Thlarau le Biatak

Thlarau le Biatak

Pathian nih a duhmi biaknak taktak cu Thlarau le biatak in biaknak hi a si tiah cathiang nih fiang tein a langhter. Cucaah mi zeihmanh hmanh nih Pathian he remnak hmuh a duh ahcun Thlarau le biatak in a biak hrimhrim a herhnak kong kha fiang tein a lang. Cucaah Johan thawngtha 4:23-24 ahcun "Sihmanhsehlaw Pathian a bia taktak mi nih cun Thlarau le biatak in an biak can kha a ra lio i hika hi a phan cang. Hi bantukin a biami hna hi Pa nih a duhmi cu a si. Pathian cu thlarau a si i a biatu hna nih cun thlarau le biatak in an biak awk a si," tiah a ti. Mah zawn ah thlarau nih a chim duhmi cu Thiangthlarau kong kha a chim duhmi a si i cu thlarau cu amah a zum taktak mi a kan pek mi kha a si. Biatak kan timi cu Pathian thinlung/duhnak kha a si. Biak timi a sullam cu ngaih i tuah a si. Pathian cu Thlarau le Biatak in biak a herh a ti tikah hin a chim duh mi cu Thiangthlarau hruainak in Pathian duhnak (Biatak) kha ngaih i Thiangthlarau bawmhnak in tuah tinak a si.

Mi zeihmanh nih kan duhnak a tlin tikah kan i lawm cio hna. Cu ve bantuk in Pathian zong a duhnak tlinter a si tik ah ai lawmnak a tling ve. Pathian kan biak ti a sullam cu Pathian duhnak kan tlinter/tuah tinak a si. Sihmanhsehlaw cu Pathian dunnak cu minung kan duhnak he an i kalh lengmang caah kan tuah kho taktak lo. Minung nih hin kan duhnak tuah cu kan i foih ngai i a tuah zong kan i nuamh bantukin Thiangthlarau zong nih Pathian duhnak tuah hi ai foih ngaingai ve i a tuah tik zong ah ai lawm fawn. Minung nih mah siarem ning le duhning in Pathian biak khawh sisehlaw cathiang nih thlarau le biatak in biak hi a kan fial hnga lo. Mi tampi nih Pathian hi kan duhnak a tlin khawh nakhnga caah kan biak tawn caah kan daithlang i a duhnak tuah hi kan i harh tuk tawn. Cu bantuk lungput cu a diklo mi lungput a si caah Pathian duhnak kha a tuah kho lo. Mah duhning in Pathian biak khawh si sehlaw Thlarau le biatak in biak hi a kan fial hnga lo.

Mark 7:8-9 ahcun "Nannih nih cun Pathian nawlbia kha nan chiah riangmang i minung cawnpianak tu kha nan zulh deuh," tiah a ti hna. Cun Jesuh nih cun a thawn than hna i "Nanmah cawnpiaknak tu kha fehter i Pathian nawlbia hlawt kha cu nan thiam ngai ko." ti kan hmuh. Thiangthlarau lo cun minung nih Pathian duhnak zong hngalh khawh a si lo pin ah a tuah zong tuah khawh a si lo caah minung nih hin mah duhnak tu in Pathian lungton hi kan i thim deuh zungzal. Kanmah le kanmah diriamhnak in Pathian kan biakmi hi a zaa ko rua tiah kan ruah caah Thiangthlarau sawm zong kan herh lo i biatak hngalh taktak zong kan i zuam fawn lo. Cu nih a langhter mi cu Pathian duhnak le lawmhnak taktak hi biapi ah kan ruat lo tinak a si. Pathian ka biaknak hi Bawipa cohlan mi a si lo sual lai ti a phang taktak mi nihcun Thiangthlarau kha an sawm i biatak kha tha tein an rel tikah Pathian nih a duhnak cu a hngalh ter hna caah lungawtawm lo tein Pathian kha an biak i cu nihcun an chung ah daihnak le hnangamnak a pek hna. Cu daihnak le hnangamnak nih cun Pathian an sin i a um kha fiang tein a hngalh ter hna caah Pathian kha zei an ton paoh ah an thangthat khawh.

Zumtu a si mi paohpaoh nih kan rian ngan bik cu Pathian lawmh ter a si. Sal nih a rian ngan bik cu a bawipa lawmh ter a si bantukin Pathian a zummi nih kan rian ngan bik cu mah le mah lawmhter siloin Pathian lawmhter a si. Cu Pathian a lawmhter tu biaknak cu mah duhnak le mah siaremnak in siloin a duhnak a hngaltu Thiangthlarua le a duhnak a si mi a biatak in biak i a nawl zulh hi a si. Pathian biaknak nih ai tinhmi cu amah Pathian duhnak tlinter kha a si. Cucaah Pathian a bia taktak mi nih cun Pathian duhnak tlinter kha an rian ngan bik i an i chiah caah thlarau le biatak kha an hman zungzal.

Pathian nih hin Biatak lawng in biak a kan fial lo. Thlarau lawng zong in biak a kan fial fawn lo. Biatak le Thlarau in biak a kan fial. A ruang cu Biatak cu thlarau a si mi Pathian bia asi caah minung fimnak in hngalh khawh a si lo caah Thiangthlarua bawmhnak lo cun Pathian duhnak hngalh khawh taktak a si lo. Cucaah thiangthlarau sawm lo in Bible a rel mi nih biatak nih ai tinhmi a biathli kha an hngalh khawhlo caah le minung fimnak in a sullam an i lak caah Pathian bia cu an chim cio ko nain hmual a ngeihlo caah Pathian sunparnak a lang kho lo. Thawngtha hmual a ngeihter tu cu Thiangthlarau lawng nih a kan hngalhter khawhmi biathli a si. Cu ve bantukin thlarau lawng in biak a kan fial fawn lo. Thlarau kan ti tikah sehtan zong thlarau a si ve caah thiangthlarau tiah ruahmi kha sehtan thlarau zong a si khawh ve caah thlarau thalo nih a duh paoh in a kan hlen khawh hnga. Sihmanhsehlaw thiangthlarau nih cun biatak hmang lawng in mi nunnak i bia a chim caah thiangthlarau le a thur thlarau kan thleidan khawhnak cu Biatak lawngin a si.

Hngalh dingmi pakhat cu a thur thlarau zong nih biatak hmang in zumtu ka kan hlen khawh than rih fawn. Cu ruangah mi tampi nih cun Pathian min put in thawngtha an chim ko nain Pathian sunparnak lang loin minung sunparnak tu a lang tawn. Thiangthlarau nih biatak hmangin rian a tuannak paoh ah Pathian sunparnak a lang zungzal. Thiangthlarau nih cun biatak a si mi Pathian duhnak kha tha a pek lio ah thlarau thur nih cun minung duhnak/pumsa duhnak kha tha a pek ve zungzal. Mi vialte nihhin kan pumsa duhnak hi kan hlawt sian lo caah Biatak nakin minung tuanbia cu hi kan i thim deuh i kan duh deuh tawn. Biatak nih cun hling bantukin mi a kan chunh, asinain a rak cohlang tu caah cun nunnak a si. Sihmanhsehlaw minung duhnak bia nih cun mi a nuamhter nain Pathian thinlung a kan phak pi kho lo.

Cucaah zisuh nih vawlei a um chung vialte Biatak kha a aupi zungzal caah minung hmuhning le duhnak in Pathian a bia mi hna Farasi pawl nih an cohlan lo caah misual kan timi hna kut in thi lo in miding ah kan ruahmi hna biaknak minung pawl hna kut in a thi. Pathian he rem a duh taktak mi nih cathiang nih a kan fial bantukin thlarau le biatak in bia hna usih. Bawipa nih thlarau le biatak in na biak khawh nakhnga in umpi ko seh.