Nihin ah ka unau taktak asimi nangmah sinah atu lio ka thinlung ah Thiang Thlarau nih a chiahmi bia hi ca in ka rak in kuat. Cucu “Thiang Thlarau na hngal taktak maw?” timi hi asi. Thuk deuh in van i ruat law Thiang Thlarau hi na hngalh taktak ve maw? Thiang Thlarau hi mi nih chimmi, Baibal na relmi theihnak tiang lawngin akong na theihmi in cun hngalhnak cu na phan hrimhrim lai lo. Nangmah nih Thiang Thlarau he nai ton lawngah le na chungah a um lawngah na hngalh taktak dingmi asi. Ka nawl rih tuah lai: Thiang Thlarau hi nangmah pumpak bak in na ton in na hngal maw? Amah nih teh an hngal hnga maw?
Minung tampi he bia kan i ruah i ka hmuh lengmang mi cu mah pumpak in Thiang Thlarau he tonnak le hngalhnak kan rak phak si loin Thawngtha chimtu nih an kan chimhmi theihnak le Baibal kan relmi chungin Thiang Thlarau kong kan theihmi tiang lawngah a um rihmi tampi an um. Nangteh Thiang Thlarau hi zeitindah na hngalh ve? Nan i tong bal maw? Bia an ruah bal maw? Nan i ton tikah Thiang Thlarau asi tiah an chimtu a um maw? Ara laimi kong an chim bal maw? Nun an cawnpiak bal maw? Atu bak ah hin keimah sinah si loin nangmah le Pathian hmai bak ah hin Thiang Thlarau toih ka si cang i Amah he kan i tong cang i ka chungah a um bak ko tiah tehte na khaang ngam hnga maw?
Ka thinlung chungah fakpi a ummi cu Thiang Thlarau, Thiang Thlarau ti chim cu minung tampi nih an thiam ngai nain Amah an ton ruangah le an hngalh ruangah an chim khawh vemi si loin midang sin in an theih lengmang caah chim chinmi asi rih ko tihi asi. Thiang Thlarau he atak in tonnak nih cun nun vialte athlen i ruahnak thar le thinlung thar a kan pek. Nunhlun an lo i nunning thar ah kan nung. Duhnak a kan chiahpiak i Amah he hawikomh duhnak a kan chiahpiak. Thiang Thlarau he nan i ton taktak ahcun dai tein na um kho bal lai lo. Cucaah pei Lamkaltu hna nih kan hmuhmi le kan tonmi chimlo in cun kan um kho bal lai lo an tinak kha asi cu. Nangteh nangmah hmuhmi le tonmi maw na chim lai, na hmuh rihlomi le na ton rihlomi Thiang Thlarau kong dah na chim peng rih lai? Thiang Thlarau chimlo in vawlei minthangmi hna na ton hna hmanh ah daih naa timh ttunglo. Thiang Thlarau na ngeih taktak le na ton taktak ahcun nangmah si loin Amah tu nih an hruai ko lai i lungthawhnak le ruahchannak vialte zong Amah nih an pek zungzal ko lai. Amen..
Nihin ah keimah nih ca kan kuatmi lawng naa rinh ahcun Thiang Thlarau he tonnak le hngalhnak cu na phan bal lai lo. Thiang Thlarau hi hngalh kan duh ko tiah thla na cam bal maw? Bawipa Jesuh nangmah ngeih kan duh ko tiah teh thla na cam bal maw? Vawlei chawva le thilri lawng maw na hal lai? Amah teh ngeih na duhbikmi le ton na duhbikmi ah na ser ve cang in Amah ton ding le ngeih dingah thlacamnak he na kawl ve cang lai lo maw? Pa Pathian hi teh sertu asi an timi ah hin maw naa zat peng rih ko lai? Amah he nan i tonnak in zeizong vialte Sertu ka si tiah dah an chimh ve cang lai.. Thiang Thlarau, Pathian le Jesuh Khrih hi nangmah pumpak in na ton bal hna lo ahcun ka hrintthan cang na timi hi nangmah thinlung deuh in asi men lai. Ti le Thlarau hrinthan taktak nak nih hin Thiang Thlarau, Bawipa Jesuh le Pathian he tonnak le hngalhnak chungah a kan luhpi. Amen. Bawipa min thangthat si chin ko seh. Amen..
—-
LUKA 11:13
Hi tluk i nan ṭhalo ko na hin nan fale kha thil ṭha pek cu nan hngalh ahcun, vancung i a ummi nan Pa nih cun amah kha Thiang Thlarau a halmi cu zeitluk in dah a pek chinchin hna lai," tiah a ti.