David Siangpahrang nih Bethshaba he sualnak atuahmi ruangah ngaihchihnak le ngaihthiam halnak in Pathian sinah thla acammi phunhnih a um i cucu “Na Umnak Hmun In Ka Thawl hlah”, timi le “Na Thiang Thlarau Kha Ka Lakkanh hlah”, timi hi asi. Thiang Thlarau hi biakamhlun tein minung chungah hmunhma arak lai ve ko hi ta timi hmuhkhawh asi. Tuni ah fak deuh in ruat ve law ti ka duhmi cu “Na Thiang Thlarau Ka Lakkanh Hlah”, timi asi. David Siangpahrang nih cun Thiang Thlarau a chungah a um le Thiang Thlarau a ngeih kha fiang tein a hngalh i Pathian, Thiang Thlarau Lakkanh lai cu a phan cemmi asi.
Nangteh Thiang Thlarau na chungah aum le na ngeih cu na hngalh taktak ve maw? Sualnak pakhatkhat na tuah tikah sual ngaihchihnak le sual ngaihthiam halnak he “Na Umnak Hmun In Ka Thawl hlah Law”, “Na Thiang Thlarau Kha Ka Lakkanh hlah”, tiah thla na cam bal ve maw? Si ahcun zeitindah Thiang Thlarau na chungah aum le na ngeih cu na hngalh timi hi in hal ning law zeitindah na ka leh hnga? Minung tampi nih hin Thiang Thlarau cu amin kan theih ngaimi le kan chim ngaimi asi ko nain pumpak in Amah atongmi le ahngalhmi ka si ve maw ti cu ruah caan asi cang. Thiang Thlarau na chungah aum lo ahcun “Khamhnak ka co cang na timi le Hrinthannak ka ngei cang na timi cu pakpalawng bak na si ko hnga”.
Thiang Thlarau ka chungah ka ngeih khawhnak ding cu Pathian Fapa Jesuh Khrih nih zeitindah Khamhnak a ka serpiak timi ka zummi thawngin “Khamhnak” ka co. Khamhnak ka comi ka timi cu Jesuh Khrih nih Khamhnak a ka serpiak cang tiah ka zumh caah Khamhnak ka co cang timi keimah ruahnak lawng si ti loin Jesuh Khrih hrimhrim nih Ti le Thlarau in Hrintthannak pek ka si. Amen! Cucu Tipil petu Johan nih ka hnu in arami Jesuh Khrih nih cun Ti, Thiang Thlarau le Mei in tipilnak an pek hna lai atimi kha a hung tlinnak asi. Amen! “Ti le Thlarau”, in “Hrinthannak”, nih hin “Khamhnak”, kan comi “Pathian Fa kan si cang timi”, kan si taktaknak tehte akhan. Ti le Thlarau in Hrinthannak na hmuh hnu lawngah Thiang Thlarau ka ngei, ka chungah Thiang Thlarau aum timi na hngalh khawh lai.
Minung tampi cu “Khamhnak kan co le colo zong kan i hngal lo”, i “Hrintthan kan si cang le canglo zong kan i hngalh hlei lo”. Cubantuk tthiamtthiam in Thiang Thlarau kan ngeih le ngeihlo zong kan i hngalh hleilo i vancung pennak chungah kan um le umlo cu ahlat chinchin. Mah bantukin naa hngalhlo ahcun pakhatnak ah Khamhnak na co rihlo le Hrinthannak na hmuh rihlo le Thiang Thlarau na ngeih rihlo caah asi ko lai. Mah ti ka ti ruangah lungdongnak lei panhnak caah si loin Pathian fa sinak taktak na phaknak ding caah Bawipa Jesuh Khrih hi nunnak dihlak he rak kawl in rak zum ko. Lungthin dihlak in azummi, afuhmi le akawlmi nih kan hmuh ko. Amen. Fuh le Kawl ka ti tikah zumhnak in kawl dingmi le fuh dingmi tuahnak tu khi ka chim duhmi asi. Jesuh cungah Zumhnak kan ngeih hmasa ruangah Jesuh kan zumh si loin Jesuh kan zumh hmasa ruang tu ah Jesuh cungah zumhnak kan ngeih arak si. Zumhnak (Faith) cu Khamhnak ahmu cangmi hna lawng ngeih khawhmi asi i Zumh (Believe) tu cu mi vialte nih ngeih khawhmi asi..
Khamhnak Serpiaktu le serpiakmi ka zummi thawngin Khamhnak ka co i Khamhnak ka co cang ti fehternak ah Ti le Thlarau in (Hrinthannak)=(Thlarau in Tipil Peknak), (Thinlung Cuarpar Tannak)=(Lungthin Thar=Undevided Heart ngeihnak, Ruahnak Thar, Thlarau Thar)=(Lung bantukin ahakmi thinlung kha lakin Titsa bantukin anemmi Lungthin) ka hmuh, Hrinthannak ka hmu cang timi cu Thiang Thlarau toih ka simi hin afekbik. Minung nih hin pum in cuarpar cu an tan khawh ko nain Thinlung cuarpar tan khotu cu Jesuh lawnglawng asi, tipilnak zong hi minung nih pek khawhmi asi nain Thiang Thlarau in tipilnak pe khotu cu Jesuh lawnglawng asi. Cucaah pei Peter nih Kornalias innchungkhar sin i Thawngtha a va chimh lio hna i an cungah Thiang Thlarau toih an simi a hmuh tikah Bawipa Jesuh nih a kan cawnpiakmi cu Johan nih cun Ti in tipilnak an pek hna sihmanhsehlaw Kei nih cun Thiang Thlarau in tipilnak kan pek hna lai atimi kha ka lung ahung pem atinak kha asi cu. (Lamkaltu 11:16)
Thiang Thlarau na chungah aum le Thiang Thlarau na ngeih cu zeitindah na hngalh? tihi mi pakhat nih in hal sehlaw zeitindah na leh hna hnga? Nangmah tein na chungah Thiang Thlarau a umnak le na ngeihnak na hngalhnak cu thil phun (5) tal in van chim hnik.... Keimah zong nih ka chungah Thiang Thlarau a umnak le Thiang Thlarau ka ngeihnak ka hngalhnak cu fiang tein kan chimh ve lai. Thiang Thlarau ka chungah aum ka hngalhnak le ka ngeih ka hngalhnak hi phun tampi in kan chimh khawh ko lai nain minung vialte nih an cohlan khawh dingmi tete lawngin kan chimh lai. Thiang Thlarau ka chungah a um ti ka hngalhnak cu hihi hna hin an si:
- Thawngtha biatak ka zumh hnu ah ka pum duhmi le ka lungthin duhmi ai dang cang. Atthami lawng ruah duhnak ka ngei. Thianghlim nun ka ngei ka ti tikah ka pum lawng si loin ka thinlung le ka ruahnak zong hi an si chih.
- Thiang Thlarau ka chungah aum ti ka hngalhnak cu Baibal rel duh pengnak le Baibal ka rel tikah thawknak angeihmi hin asi.
- Thiang Thlarau ka chungah aum ti ka hngalhnak cu Thlacamnak (Bawipa he hawikomhnak) ngeih peng ka duhnak le hawikomhnam nih a ka thawttukmi hin asi.
- Thiang Thlarau ka chungah aum ti ka hngalhnak cu rawlulh duhnak ka ngeih tawn lengmang mi le ka ulh tikah nun remhnak le teinak Bawipa nih a ka hrawmhmi hin asi.
- Thiang Thlarau ka chungah a um ti ka hngalhnak cu Thawngtha ngeih duhnak le Thawngtha ka ngeihmi nih a ka thawt baknak hin asi.
- Thiang Thlarau ka chungah a um ti ka hngalhnak cu Pathian ka thangthat tikah thawtnak le diriamhnak (lunghmuihnak) ka hmuh tawnmi le thangtthat duhnak ka ngeih lengmang mi hin asi.
- Thiang Thlarau ka chungah aum ti fiang tein ka hngalhnak cu Jesuh Khrih Thawngtha biatak hrawmh duhnak ka ngeihmi lawng hin si loin ka hrawmh tik hna ah keimah ca hrimah thawknak le lungsinak ka ngeihmi hi asi.
Thiang Thlarau ka chungah aumti cu ka Hrinthan cang caah asi i ka Hrinthan cu Khamhnak tling ka hmuh caah asi. Thiang Thlarau he hawikomhnak ka ngeihmi tampi chimawk an um ko nain minung tampi caah zumh an har lai caah a cungah ka van ttialmi phun (7) chungah naa tel ve asi ko ahcun Khrih chungah unau taktak ka si hnga i na chungah Thiang Thlarau a um tinak asi hnga. Bawipa Jesuh Khrih thisen in cawkmi kanmah hmangin Pa Pathian sunparnak hmu ve hram ko seh.. Amen...
—-
SALM 51:11
Na umnak hmun khan ka ṭhawl hlah, na thiang thlarau kha ka lakkanh hlah.