Nihin Thawngtha hrawmh kan duhmi hna cu zeizong vialte nih anawl an ngaihmi Pa hi ahodah asi timi hi asi. Jesuh Khrih le kan Pathian, Thiang Thlarau hna hi voi tampi cu zeidah an tuah khawh timi le thilti khawh tthawnnak vialte an ngei timi hi ka rak zumh tuk i ka rak i bochan zungzal hna. Cucu apalh maw tiah cun a palhlo nain annawl ngai ding lei hi cu voi tampi ka rak fianglo i ka fiang ko ka ti hmanh ah pemhnak tiang cu ka rak phan kho lo. Tu ni ah ka ruahpi law ti ka duhmi cu hihi asi: Kan biakmi Pathian nih zeidah a tuah khawh timi lawng hi si ti loin Thlichia le tilet, zeizong vialte nih pei anawl an rak ngeih hi timi hi ka ruahpi law ti ka duhmi cu asi. Pathian kan fuhpanh tikah zeidah a kan tuahpiak lai timi ruahchannak kan ngeih tluk in zei tindah a nawl kan zulh ve lai i a duhnak kan tuah ve lai timi hi zuanhnawh chih cio hna usihlaw nihin zumtu ai timi tampi nih hin Bawipa he hawikomhnak kan ngeihmi cu a chah taktak hnga i kan ilawmnak cu atling chin lengmang ko hnga. Zeizong vialte nih Sertu Pa, Bawipa Jesuh le Thiang Thlarau nih an chimmi paoh hi an ngaih dih nain minung lawnglawng nih annawl kan ngai hna lo i an chimmi kan tuah in kan zul duh taktak hna lo tihi kan sining tein ka van langhter.
Bawipa Jesuh nih thlichia le tilet cu dai tuah uh ti nawl a pek hna tikah cipkhap ti loin daidep in an hung um tikah lawng chung i a ummi vialte cu an khuaruah ahar i thlichia le tilet hmanh nih anawl an ngaihmi Pa hi ahodah asi tiah an ti.
- Thlichia le tilet hmanh nih anawl anngeihmi Pa hi ahodah asi?
- Zeizong vialte nih a chimmi bia an ngaih i an zulh dihmi Pa hi ahodah asi?
- Minung bantukin fimnak le hngalhnak zeihmanh angeilomi zeizong vialte nih abia an ngaihmi le anawl anngaih dihmi Pa hi hodah asi?
- Nika le thlapa, Arfi le vancung ah aummi vialte nih a chimmi bia kaakhat hmanh an lawnh ngamlomi Pa hi hodah asi?
- Rili le a chung ummi vialte nih achimmi bia paoh an lu an khunpiakmi Pa hi hodah asi.
- Cerhkha tiang nih kan thlum cang lai an timi Pa hi hodah asi.
- Vawlei le a chung ah aummi vialte nih kaakhat hmanh a bia an el ngamlomi Pa hi hodah asi.
- Minung lawnglawng nih a nawl kan ngaihlomi le abia kan zulh duhlomi Pa hi hodah asi?
- Amah ka zum in ka biak ko atimi nih anawl kan ngaihlomi Pa hi hodah asi?
- Thihnak tiang tuar in Pathian duhnak zulh le fialmi rianlim ai thimmi Pa hi hodah asi?
- Minung sualnak vialte kalpitu le khamhnak a kan serpiaktu Pa hi hodah asi?
Aluanciami caan ahcun kan Pathian hi zeizong vialte tuah khotu asi tiin ka rak fiang ngai. Sihmanhsehlaw zeizong vialte a tuah khotu asi timi lawng si ti loin zeizong vialte zong nih pei anawl an rak ngaih hi timi zong ka van pemh chin thluahmah. Zeizong vialte atuah khotu asi timi hi cu kan hngalh tuk cio lai nain zeizong vialte nih anawl an ngeih dih timi hi cu kan fiang ko kan ti hmanh ah kan pemh ngaingai lai ka zum lo. Minung vialte nih hin Pathian nih zeizong vialte a tuah kho ko timi cu kan zumh taktak ko nain zeizong vialte kan cungah atuah khawhnak dingah anawl zulh cu kan duh ngaingai loh. Zeizong vialte nih anawl an ngaih bantukin Minung vialte nih Pathian achimmi bia le anawl cu kan zulh bak lo ti cu nangmah nih naa hngalhmi te an si ko lai dah. Pathian thilti khawh tthawnnak lei lawng zoh loin anawl ngainak in van zoh ve law cu nih cun ruahchannak le lawmhnak an pek lai. Biatak cu lawmhnak taktak le ruahchannak taktak hi Pathian nih zeidah atuah khawh timi zumhnak kan ngeih lawngah si ti loin Pathian nih zeidah achim le zeidah tuah a kan fial ve tiin anawl zulhnak le tuahnak tu hin lawmhnak le ruahchannak taktak cu kan Pathian nih tlinter aitimhmi asi ve. Thlichia le tilet, zeizong vialte nih kan Pathian nawl an ngaih zungzal bantukin asermi vialte lakah a dawtbikmi minung zong nih zeidah a tuah khawh timi zumhnak kan ngeih i kan lawmhter lawng si ti loin anawl kan ngeih tikah zeitlukin dah kan lawmhter chin timi hi zuan hnawh cio hna usihlaw kan Pathian hi zeitlun in dah kan hei lawmhter ve cio hnga..
Ahlan ahcun Moses nih Rili a rak cheuter timi ka rak ruah ah hin ka khuaruah arak har i Pathian ka rak thangtthat taktak. Sihmanhsehlaw ka rak fian ngaingai lomi cu Rili hmanh nih pei Pathian nawl an rak ngaih hi timi hi ka rak hngalhchih lomi cu asi. Pathian Vel hi a fuhpanh zungzal mi caah innkaa ai khar bal loh, Pathian Vel kan fuh tikah kanmah miaknak lawng te an si. Sihmanhsehlaw Biatak tu cu Thiang Thlarau he kan tuahtti ahaumi tampi a um. Pathian nih zeidah a tuah khawh timi cu Pathian Vel asi i Zeizong vialte nih Pathian nawl an ngaih timi cu Biatak asi. Biatak na co lawnglawng ah Pathian nawl na ngeih khawh lai i Vel lawng acomi na si ahcun Pathian nih an tuahpiakmi lawngte hi na hngah zungzal ko lai. Nihin zumtu tampi cu ka pe peng law timi vel tang ah kan um i Biatak tu nih cun Pathian nawl ngai duhnak in kan tuah aherhmi tuahnak le zulhduhnak tiang a kan phanhpi. Biaktak cu Jesuh Khrih nih hin Vel lawng pe loin Biatak zong a kan pek chih. Jesuh Khrih na ngeih ve taktak ahcun Vel le Biatak cu na co chih hrimhrim lai. Zeitik hmanh ah Vel le Biatak cu tthen awk atthami an si lo...
Bawipa nawl zulhnak taktak tello in cun Pathian tinhmi thluachuah tling cu na hmu bal lai lo. Zeitindah Bawipa nawl cu kan ngaih in a duhnak cu kan zulh ne lai timi hi ruahlo awk attha lomi asi. Bawipa nawl ngaih na duh ahcun Baibal na relmi lawng le Thawngtha chimtu nih an chimmi na zulhnak lawng si ti loin Thlacamnak in Bawipa he hawikomhnak thukpi nan ngeihmi biaruahnak chungin ara dingmi an si. Bawipa Jesuh nih nan ka dawt taktak ahcun ka nawlbia kha nan zulh hna lai tiah a kan ti taktak nain Jesuh Khrih cu na hmuh ballo le na ton ballo ahcun zeitindah pehtlainak le hawikomhnak nan ngeih khawh lai, Pehtlaihnak in hawikomhnak na ngeih ballo ahcun zeitindah na dawt khawh lai i anawlbia cu na theih khawh lai, na dawt taktak lo ahcun zeitindah anawlbia cu na zulh khawh lai timi hi ruahcan ngaingai asi cang. Nihin zumtu aitimi tampi cu Jesuh nih a kan tuahpiakmi kan zumh timi tiangah kan tang i Amah he tonding le hmuh dingin kawl venak cu kan phan hrimhrim lo. Biatak tein chim ka duhmi cu na hmuh ballomi le na ton ballomi cu na daw kho in na duh kho ngaingai lai ka zum bak lo. Hmuh le ton hnu hmanh ah hin duhnak le dawtnak taktak cu pehtlaihnak le hawikomhnak ngeih hnu tu ah an chuakmi asi deuh in ka hmu. Cu ve bantuk cun Jesuh Khrih hi kan zumh i kan cohlan kan timi tiang lawngah tang ve ti loin Amah he ton ve ding le hawikomhnak kan ngeih ve tiang zuanhnawh cio hna usihlaw cu nih cun Amah dawt ve le anawlbia zulh cu fawite in a kan bawmh hnga.
Kan duhtukmi hna le kan dawttuk ve mi hna an chimmi bia ngaih le an duhnak zulh cu afawi ngaingai ko. Aruang cu kan duh tuk ve hna ruangah le kan dawt ve tuk hna ruangah asi ko. Cubangin Jesuh zong Amah he nan i ton i hawikomhnak tling nan ngeih ve hnu lawnglawng ah na dawt khawh ve taktak lai i anawl na ngaih khawh ve taktak lai. Thawngtha chimtu nih an chimmi theihnak lawng hin cun na daw kho ngaingai in anawlbia zulh cu a fawi hrimhrim lai lo. Aruang cu Amah he nan i ton ballo i hawikomhnak nan ngeih ballo caah asi. Biatak in nangmah nih Bawipa Jesuh Khrih, an khamhtu hi kawl law na hmuh le na ton i hawikomhnak nan ngeih ve tiang rak fuh ve. Cu nih cun na nun chung vialte raltthatnak le lawmhnak in a duhnak zulh hi naa thimbikmi asi ve te lai. Zeizong vialte nih anawl an ngaihmi Pa hi nangmah nih na ton le hawikomhnak nan ngeih ve tik lawngah na hngalh ve taktak te lai. Baibal nih achimmi le Thawngtha chimtu nih anchimmi naa rinh chung paoh cu zeitik hmanh ah tling tein cun na hngal kho bal lai lo i nangmah hrimhrim nih na hmuh le na ton tik i hawikomhnak nan ngeih ve taktak tik lawngah thlichia le tilet hmanh nih anawl an ngeihmi Pa cu na hngalh ve te lai. Bawipa nih Amah kawl duhnak le ton duhnak in hawikomh duhnak tiangah in hruai ve ko seh. Amen....
------------
MATTHAI 8:26
Jesuh nih cun, "Zeicahdah cu ti lawmmam cun nan thin a phan? Nan hei ka bochan lo hringhran dah!" tiah a leh hna. Cun a tho i thli le tilet cu nawl a pek hna i dai zirziar tein rili cu a um ṭhan.
MATTHAI 8:27
An dihlak in an khuaruah a har i, "Hi pa hi zei bantuk minung dah a si? Thlichia le tilet hmanh nih dahngai a bia an ngaih ko hi," an ti.