Na ruat bal maw? Minung tampi nih cun sual ngaihthiam hi kan duh dih cio i kan sualnak zong cu Jesuh Khrih thisen thawngin ngaihthiam cu kan si taktak. Amen! Sihmanhsehlaw biatak asimi cu a sual lomi kan um lo caah sual ngaihchihnak tel loin sual ngaihthiamnak hi a tling kho lai maw ti hi asi. Jesuh Khrih nih thihnak in a thawh tthan hnu ah a zultu sin i a chimmi cu Keimah Min in Jerusalem thok in vawlei cung hmunzakip ah sual ngaihchihnak le sual ngaihthiamnak thawngtha nan chimh hna lai ti hi asi. Amen! Minung leiin kan tuah awk kan rian cu kan sual kan i ngaihchih bak awk le kan sual kan phuan awk asi i Bawipa Jesuh nih a kan tuahpiak ve cangmi cu nan sual kaa cinken ti lai lo, nan sual kan ngaihthiam dih hna tihi asi ve. Amen! Bawipa duhning in sual phuanmi le sual ngaihchihnak nih a zulh zungzal mi cu na sualnak kan ngaihthiam dih tihi asi zungzal ko. Amen! Nain van fianter kan duhmi cu sual ngaihchihnak le sual phuannak kan ngeihmi vialte hi kan thinlung taktak in asi awk asi.
Sual ngaihchihnak cu kan tuah tawnmi sualnak kha Jesuh Khrih thawngtha kan theihmi ruangah mertak in sualnak tuah ti lo hi ka chim duhmi asi i sual phuan cu kan rak tuah ciami sualnak vialte hi kan theihmi Jesuh Khrih Thawngtha ruangah kan kaa in kan tuahmi sualnak kha pakhat hnu pakhat in ka tuah, kan sual ti phuan hi kan chim duhmi asi. Sual ngaihthiamnak tu cu minung nih kan tuah khawhmi chungah a um lomi asi i sihmanhsehlaw Pathian nih vawlei aummi minung hi a kan dawt tuk caah a Fapa ngaihchun te lawng a kan pekmi dawtnak thawng hin ngaihthiam dih cio kan si ti hi sual ngaihthiamnak phuanter fial kan simi cu asi. Sihmanhsehlaw ngaihthiamnak taktak a comi cu vawlei cung minung vialte hi kan si lai lo i Jesuh Khrih cu Pathian nih vawlei Khamhtu ah a run thlahmi A Fapa asi tiin a zummi lawnglawng sual ngaihthiamnak le Khamhnak cu pek kan si. Amen!
Minung tampi nih sual ngaihthiam cu kan duh ngai nain sual ngaihchih cu kan duh tuk lo. Thawngtha chimtu tampi zong nih sual ngaihchihnak kong hi kan chim a tlawm ruangah asi kho men. Vawlei dongh tiang Thawngtha biatak chim fial kan si cu sual ngaihchihnak le sual ngaihthiamnak hi an si. Sual ngeichihnak zong sual ngaihthiamnak tello ahcun san an tlai lo i sual ngaihthiamnak zong sual ngaihchihnak tello in cun a tlam a tling ve tthiamtthiam lo. Nain mah hna pahnih hi rian an ttuantti zungzal mi an si i sual ngaihchihnak kan ngeih hnu ah sual ngaihthiamnak nih a van zulh ve, cu zong cu Jesuh Khrih thawng lawnglawng in asi. Amen! Chim duhbikmi cu sual ngaihchihnak le sual phuannak kan ngeihmi nih hin zeitlukin dah asualmi kan si timi a kan hngalhter i zeitlukin dah a sualmi kan si timi kan i hngalhnak nih kan sualnak vialte kha ngaihthiam dih kan si timi kha Jesuh Khrih thawngin sual ngaihthiamnak nih a van fehter ve. Amen! Zeitluk misual dah ka si ti kan i hngalh lo chung paoh cu zeizat remruam dah ngaihthiam ka si timi cu kan i hngal kho ve bal lai lo. Cucaah sawm kan duhmi cu zeitluk a sualmi na si kha sual ngaihchihnak le sual phuannak rak ngei law cu sual ngeihchihnak le sual phuannak na ngeihmi nih cun zeitluk thuk in dah sual ngeihthiamnak pek na si kha an hngalter ve ko lai. Amen! Bawipa nih sunparnak co ko seh..
LUKA 24:47
cun amah min in sual ngaihchihnak le sual ngaihthiamnak kong kha Jerusalem khua in i thawk in miphun vialte hna sinah chim a si lai,' tiah aa ṭial.