Nihin zumtu tampi hi Thiang Thlarau he hawikomhnak na ngei bal maw tiah bia in hal hna ning law zeitindah nan ka leh ve hnga? Biatak cu hawikomhnak hi Baibal ka rel, thla ka cam, rawl ka ulh, kaa pum lengmang timi tuahnak tiang lawngin si loin a tak in nangmah le Thiang Thlarau he umttinak le hawikomhnak ngeihtti tu hi ka chim duhmi asi. Hawikomhnak ka ti tikah kanmah lawng si loin Thiang Thlarau he thlacamnak in umtti le hawikomhnak ngeihtti khi ka chim duhmi asi. Hawikom ka ngei na ti tikah na ngeihmi na hawikomh khi na chim duh taktakmi asi cu na hngalh hrimhrim ko..
Thiang Thlarau na theih lo ah zeitindah na hngalh khawh lai, na hngalh lo ah zeitindah hawikomhnak cu na ngeih khawh lai? Thlarau lei tthan na duh taktak ve ko ahcun Bawipa he hawikomhnak, Thiang Thlarau he hawikomhnak le Pa Pathian he hawikomhnak tampi rak ngeih. Cu nih cun Pathian tinhning in tampi an tthanter lai.. Thiang Thlarau he hawikomhnak ngeih na duh taktak ahcun thlacamnak in Bawipa hmai kun law Thiang Thlarau, Nangmah he ton le theih, hngalh kan duh lawng hmanh si loin Nangmah he hawikomhnak ngei ka duh tiah na duhmi hal in thla cam law na chim dih in na halmi an leh ve hlang tiang dai tein an lehnak bia rak ngai... Can tampi mah bantukin thlacam na duhmi na chim dih hnu ah Amah nih an leh tiang hngah nun na ngeih ve tik lawngah an leh ve te lai. An leh tik lawnglawng ah Thiang Thlarau he hawikomhnak ka ngei kho tiah tehte na khan ve te lai. Tangcheu na awn cang ahcun tangcheu ca cawng ti loin tangkhat ca tu rak cawng cang. ABC hi mifim pipi zong nih an herh nain ABC tu cu cawntthan an herh ti loh tihi hngalhchih caan aza cang. Minung tampi hi nun cawn timi biafang kan hmang tuk nain kan thiam ciami cawn lawng kan duh i kan thiam rih lomi le tuah ballo mi cu nun cawn cu kan duh lo.. Nun cawn cu kan thiam rih lomi le kan tuah rih ballo mi tu hi nun cawn timi cu asi deuh...
Bawipa he hawikomhnak ngeihnak lawnglawng in tthannak tling na hmuh kho lai. Kum zeizat hmanh Pathian a duh tukmi le abiami, Khrihfabu a daw i a chungah riantuanmi si hmanhlaw Thiang Thlarau he hawikomhnak taktak na ngeih ballo ahcun theihnak ah na tthang lai i a taktak in Thiang Thlarau he hawikomhnak le hngalhnak ahcun na tthang bal lai lo. Theihnak tthan hi attha nain a let tampi in Thiang Thlarau he hawikomhnak in hngalhnak tling ngeih hi attha bik.. Thiang Thlarau he hawikomhnak ngei ve ding in Kan sawm. Thluachuahnak le damnak na hmuhnak ding lawngah thla rak cam ti loin Thiang Thlarau he hawikomhnak ngeih duh tu ah thlacamnak in Bawipa hmai ah rak kum ve cang tiah kan sawm. Bawipa he hawikomhnak taktak na phak tik lawngah Pathian biak a thawtnam taktak cu na hngalh ve te lai... Bawipa nih Amah a zultu kanmah cio hmangin sunparnak co zungzal ko seh..
—-
FILIPI 2:1
Khrih chung i nan nunnak nih khan an ṭhawnter hna maw? A dawtnak nih khan nan hna an ngamter hna maw? Thlarau he hawikomhnak nan ngei maw? Pakhat le pakhat nan i daw in nan i zaangfah maw?