Ni nih a liam tuan i zarhkhat hi a za in kaa za hrim lo, zarh a liam a tuan i thla zong cu luklak lo ah an dih cuahmah. Sihmanhsehlaw ka thinlung vialte le ka duhnak a theitu ka Bawipa cu thangtthat si ko seh. Si kho sehlaw ka caan vialte hi hmangin Bawipa he umtti ka duh ko, ka duh ko ti lawng hmanh si loin ka duh taktak khi asi. Bawipa nih siseh ti a ka duhmi hi ka si sual lai lo ti ka phang caah ka Bawipa hmaiah ka kun lengmang. Ka Bawipa hmai ka kunnak lawng si loin ka Bawipa hrimhrim nih fim a ka chimh caah siseh ti a duhmi rian cu ka lim khawh hrimhrim lai.
- Zumhnak tlik zuamnak ah ka thazang dihlak, ka ruahnak dihlak le ka zumhnak dihlak in a dongh tiang hrimhrim ka tli lai.
- Zumhnak tlik zuamnak hmun ah tel duhmi ka si caah ka caan vialte hi Bawipa duhning in sullam ngei tein ka hman hna.
- Taksa tlik zuamnak ahcun pakhatnak a hmumi hi minung pakhat lawnglawng asi.
- Thlarau Tlik zuamnak ah a tlimi vialte kan caah cun kan dihlak in pakhatnak viar kan si.
- Zumhnak tlik zuamnak i lungdong lo tein a tli lengmang mi caah cun ruahchannak a um zungzal.
- Zumhnak tlik zuamnak hmun i a lung a dongmi le ai ngolmi caah cun ruahchannak a um ti loh.
- Zumhnak tlik zuamnak caah hin ka caan vialte hi hei hmang kho dih ning law ka hei duh dah.
- Zumhnak tlik zuamnak ca i timh tuahnak ka ngeihmi hi keimah lawngin timh tuahnak ka ngeih si loin Thiang Thlarau he kan si zungzal ko.
- Zumhnak tlik zuamnak ca i timh tuahnak ka ngeihmi nih hin ruahchannak ka ngeihmi lam ah an ka kalpi kha tehte an khan i ruahchannak ka ngeihmi thawng cun lung tthawnnak ka hmu tthan lengmang.
- Zumhnak tlik zuamnak ah hin na tha ngeihmi dihlak, na caan dihlak le zumhnak na ngeihmi dihlak he timh tuahnak rak ngei rih.
- Zumhnak tlik zuamnak caah timh tuahnak na ngeihmi ah hin rawl ni 40, 21, 15, 10, 7, 3, 1 ulh lawng hi a za hrimhrim lo. Abiapi cemmi cu nichiar te zeidah na tuah timi tu hi timh tuahnak na ngeihmi ah bawmtu cem an si lai. Nichiarte Baibal na rel maw? Thiang Thlarau hruainak he na rel maw? Nunpi duhnak he hmai ah an hruai maw? Nichiar te thlacamnak in Bawipa le Thiang Thlarau he hawikomh in bia nan i ruah maw? Baibal relnak le thlacamnak zong hi camtlawm, rel tam na ngeihmi nih tthannak tampi a danter rih lai.
- Zumhnak tlik zuamnak i timh tuahnak tlawm le tam kan ngeih ciomi nih hin hmantlak kan si dingmi le si lodingmi an chim te lai... Thiang Thlarau nih zungzal ca i hman awkah cun timh tuahnak um lo cun caan sau hman khawh kan si ve lo tihi chimchih ka duh. Timh tuahnak ka ti lengmang mi zongah hin kanmah lawng si loin Thiang Thlarau he hawikomhnak ngeihtti bu i timh tuahnak ngeihtti khi ka chim duh lengmang mi asi.
- Hmantlak le thimtlak na sinak ding ahcun nangmah duh thimmak cungah asi ko. Bawipa thimmi na si caah pei nihin na dirhmun hi na phanh cang hi.. Na zumhnak in timhtuahnak fak na ngeihmi nih hmantlak sinak a chuahpi te lai.. Hmantlak si na duh taktak ko ahcun timh tuahnak ah daithlang hrimhrim hlah.. Bawipa nih thluachuah in chapchin ko seh...
—-
1 TIMOTE 6:12
Zumhnak tlik zuamnak ah hin na tha ngeihmi dihlak in i zuam law zungzal nunnak kha co i zuam. Tehte tampi hmaiah na zumhnak na rak phuan ah khan Pathian nih an kawhnak cu hi nunnak hmuh awk caah hin a rak si.