi asi, pumpak caah cun na zumhnak in na kawl deuhdeuh le hmuh naa zuam deuhdeuh tikah na ngeih chinchin hna ding khi an si. Zumhnak in siseh zei thil paoh hi Auto in kan ngah khawhmi si loin zumhnak in kan kawl venak in kan hmuh hna ding khi an rak si deuh. Phun dang in ka chim ahcun vawlei thil le cawnnak vialte hi pek dih kan si nain a kawl deuhmi le a cawngmi nih an hmu deuh bantuk khi asi ko.
Cucaah cun vawlei kan nun chungah kan kawl cem dingmi hi zeidang si loin Pathian nih Amah ttihzah in kan nun khawhnak ding caah a kan pek cangmi thil hna hi zumhnak he kawl cio hi asi. Cu thil hna cu tam deuh le tling tein kan ngeih tikah Pathian kan Pa cu tling tein kan biak khawh lai i a duhning in kan nung kho lai. Nangmah le nangmah van i ruat law zumhnak na ngeihmi ah khan tthatnak naa chapmi a um maw? Tthatnak naa chap ahcun hngalhnak tling teh naa chap cang maw? Hngalhnak tling naa chap ahcun mah le mah ukkhawhnak tiang an phakpi maw? Mah le mah ukkhawhnak na ngeih cang ahcun Inkhawhnak ta na chap cang maw? Inkhawhnak na chap ahcun Pathian ttihzahnak tling ta na chap maw? Pathian ttihzahnak tling na chap ahcun unau bantukin dawtnak ta naa chap cang maw? Unau bantukin dawtnak naa chap ahcun zawnruahnak tling teh na ngei cang maw?
Pathian kan Pa nih a kan duhpiak zungzal mi cu Amah tthatnak hrawmh ding le Amah sunparnak hrawm zungzal hi asi. Pathian tthatnak le sunparnak cu hrawmh kan si tikah Pathian ttihzah in kan nun a rak herh ve. Cucaah Amah ttihzah in kan nun nakhnga kan herhmi thil vialte cu Pathian tthawnnak lila in pek tthiamtthiam kan si. Amen. Cubantuk tthiamtthiam in Pathian tinhmi, kan zulh khawhnak dingah le tuah duhnak thilung kan ngeih khawhnak dingah kan chungah rian a ttuan zungzal mi cu kan Pathian tthiamtthiam asi ve. Biatak cu zeizong vialte hi kan tuah khawhmi le tuah duhnak in Pathian ttihzahnak tiang kan ngeih khawhnak hna hi kan Pathian thawng lawnglawng in asi ko tihi ralttha tein chimh kan duh ko. Zeizong vialte hi kanmah ruangah si loin Pathian ruangah le Pathian thawng lawng tein an si dih ko tihi tehte khan chih kan duh. Pathian ttihzahnak ah kan herhmi thil hna hi zeibantuk dah na ngeih cang hna? Pek cangmi zong hi kanmah chungah kan ngeih rih lomi le phan rih lomi an um ko ti zong hi na hngalhnak hnga ka van ttial chih hih. Cucaah cun Pathian kan Pa nih a kan pek cangmi thil, Amah ttihzah in kan nun khawhnak caah a herhmi thil hna hi tampi in na ngeih ahcun kaa lawmhnak a tling lai i kan Pathian zong ai lawm ve tuk lai. Bawipa Jesuh thawngin Pa, Pathian cu thangtthat si zungzal ko seh..
—-
2 PETER 1:3
Pathian sunparnak le ṭhatnak i hrawm ve awkah a kan kotu kan hngalhnak thawngin Pathian ṭihzah in nun awkah kan herhmi thil vialte cu amah Pathian ṭhawnnak lila nih cun a kan pek.
2 PETER 1:5
Hi ruang hrimhrim ah hin, nan zumhnak i ṭhatnak chap kha fak piin i zuam u; cun nan ṭhatnak ah khan hngalhnak i chap u;
2 PETER 1:6
nan hngalhnak ah khan mah le mah i uk khawhnak i chap u; mah le mah i uk khawhnak ah khan in khawhnak i chap u; in khawhnak ah khan Pathian ṭihzahnak i chap u;
2 PETER 1:7
Pathian ṭihzahnak ah khan unau bantukin i dawtnak i chap u law unau bantukin i dawtnak ah khan zawnruahnak i chap u.