Nihin laimi tampi nunnak ah khrih mui kan cuan khawhlonak a ruang tampi lak ah pakhat a biapi tuk mi cu Hrinnaknak kong ahhin a si. Mi zeimaw nih ka hrinthan a ti ko lai nain a nun ah cathiang nih hrinthan nun a ti mi a um lo ahcun Pathian thinlung ah hrinthanmi a si loh ti kha a langhter. Mah hmuhning nakin Pathian hmuhning hi kan luat ding taktak cu a si. Mi cheu khat nihcun khamh I fiannak khi hrinthannak hmuh ah an rel sual tawn. Cathiang tu nih cun khamhnak kong cu a chim nain khawmhnak nih a chuakpi mi zungzal nunnak nan ngei awk a si a ti. Cu nunnak cu khamh I fiannak in hmuh mi siloin thlarau hrinthannak tu hi tinco khawhmi a si.
Johan 3:3-5 ah kan hmuh mi cu "Biatak tein kan chimh: Ahohmanh hrin than a si lo ahcun Pathian Pennak kha a hmu kho lai lo," tiah a ti. A hme 5 ah mah ti hin a van nolh than. "Ahohmanh ti le thlarau in hrin a si lo ahcun Pathian Pennak chungah ah cun a lut kho lai lo." tiah a van nolh than. Pathian Pennak luhnak ding caah cun mizeihmanh nih Ti le Thlarau in hrinthan a herh hrimhrim ti kha a van langhter. Ti le Thlarau hrin hi zeidah a si ti hi thil biapi tuk a si. Mizeihmanh nih a hrinthan a ti tikah Ti le Thlarau in a hrin than lawnglawng ah zungzal nunnak a hmuh lai ti a fiang.
Zisuh nih Nikudemu sin ah hi bia a chim khawh in Samaria nu sin ah Johan 4:23 ah "Sihmanhsehlaw Pathian a bia taktak mi nih cun thlarau le biatak in an biak can kha a ra lio I hika hi a phan cang. Hi bantukin a biami hna hi Pa nih a duhmi cu an si. Pathian cu thlarau a si caah a biatu nihcun thlarau le biatak in an biak awk a si, " tiah a ti. Zisuh chimmi Pathian duhmi biaknak kong ah siseh Pathian duhmi hrinthannak kong ah siseh "Biatak le Thlarau, Ti le Thlarau" ti hi kan hmuh hna. Mah zawn ah fiang tein a lang mi cu Ti nih a chim duhmi cu Biatak a si ti kha fiang tein a langhter. Thlarau tu cu zumhnak thawngin a fa ah a cohlan mi hna Thiangthlarau kong kha a chim duh mi a si. Zisuh ni samaria nu a ti mi cu hi ti a ding mi cu an ti a hal than lai sihmanhsehlaw keimah nih ka pekmi ti a ding mi cu a chung ah cerhti put ah a cang lai I zeitikhmanh ah a ti a hal than te lai lo a ti than.
Biatak cu a cohlang I cu biatak kha a nunnak ah a tlinter mi hna caah cun biatak cu nunnak chung ah cerhti bantuk in a put hi cu biatak nih cun vawlei an tonmi harnak vialte chung ah teinak a pek hna. Sihmanhsehlaw biatak hi minung fimnak in hngalh khawh asi lo caah Thiangthlaru tel lo in Pathian bia a rel mi nihcun minung hmuhning in lawngin a sullam an I lak caah an nun ah teinak a pe kho hna lo. Biatak cu Pathian thinlung a si bantukin Pathian thinlung a dihumnak in a hgaltu cu Thiangthlarua lawng a si. Thiangthlarau bawmhnak lo in mi zeihmanh nih biatak hi a sullam hngalh khawh asi lo caah Thiangthlarau hruainak in biatak chung ah Pathian he pehtlaihnak a ngei mi hna lawng hi cathiang nih mi hrinthan a si mi cu a si. Mah siarem ning in le mah hmuhning ni le mah nih a tha lai tining in Pathian kan biaknak nihcun Pathian a lawmhter kho lo.
Cucaah Pathian nih amah duhnak ning in kan biak khawh nakhnga biatak kha a kan pek I cu biatak kan hngalh khawhnak ding caah Thiangthlarau kha hal u kan pek hna lai tiah bia a kan kamh. Khamhnak kong thluak in a fiannak nihhin Pathian nawl a ngaih khawhlo caah mi zeimaw nih khamh kai fiang a ti I a hrinthan tung lo ahcun a nun ah teinak a ngei kho bal lai lo. Zisuh nih misual kan caah I a nunnak a pek ti hngalh hi khamh fian cu a si. Sihmanhsehlaw cu zisuh tuahmi kha Thiangthlarau bawmhnak in a tak nunpi tu hi hrinthan cu a si. Zumhnak thawngin a hrimthan taktak mi cu sualnak chung in khamh an si cang caah dinnak chung ah Thiangthlarau nih a hruai hna caah nitin an nunnak ah Bawipa tih an thiam I nawlngaih nun an ngaih caah an cung ah Bawipa ai lawm I zungzal nunnak a pek hna. Bawipa min thangthat si ko seh. A tak in hrinthan nun na ngeih ve khawhnak hnga Bawipa nih Thiangthlarau in in bawm sehlaw thlarau thluahchuahnak in pe ko seh.